Read pokoot 2 PÖYTOGHÏ 11 Bible Online

2 PÖYTOGHÏ 11 - pokoot bible

2 PÖYTOGHÏ 11

¹Nyini kisïwa Atalia yoto Aasia lö kima werïnyi, kïmwatïta kepar monïng löwïr cho pö ara pöytoghintonay.

²Wölo kïchïwït Yoas wero Aasia onkït. Kitökïpöröy nyinte tïkwïl, wölo kïsörï Yeosyepa chepö pöytoghin Yoram, chepkötanyi. Kingwïsa nyinte kwenu monïngo pöytoghi cho kirich kepar akïwö kïwïnchï pïrïnta nko chepto monïng tömapar Atalia.

³Kïpagh Yeosyepa monïngay ompö könyis mut nko akonga ompö Kö pö Tororöt otini kimi Atalia kïpöytoy.

⁴Wölo otini kitïta könyis mut nko odeny kïyonta tïsin Yeoyada chi kïkurï yetïntin cho kiripöy pöytoghin nko cho kiripöy kö pö soch kïpa Kö pö Tororöt akwigh chane kwam muma nyo pö kïgh nyo kimököy nyinte kwighöy, atolapay kuporchï chane weray pö pöytoghin Aasia.

⁵Akïmwochï chane lö, “Ochöghekwa kïlïkwï söpïchis sömök cho oripsïyi, ripöy walaka kö pö pöytoghin ompö asispa Sapato,*

⁶kïrip walaka Kuka Sur, kïripsyeghö walaka kukat, lötu chay ripöy kö pö pöytoghin.

⁷Ripsïyi söpïchischoni kwodeny, melö sïköy kimïny chane ompö asispa Sapato. Ripöy chane Kö pö Tororöt* nyo pö ECHOTYON atökïkarta pöytoghin.

⁸Angwïsuna chokonikwo arip pöytoghin Yoas lasiny. Apar chi anka tïkwïl nyo lentöy olïtu kwenunkwa. Otïpï nko nyinte ompö wop anka tïkwïl wölo köwö.”

⁹Kwigh nyu yetïntinechay lenyini kömwochï tïsin Yeoyada akutötö pikökwa kïpa wölini kimi Yeoyada. Pich cho kitöpetöy kumungöy asispa Sapato nko cho kipetöy kïripsïyi.

¹⁰Kïropchï tïsin chane ngötwö nko longoy cho kipöghisyegho pöytoghintö Daudi cho kikïrorchï Kö pö Tororöt,

¹¹kïtïpïyö psach ripichay nko chokonikwa kïngata okumpö tagh nyo pö Kö pö Tororöt ntökwit okumpö ewu löt akuwit ato kïpelo amöros.

¹²Atolapay kumït Yeoyada Yoas weray pö pöytoghin kïlït sany akulokyï mötïnyi kopïyö akutö palalyan nyo pö paytagh akwigh kïlïkwï pöytoghin, kuyila mwagh akurapach morïn akuteghyö lö, “Isöp nyo kogh, we pöytoghin!”

¹³Nyini kilïm pöytoghintö Atalia kiteghata ripï nko pich walaka, kurïp kutang Kö pö Tororöt wölo kimi söpïchoni,

¹⁴ kïsöchï köyoni pöytoghin nyo rel ghyongo atolekïto pchörï le wölo kilata osïltinekwa osiswechoni. Kiwit yetïntinö nyinte nko pich cho kikutöy kontin akimi pich kuteghyot ompö ngörekyö akïkutöy kontinekwa. Kïkarer Atalia sïrokachi ompö nyarïl akïrir lö, “Wököt! Wököt!”

¹⁵Kïmwochï tïsintonay le Yeoyada askarinechay kiripöy köyay pö ECHOTYON lö, “Onömunö nyinte kungwïna kwenu pich. Ato mi chi anka tïkwïl nyo lentöy otököwu nyinte apar tïkwïl.” Kimwa tïsintononi lenyoni ompöwölo melö kimököy kepörchini Ataliya Kö pö Tororöt.

¹⁶Kïnam chane kokonay, akuchut kutang kö pö soch, akïpa kïpörchï kukat nyo lïtöy angoletinö.

¹⁷Atolapay kwam Yeoyada muma* nko ECHOTYON nko pöytoghin Yoas nko pïchoni lö lïku chane pipö ECHOTYON.

¹⁸Kïpa nyu pïchoni löwïr kutang kö nyo kikïsogho Paal* akïngany, atolapay kurultö ato kïpelo amöros akunyar körkeyïntin cho kïsoghöy akïpar Matan tïsinto Paal ompö atoni kïpelo amörostin. Atolapay kutö tïsin Yeoyada ripï kïrip Kö pö Tororöt.

¹⁹Kumïtuna yetïntino lïk nko askarin cho kiripöy pöytoghin nko cho kiripöy kö pö soch akumïtuna pöytoghintonay Kö pö Tororöt ntökwitï köyay pö soch, akimi pich löwïr kïrïpöy löt. Kïlït Yoas Kuka Ripï akïwö kïtöpö ngacharunyi nyo pö paytagh.

²⁰Kingörekyö pich tïkwïl cho kimi kanasyan. Kïwïs kanasyantanay otini kikïpar Atalia ompö kö pö pöytoghin.

²¹Kutor Yoas kïpayta koro Yuda otini kitïng könyis mut nko odeny.