Read pokoot 2 PÖYTOGHÏ 14 Bible Online

2 PÖYTOGHÏ 14 - pokoot bible

2 PÖYTOGHÏ 14

¹Ompö könyi odeny nyo pö paytaghpa Yeoas wero Yeoaas pöytoghinto Israel, kilïkwï Amasya wero Yoas pöytoghinto Yuda.

²Kitïng nyinte könyis 25 otini kitor kïpayta, kïpayta ompö Yerusalem könyis 29. Kikïkuro kame Yeoadin nyo kingwïno Yerusalem.

³Kigh nyinte nyo karam ompö tawu ECHOTYON, wölo melö kikarkegh nko pöytoghin Daudi, kirïp paponyi Yoas.

⁴Melö kinyar nyinte wölo kïsogho körkeyïntin, kitas tagh pich kutötö ropöw akïpel tïkwïn cho ngutoy cho onyïn ompö wöloni.

⁵Akwotini lawel kisïwa nyinte lö kichïchïm paytaghtanyi, kïpar yetïntin löwïr cho kipar paponyi nyo kile pöytoghin.

⁶Melö kipar nyinte monekwa, ompöwölo kimwa ECHOTYON ompö kirurut pö Musa lö, “Melö kïpöröy papotïn ompö ngokiko monekwa amelö kïpöröy monïng ompö ngokiko papotïnekwa, meghöy chi ompö ngokichi onkït.”

⁷Kïpar Amasya pipö lïko Edom 10,000 ompö mpöghoghyo Partin. Kïnam kanasyanta Sela otini kiporyot akïkurö Yokteel nko nyete le ye.

⁸Atolapay kïyonta Amasya pich wölo mi pöytoghintö Yeoas wero Yeoaas wero Yeu pöytoghinto Israel kïmwochï nyinte kïghamït pikachi pö lïk atökïporyö.

⁹Wölo kuyokyï Yeoas pöytoghinto Israel nyinte lö, “Kiyonta chi asistanka ket pö kato nyo kimi wuw pö Lepanon wölo mi törokwö akïlenchï, ‘Yilchinö werïnyan cheptöngu.’ Wölo kupulï tyompö wuw panini akïtïkyï ngwïny ketay pö kato.

¹⁰Keparanyi Edom, we Amasya, aikwol kegh tya, nya kïmïchin kwolötononi aitöpö katangu. Ompö ne teyörchinö kegh nyarïl nko pipö Yuda löwïr.”

¹¹Wölo kïtagh Amasya kïter ngalechoni. Kïwö nyu Yeoas pöytoghinto Israel nko pikachi pö lïk akïporyeghö nyinte ompö kanasyanta Pet Syemes, nyo mi Yuda.

¹²Kerïnta Yuda, kupertoy pipö lïk cho pö Amasya kutang kestonikwa.

¹³Kïnam Yeoas pöytoghinto Israel Amasya pöytoghinto Yuda wero Yeoas wero Aasia ompö Pet Syemes. Atolapay kïwö Yoas kutang Yerusalem akurultö nayatu kïngata okumpö Kuka Epraim ntökwitïta Kuka Luch, nyo kingata miten 200.

¹⁴Kïcheng koltine löwïr nko silpa nko tïkwïn löwïr cho kinyorchï Kö pö Tororöt nko cho kimi kö pö paytagh wölo kïrorchini kaplawachtin akïnam pich akïrat akïmïla kutöngwï Samaria.

¹⁵Kirote ighisyewut löwïr cho kigh pöytoghintö Yeoas nko owesyenyi nyo kiporyeghö Amasya pöytoghinto Yuda kitapu Otöptino pöytoghi Israel.

¹⁶Kïma Yeoas aketïpchï pïrïmpoti pöytoghï ompö Samaria, kuker werïnyi Yeropoam kïpayta.

¹⁷Kïtöpö nyu Amasya pöytoghinto Yuda könyis taman nko mut kïngata otini kirapas Yeoas pöytoghinto Israel.

¹⁸Kirote ighisyewut löwïr cho kigh Amasya kitapu “Otöptino osiswo pöytoghi Yuda.”

¹⁹Kitat pich ompö Yerusalem kïpar Amasya, wölo kuperta kutang kanasyanta Lakis, kïrïp pungkachi nyinte akïpa kïpara wöloni.

²⁰Kepunö angole portanyi kungwïn Yerusalem aketïpchï pïrïmpoti pöytoghï ompö Kanasyanta Daudi.

²¹Atolapay kïkïl pipö Yuda löwïr Asaria nyo kitïng könyis 16 kïlïkwï pöytoghin kuker paponyi Amasya.

²²Kïnam Usia kanasyanta Elat akïtek ngat Yuda otini kikïma paponyi.

²³Kilïkwï Yeropoam wero Yeoas pöytoghinto Israel ompö könyi taman nko mut ompö paytaghpa Amasya wero Yoas pöytoghinto Yuda. Kipayta könyis 41 ompö Samaria.

²⁴Kigh nyinte ngokï ompö tawu ECHOTYON, kïrïp Yeropoam wero Nepat nyo kigh pipö Israel kwigh ngokï.

²⁵Kiyokyï nyinte pipö Israel koroswekwa löwïr kïngata Amat ompö okumpö löt ntökwit nanampa Paryan, kïrïp kegh nko ngölyonto ECHOTYON, Tororöt pö Israel, nyo kimwochï mötworintenyi werkoyon Yona wero Amitay nyo kingwïno kanasyanta Kat Eper.

²⁶Kïsïwa ECHOTYON wölo kikichopta kong pipö Israel ato kö ratate anta tyakate kïmelö kimi chi nyo kingarak chane.

²⁷Wölo melö kökimwa ECHOTYON lö, owongöy pipö Israel ompö ngwïny, kïlenyona kïsörï nyinte chane ompö Yeropoam wero Yoas.

²⁸Kirote ighisyewut löwïr cho kigh pöytoghintö Yeropoam nko owesyenyi nko poryewut akuyokyï Israel ngat kanasyanta Damaska nko Amat cho kipö Yuda ato le tagh kitapu Otöptino pöytoghi Israel.

²⁹Kïma Yeropoam aketïpchï pïrïmpoti pöytoghï, kuker werïnyi Sakaria kïpayta.