Read pokoot 2 PÖYTOGHÏ 15 Bible Online

2 PÖYTOGHÏ 15 - pokoot bible

2 PÖYTOGHÏ 15

¹Kilïkwï Asaria wero Amasya pöytoghinto Yuda ato kitïng könyis 16 ompö könyi 27 nyo pö paytaghpa Yeropoam nyo pö Israel

²kipayta nyinte ompö Yerusalem könyis 52. Kikuro kame Yekolya nyo kingwïna Yerusalem.

³Kigh nyinte nyo karam ompö tawu ECHOTYON kïrïp kegh nko paponyi Amasya.

⁴Wölo melö kinyar wölo kïsogho körkeyïntin, kitas tagh pich kutötö ropöw akïpel tïkwïn cho ngutoy cho onyïn ompö wöloni.

⁵Kïtorchï ECHOTYON pöytoghintonay psenkwet nyo kinam nyinte ntökïma. Kimöngöy nyinte konyi onkït, kïpayta werïnyi Yotam korononi.

⁶Kirote ighisyewut löwïr cho kigh pöytoghintö Asaria kitapu Otöptino pöytoghi Yuda.

⁷Kïma Asaria aketïpchï prïmpoti Kanasyanta Daudi, kuker werïnyi Yotam kïpayta.

⁸Kilïkwï Sakaria wero Yeropoam pöytoghinto Israel ompö könyi 38 ompö paytaghpa Asaria pöytoghinto Yuda. Kipayta Sakaria aro mut nko akonga ompö Samaria.

⁹Kigh nyinte ngokï ompö tawu ECHOTYON le papotïnechi. Kichömchï nyinte pipö Israel kïsagh körkeyïntin le Yeropoam wero Nepat.

¹⁰Kïwöch Syalum wero Yapes Sakaria akïpar ompö tawu pich ompö Ipleam akïpayta kuker nyinte.

¹¹Kirote ighisyewut löwïr cho kigh Sakaria kitapu “Otöptino osiswo pöytoghi Israel.”

¹²Kwitïta nyu lö man ngölyonto ECHOTYON nyo kimwochï Yeu lö, “Lïku piko orenkwa pöytoghi Israel ntökuwer pïnwöy angwanï!”

¹³Kilïkwï Syalum wero Yapes pöytoghinto Israel ompö könyis 39 ompö paytaghpa Usia pöytoghinto Yuda. Kïpayta Syalum ompö Samaria arawa akonga.

¹⁴Kïweghö Menaem wero Kad kanasyanta Tirsa kutang Samaria akïpar Syalum ompö tawu pich akuker nyinte kïlïkwï pöytoghin.

¹⁵Kirote ighisyewut löwïr cho kigh Syalum nko wöchut kitapu “Otöptino osiswo pöytoghi Israel.”

¹⁶Otini kimi Menaem pantanyi kïwegho Tirsa, kunyar kanasyanta Tapua kïtuwit kïmi nko pikö tïkwïl nko kanastine cho lekïtöch tïkwïl, ompöwölo kitagh pipö kanasyantanoni kïyotï nyinte kukat. Akïkarer mutïno kor cho kimirsïyi.

¹⁷Kitor Menaem wero Kad, kïpayta Israel könyi 39 nyo pö paytaghpa Asaria pöytoghinto Yuda, kïpayta ompö Samaria könyis taman.

¹⁸Kigh nyinte ngokï ompö tawu ECHOTYON le pöytoghin Yeropoam wero Nepat nyo kigh pipö Israel kwigh ngokï ntökuwonyö osiswechi.

¹⁹Kïsetyï Pul, pöytoghinto Asirya, pipö Israel. Kïropchï Menaem nyinte kilen 34,000 cho pö silpa atökukil tïlyantanengwa atökïsïch owesyö paytaghtanyi.

²⁰Kïkwagha surï Menaem pipö Israel cho le sïkön. Kichikyï Menaem chi anka tïkwïl kïkonï ropïyen tömönut mut atökutö pöytoghinto Asirya. Kïmïla nyu pöytoghintonay korenyi.

²¹Kirote ighisyewut löwïr cho kigh Menaem kitapu “Otöptino osiswo pöytoghi Israel.”

²²Kirapas Menaem ketïpchï pïrïmpoti papotïnechi, kuker werïnyi Pekaya kïpayta.

²³Kilïkwï pöytoghinto Israel Pekaya wero Menaem ompö könyi tömönut mut ompö paytaghpa Asaria, pöytoghinto Yuda. Kipayta nyinte ompö Samaria könyis odeny.

²⁴Kigh nyinte ngokï ompö tawu ECHOTYON, le pöytoghin Yeropoam wero Nepat nyo kigh pipö Israel kwigh ngokï.

²⁵Kïtat Peka wero Remalia nko pipö lïk tömönut mut cho pö Kiliad, kïpar nyinte otini kimi kö pö paytagh ompö Samaria, kuker nyu Peka kïpayta.

²⁶Kirote ighisyewut löwïr cho kigh Pekaya kitapu “Otöptino osiswo pöytoghi Israel.”

²⁷Kilïkwï Peka wero Remalia pöytoghinto Israel ompö könyi odeny ompö paytaghpa Asaria, pöytoghinto Yuda akïpayta könyis tömönut odeny ompö Samaria.

²⁸Kigh nyinte ngokï ompö tawu ECHOTYON, le pöytoghin Yeropoam wero Nepat nyo kigh pipö Israel kwigh ngokï.

²⁹Kungwïn Tikla Pileser pöytoghinto Asirya osiswechoni kipöytoy Peka akïnam kanastina Iyon nko Apel Pet Maaka nko Yanoa nko Kedes nko Asor nko Kiliad nko Kalilaya nko Naptali akïrang pikö kïlïkwï ratanpa Asirya.

³⁰Kïtat Osyea wero Ela kïpar Peka wero Remalia akuker nyinte kïpayta Israel ompö könyi tömönut odeny nyo pö paytaghpa Yotam wero Usia.

³¹Kirote ighisyewut löwïr cho kigh pöytoghintö Peka kitapu Otöptino pöytoghi Israel.

³²Kilïkwï Yotam wero Usia pöytoghinto Yuda ompö könyi odeny ompö paytaghpa Peka wero Remalia pöytoghinto Israel.

³³Kitïng nyinte könyis 25 atoni, kïpayta könyis 16 ompö Yerusalem. Kikuro kame Yerusya chepö Sadok.

³⁴Kïrïp Yotam otöpto paponyi Usia kwigh nyo karam ompö tawu ECHOTYON.

³⁵Wölo melö kinyar nyinte wölo kïsogho körkeyïntin, kitas pich tagh kutötö amörostin akïpela amörostin wöloni. Nyinte nyo kitek Kukat nyo kimi okumpö ewu tagh ompö Kö pö Tororöt.

³⁶Kirote ighisyewut löwïr cho kigh pöytoghintö Yotam kitapu Otöptino pöytoghi Yuda.

³⁷Ki atoni kipöytoy nyinte otini kiyonta ECHOTYON nyo pö tagh pöytoghin Resin nyo pö Sirya nko pöytoghin Peka wero Remalia nyo pö Israel kïpa kïporyeghö Yuda.

³⁸Kïrapas Yotam aketïpchï pïrïmpoti pöytoghï nyo kimi Kanasyanta Daudi, kuker werïnyi Aas kïpayta.