Read pokoot 2 PÖYTOGHÏ 16 Bible Online

2 PÖYTOGHÏ 16 - pokoot bible

2 PÖYTOGHÏ 16

¹Kilïkwï Aas wero Yotam pöytoghinto Yuda ompö könyi 17 ompö paytaghpa Peka wero Remalia,

²kitïng nyinte könyis tömönut odeny. Kïpayta könyis 16 ompö Yerusalem. Wölo melö kigh nyo karam ompö tawu ECHOTYON Tororötïnyi le kwanta pöytoghin Daudi,

³kirïp otöptino pöytoghi Israel. Kitötö nyini le werïnyi kegh kïlïkwï amöros le otöptino pipö punton cho kiyona ECHOTYON tawu pipö Israel.

⁴Kitötö Aas amörostin nko tïkwïn cho ngutoy cho onyïn ompö wölo kïsogho körkeyïntin nko kutïngkot nko ghïtwöyi ket cho nyörilöch.

⁵Kïporyeghö kanasyanta Yerusalem pöytoghinto Sirya nko Peka wero Remalia pöytoghinto Israel akurich, wölo melö kimï chane kïrïnta Aas.

⁶Kïnam Resin pöytoghinto Edom osiswechoni kanasyanta Ela akïyon pipö Yuda cho kimöngöy kanasyantanoni. Kïmang nyu pipö Edom Elat atökïmöngöy nko nyete le ye.

⁷Kïyonta Aas pich wölo mi Tikla Pileser pöytoghinto Asirya akïlenchï, “Ochan mötworintengu, kïlenyona, nyonö sörwonte achïwïta pöytoghinto Sirya nko nyo pö Israel, mi chane kïporyot nko ani.”

⁸Kïcheng ngat Aas kari silpa nko koltin cho ki mi Kö pö Tororöt* nko cho kimi kö pö paytagh akïwö kïropchï pöytoghinto Asirya.

⁹Kughönchï pöytoghintonay pö Asirya Aas ngalechi. Kïyonta söpïch pö lïk kïpa Damaska kïnam kanasyante akïpar pöytoghinte akïrany pikö kutang Kir.

¹⁰Nyini kiwö pöytoghintö Aas ntökwit Damaska, atökïtuyö nko Tikla Pileser pöytoghinto Asirya, kïsöchï wöloni ato kïpelo amöros, kïcheng akuyoda kutö tïsin Uriya atökwigh anka nyo karkegh laras nko nyoni.

¹¹Kïlenyona kïtek Uriya tïsin ato kïpelo amöros nyo kikarkegh nko nyini kiyokunö pöytoghintö Damaska akuwany otini kitomönye kïmïla Aas.

¹²Otini kimïlegha Aas Damaska, kïsïwa lö kiketek ato kïpelo amöros kuwonyö,

¹³kïpela nyu atoni amörostino kyak akïropta pagh akïmïlchï dipay* atoni cho kïroptoy nko kisön cho pö pöghisyö.

¹⁴Kinategha Aas ato kïpelo amöros nyo kimi tawu ECHOTYON ompö kwenu ato kïpelo amörostin nko Kö pö Tororöt, kutang ewu löt nyo pö ato kïpelo amöros nyo kötöketeköy.

¹⁵Atolapay kïmwochï pöytoghintö Aas Uriya lö, “Pöghisyeghenö ato pöro kïpelo amöros katekan, pela amörostin tökwoghö nko ropöwo pagh cho pö nangat nko ropöwo kyak cho kïpelöy nko pagh cho kïroptoy cho pö pöytoghin nko pich nko cho pö pich cho kïroptoy ompö dipaytinekwa. Imïlchï atoni kisönko kyakichoni löwïr kïpelöy kïlïku amörostin. Wölo irip karïnanay pö taghoy kïpelo amöros atopöghisyeghan angora tïkwïn cho tökïpkonöy.”

¹⁶Kwigh Uriya lenyini kömwochï pöytoghintö

¹⁷Kïngam pöytoghintö Aas söremwok pö ato kïpelo amörostin nyo kikigha taghoy akïcheng otupö ompö ori nko tanki tay nyo kighyongo paraku kir. Atolapay kutö koghïn cho kikïtat.

¹⁸Kimököy Aas ngat kwighöy pöytoghinto Asirya kïngarak, kïlenyona kïchenga Kö pö Tororöt kïgh nyo syolote nyo kipöghisyegho pöytoghintö akïkar kukat nyo kilïtöy pöytoghintö onkït asispa Sapato* otini wetöy Kö pö Tororöt.

¹⁹Kirote ighisyewut löwïr cho kigh pöytoghintö Aas kitapu Otöptino pöytoghi Yuda.

²⁰Kïrapas Aas aketïpchï pïrïmpoti pöytoghï ompö Kanasyanta Daudi, kuker werïnyi Esekia kïpayta.