Read pokoot 2 PÖYTOGHÏ 13 Bible Online

2 PÖYTOGHÏ 13 - pokoot bible

2 PÖYTOGHÏ 13

¹Kitor Yeoaas wero Yeu kïpayta Israel ompö Samaria, könyi 23 nyo pö paytaghpa Yoas wero Aasia pöytoghinto Yuda. Kipayta nyinte könyis 17.

²Kigh nyinte ngokï ompö tawu ECHOTYON le pöytoghin Yeropoam wero Nepat nyo kigh pipö Israel kwigh ngokï, kimöpïstönye ortïnechi cho ghach.

³Kïlenyona kïnörekyï ECHOTYON Israel, akïpïsyï Asael pöytoghinto Sirya nko werïnyi Pen Adad kïrïnta Israel kïnomnyö.

⁴Kïsagh Yeoaas ECHOTYON, kïterchï ECHOTYON nyinte ompöwölo kisïwa nyarïlpa pipö Israel wölo kichopta kong pöytoghinto Sirya.

⁵Kïlenyona kutö ECHOTYON pipö Israel yetïn nyo kisörunö chane pipö Sirya, kïmang nyu pipö Israel korengwa le tagh.

⁶Wölo melö kipïstö chane ngokï cho kigh pöytoghintö Yeropoam nyo kigh pipö Israel kwigh ngokï, wölo kitas tagh kïsagh tororöt Asyera* nyo le korka nyo kimi Samaria.

⁷Melö kitökïtïng Yeoaas pipö lïk cho kingötï, kïpoto pipö angoletin 50 nko nkaritin nko pich 10,000 cho kipegho kelyon, ompöwölo kökikïpar pöytoghinto Sirya walaka, akïtïkatïk le terïtyon.

⁸Kirote ighisyewut löwïr cho kigh pöytoghintö Yeoaas nko owesyenyi kitapu Otöptino pöytoghi Israel.

⁹Kïma aketïpchï Samaria, kuker werïnyi Yoas kïpayta.

¹⁰Ompö könyi 37 nyo pö paytaghpa Yoas pöytoghinto Yuda, kilïkwï Yeoas wero Yeoaas pöytoghinto Israel ompö Samaria akïpayta könyis 16.

¹¹Kigh nyinte tïkwïl ngokï ompö tawu ECHOTYON akïrïp otöp nyo gha nyo kipö pöytoghin Yeropoam nyo kigh pipö Israel kwigh ngokï.

¹²Kirote ighisyewut löwïr cho kigh pöytoghintö Yeoas nko owesyenyi nyo kiporyeghö Amasya pöytoghinto Yuda kitapu Otöptino pöytoghi Israel.

¹³Kïma Yeoas, ketïpchï pïrïmpoti pöytoghï ompö Samaria, kuker werïnyi Yeropoam kïpayta.

¹⁴Otini kikasa Elisya, akirich kïma, kïwö Yeoas pöytoghinto Israel kïrutochï, nyini kisïwa, kwotyö nyoman akïrir lö, “Heywey, paponyu! Heywey, paponyu! Nyo kechï ghetinto Israel nyo awes!”

¹⁵Kïlenchï Elisya Yeoas, “Chenga kïwang nko kotï.” Kïcheng

¹⁶atolapay kïmwochï Elisya nyinte kïtöpö kïpsach atökïwutïtö. Kwigh pöytoghintonay lenyini kukanagh Elisya ewunechi ewuno pöytoghintonay.

¹⁷Atolapay kïmwochï werkoyontonay nyinte kïyat tïrisya nyo mi okumpö kongasis, kïyat nyinte tïrisyanay pörtoy koro Sirya. Kïlö Elisya, “Wutïtenö kote!” Kïwutïtö kïlö werkoyontonay, “Ichinyi koto ECHOTYON nyo kïrïntegho pipö Sirya, iporyeghonyi pipö Sirya ompö Apek ntökïtenö rïntenanyi aiwang lömïs.”

¹⁸Atolapay kïmwochï Elisya pöytoghintonay, kïcheng kotï akïwutö ngwïny. Kïwutö pöytoghintonay kotichay ngwïny kïnyïl sömök akïpïstö.

¹⁹Otini kipïstö kïnarek Elisya akïlenchï pöytoghintonay, “Kötö iwutenyi kïnyïl mut anta mut nko akonga nyo köterïntonyi pipö Sirya aiwang lömïs, wölo irïntonyi ye nyu chane kïnyïl sömök kïpoto.”

²⁰Kïma Elisya aketïp. Kipkonöy osiswechoni pipö Moap kupokyini koro Israel köny anka tïkwïl.

²¹Kimi asistanka ato kitïpöy chane chitöngwa, kïlö kïtopöntö kïsïwa lïk, kïwirchï mïntïrïchnay pïrïmpo Elisya akwowöntö. Nyini kiswany poray koyo Elisya, kïsöp chichay akughyö.

²²Kuchop kong Asael pöytoghinto Sirya pipö Israel kïnomnyö otini kipöytoy Yeoaas,

²³wölo kusyonchï ECHOTYON chane. Melö kipïsyï pipö Sirya kïpar chane, kingarak chane ompöwölo kyam muma* nko Apraam nko Isak nko Yakopo. Melö mököy nyinte kïpïstö pikachi kewany anta wutyeghö chane.

²⁴Otini kima Asael pöytoghinto Sirya, kuker werïnyi Pen Adad kïpayta.

²⁵Kïrïnta Yeoas pöytoghinto Israel Pen Adad kïnyïl sömök akuyokwï kanastin cho kökinam Pen Adad ato kipöytoy Yeoaas papoto Yeoas.