Read pokoot 2 PÖYTOGHÏ 12 Bible Online

2 PÖYTOGHÏ 12 - pokoot bible

2 PÖYTOGHÏ 12

¹Kilïkwï Yoas pöytoghinto Yuda ompö könyi mut nko odeny nyo pö paytaghpa Yeu pöytoghinto Israel. Kipayta ompö Yerusalem könyis tömönut angwan. Kikuro kame Sipiya nyo kingwïna kanasyanta Persyepa.

²Kigh Yeoas nyo karam ompö tawu ECHOTYON osiswechi löwïr, ompöwölo kirïp ngal cho kimwochï tïsin Yeoyada.

³Wölo melö kinyar wölo kïsogho körkeyïntin. Kulet tagh pipö Israel kïropta amörostin, akïpela köröstin wöloni.

⁴Kïkur Yoas tïsï akïmwochï chane kïghamït ropïyen löwïr cho kikengot kïlïkwï ropöw cho pö Kö pö Tororöt, ato kö ropïyen cho kakïmutï chi anta kö cho kacham nyinte ompö mïkulöwunyi kwipï Kö pö Tororöt

⁵akïcheng tïsin ompö pich cho le rori ropïyen atökepöghisyeghö keteka Kö pö Tororöt wölo pïnote.

⁶Wölo melö kökitek tïsï köyay pö ECHOTYON wölo köpïn ntökwitïta könyi tömönut odeny nyo pö paytaghpa pöytoghin Yoas.

⁷Kïlenyona kïkur Yeoas Yeoyada nko tïsi walaka akïtep lö, “Kölö ne tökïtomönye atekakwa Kö pö Tororöt? Melö tökechömwokwa ye nyu orore ropïyen cho ochengokwa pich, otötokwa löwïr atöketeka Kö pö Tororöt wölo kikïpïn.”

⁸Kïcham nyu tïsichay ngölyontononi amelö kitökïchenga pich ropïyen akïpïstö kïtek köyay wölo kipïn.

⁹Atolapay kïcheng Yeoyada santukï akupunpun köröwonte akutö ato kïpelo amöros, okumpö tagh ato kïlïtöy Kö pö Tororöt. Töni nyu tïsï cho ripsyegho kuka santukunoni ropïyen löwïr cho ipu pich cho pkonöy kïsoghöy.

¹⁰Ato sïwa chane lö kichangit ropïyenichoni, kungwïn nyu kikirinto pöytoghin nko Tïsin nyo Wow* atökuyityï akïrötyï mïlot ropïyenichoni kakïnyorchï Kö pö Tororöt.

¹¹Nyini kiwany chane kuyit, akunkïtï lö tya, kutö pich cho ghyongchini ighisyo Kö pö Tororöt atökïghokyï pich cho ighöy ighisyo mpawtin nko tekï

¹²nko teki koghïn nko kipöti koghïn atolapay kwal mpawtin nko koghïn cho kïteko köyoni wölo kipïn atökeghakta ropïyen löwïr cho kikïghoköy ompö Kö pö Tororöt.

¹³Wölo melö kikïpöghisyeghö ropïyenichoni kikipï Kö pö Tororöt le röpöw kyala kikompeni taghoy anta tïwanayi taghoy anta kontin anta karïn walaka tïkwïl cho pö koltin anta cho pö kasawat.

¹⁴Kikïpöghisyeghö ropïyenichoni löwïr kenömchï pich akyala tïkwïn cho kikïteka köyoni wölo pïnote.

¹⁵Melö mi lïsata nyonikïny nyo kitïng pïchoni kighyongchini ighisyononi pö teksyö, nyo kimöminye machata keros wölo kipöghisyeghtö.

¹⁶Melö kikipï Kö pö Tororöt ropïyen cho kipö ropöwo lelut anta ngoki, kipöyit ropïyenichoni tïsï.

¹⁷Kïporyeghö Asael pöytoghinto Sirya osiswechoni kanasyanta Kat akïrïnta, wölo otini kimököy kïwö kïporyeghö Yerusalem,

¹⁸kïcheng Yoas pöytoghinto Yuda ropöw löwïr cho kökikïngot piko orengwa ompö Yeosyapat nko Yoram nko Aasia kïpöyit ECHOTYON akutuyö nko ropöwechi nko koltin löwïr cho kile kaplawachpa Kö pö Tororöt nko cho kipö kö pö pöytoghin akwipchï Asael pöytoghinto Sirya. Melö kitökïporyeghö nyu Asael Yerusalem.

¹⁹Kirote ighisyewut löwïr cho kigh pöytoghintö Yoas kitapu Otöptino pöytoghi Yuda.

²⁰Kïyar or mötworichi atökïpar nyinte. Kïkonï kegh odeny ompö chane. Yosakar wero Syimeat nko Yeosapad wero Syomer, kïpar Yoas ompö kö pö Milo, ompö or nyo röytoy kutöngöy Sila.

²¹Kipar Yosakar nyinte wero Syimeat nko Yeosapad wero Syomer. Ketïpchï Yoas pïrïmpoti papotïnechi nyo ki mi kanasyanta Daudi, kuker werïnyi Amasya kïpayta.