Read pokoot 2 PÖYTOGHÏ 17 Bible Online

2 PÖYTOGHÏ 17 - pokoot bible

2 PÖYTOGHÏ 17

¹Kilïkwï Osyea wero Ela pöytoghinto Israel könyi taman nko odeny ompö paytaghpa Aas nyo pö Yuda. Kipayta könyis mut nko angwan ompö Samaria.

²Kigh nyinte ngokï ompö tawu ECHOTYON, wölo melö kigh cho ghach le pöytoghi Israel walaka cho ki mi tawunyi.

³Kupokyï pöytoghintö Syalmaneser nyo pö Asirya Osyea. Kerïnta nyinte, kïkwöghchï Osyea Syalmaneser surï köny anka tïkwïl.

⁴Wölo kïyonta Osyea pich könyi anka kïpa kïnorï So, pöytoghinto Misri kïsom nyinte kingarakat akïtagh kïkwöghchï surï koro Asirya. Nyini kinkïtï Syalmaneser tötutyononi, kïyonta pich kïpa kïnam Osyea akïtorchï chela.

⁵Atolapay kupokyï pöytoghinto Asirya koro Israel akurich kanasyanta Samaria ompö könyis sömök.

⁶Kïnam pöytoghinto Asirya kanasyanta Samaria ompö könyi mut nko angwan nyo pö paytaghpa Osyea akïrang pipö Israel kïpa chela ompö koro Asirya akïpïsyï walaka kïmang kanasyanta Ala, kïmang walaka atolekïtö lalwa Apor nyo mi koro Kosan, kutö walaka kïmang kanastina pipö Mede.

⁷Kikïnam kanasyanta Samaria ompöwölo kigh pipö Israel ngokï ompö tawu ECHOTYON Tororötïngwa, nyo kisörunö chane Parao, pöytoghinto Misri akumïtuna chane korononi. Kïsagh tororötine walaka

⁸akïrïp otöptino pikö walaka cho kiyon ECHOTYON ompö tawungwa otini kimi pikachi kïsetöy. Kirïp chane otöptin cho kinet chane pöytoghi Israel.

⁹Akwigh ngat pipö Israel ompö wïngat tïkwïn cho ghach ompö tawu ECHOTYON Tororötïngwa. Kitek wölo kïsogho körkeyïntin ompö kanastinekwa löwïr, kïngata nyo mïnïng tya ntökwit kanastin cho echön.

¹⁰Kitek chane pchörin cho pö körkeyïntino tororöt nyo kikuro Asyera* ompö kutïng anka tïkwïl nko ket anka tïkwïl nyo kiwuro

¹¹akïpel köröstin ompö wölo kïsogho körkeyïntin kïrïp kegh nko otöptino pïchoni kiyona ECHOTYON tawungwa. Kigh chane ECHOTYON kïnarek ompö otöptinekwa cho ghach,

¹²akïpeny kirurut pö ECHOTYON cho kitagha chane lö masagh körkeyïntin.

¹³Kökirirchï ECHOTYON pikachi pipö Israel nko Yuda ompö werkoy nko ngorï lö, “Opïstenö ortïnekwa cho ghach, arïp kirurutköchan löwïr lenyini kyomwochan papotïnekwa kuwerï mötworichan werkoy cho kyoyokwan.”

¹⁴Wölo melö kiter pipö Israel, kyoghïghitu mötöwö le papotïnekwa cho melö kighan ECHOTYON Tororötïngwa.

¹⁵Kisas chane kirurutkachi löwïr, akïpeny muma* nyo kyam nyinte nko papotïnekwa amelö kiyang ngal cho kirirchï ECHOTYON chane. Kisagh chane körkeyïntin cho puryö kinyiwut, cho kigh chane kïlïkwï pich cho puryö kinyiwut akïrïp otöptino punton cho le pöröriskökwa akïtagh kirurut pö ECHOTYON nyo kitagha chane lö marïp otöptino pïchoni.

¹⁶Kipïstö chane kirurut löwïr cho pö ECHOTYON Tororötïngwa akwigh körkeyïntin odeny cho pö mogh nko tororöt nyo kïkuro Asyera nyo le korka, akïsagh kokel akïpöghisyechï Paal* kïlïkwï tororötïngwa.

¹⁷Kitötö chane monekwa cho le wor nko tipïn kipelchï tororötino pipö punton akïpar kwegh atökïngor tïkwïn cho pkonöy akukil kegh lasiny kïrïp tïkuchoni akwigh kïgh anka tïkwïl nyo gha ompö tawu ECHOTYON akwigh nyinte kïnarek.

¹⁸Kïnörekyï ECHOTYON pipö Israel akuwany chane lömïs, mömicha cho kingötï kïpoto pipö ara Yuda opïn.

¹⁹Melö kirïp pipö ara Yuda tïkwïl kirurut pö ECHOTYON Tororötïngwa, wölo kirïp otöptin cho kipïtö pipö Israel punton walaka.

²⁰Kitagh nyu ECHOTYON pipö Israel löwïr akuchop kong chane akïpïsyï chane pungkökwa cho kipuryö kisyonöt ntökïtenö kuwonyö chane ompö tawunyi.

²¹Kïkany otini kiwany ECHOTYON kupesyö Israel nko Yuda, kïkïl Israel Yeropoam wero Nepat kïlïkwï pöytoghintengwa. Kwigh Yeropoam pipö Israel kïtagh ECHOTYON akwigh ngokï cho ghach tya.

²²Kïrïp chane Yeropoam akulet tagh kwigh ngokï löwïr cho kigh nyinte,

²³ntökïtenö kuwany ECHOTYON chane ompö tawunyi, lenyini kimwa nyinte köny ompö mötworichi werkoy. Kïlenyona kerang pipö Israel kïpa kïlïkwï pïnot ompö koro Asirya nko ye.

²⁴Kumïtuna pöytoghinto Asirya pich kanastina Papilon nko Kuta nko Apa nko Amat nko Separpaim akutö kïmang kanastina Samaria kuker pipö Israel. Kïcheng chane kanastinechoni akïmöngisyö.

²⁵Otini kitor chane kimang wöloni melö kisagh ECHOTYON, kïlenyona kïyonchï ECHOTYON chane ngötuny cho kiwany pïchoni walaka.

²⁶Kïlenyona kemwochï pöytoghinto Asirya lö, “Melö nkït pïchoni kitö nyinte kïmang kanastina Samaria kirurut pö tororöt pö korononi, nka nyoni kiyonchï tororöt ngötuny kwam chane.”

²⁷Kïlenyona kïmwatïta pöytoghintonay pö Asirya lö, “Ayontena tïsin akonga nyo le ratan nyo kingwïna wölini atökunet pich kirurut pö tororöt pö korononi.”

²⁸Keyonta nyu akonga ompö tïsichay kikimïtuna Samaria kïwö kïmang Petel, kunet pich ompö wöloni wölo kïsoghtoy ECHOTYON.

²⁹Kïtas tagh pich cho kimang Samaria kïsagh körkeyïntin akutö wölo kïsogho körkeyïntin cho kitek pipö Israel. Kigh kanasyanta anka tïkwïl körkeyïntanyi nyo kisoghöy.

³⁰Kigh pipö Papilon körkeyïn nyo kikuro Sukot Penot, kwigh pipö Kuta körkeyïntino Nerkal, kwigh pipö Amat Asyima,

³¹kwigh pipö Apiti Nipas nko Tartak, kutötö pipö Separpaim monekwa kïlïkwï amörostin cho kipelchini tororötinekwa Adramelek nko Anamelek.

³²Wölo kisagh pïchoni tïkwïl ECHOTYON akïkïl pich kïlïkwï tïsï ompö kwenungwa cho kitötoy ropöw ompö wölo kïsogho körkeyïntin.

³³Kïlenyona, kïkonyït chane ECHOTYON, wölo kisagh tororötinekwa tïkwïl kïrïp kegh nko otöptino pipö koroswechini kipkana chane.

³⁴Tökïrïpöy pïchoni otöptinechoni nko ye. Melö konyïtöy chane ECHOTYON anta rïp kirurutkachi löwïr cho kitö pipö ara Yakopo nyo kimïnchï nyinte kaynat anka kïkurö Israel.

³⁵Kökikwam muma ECHOTYON nko chane akïlenchï, “Masagh tororötin walaka mokïtïngchï chane anta opöghisyechï anta opelchï amörostin.

³⁶Okonyïtekwa ngalechoni, ochan ECHOTYON nyo kyamïtunekwa koro Misri ompö owesyö nyo wow. Okönyïtanïkwa aropkanïn amörostin cho kïpelöy.

³⁷Orïpekwa osis löwïr kirurutköchan löwïr cho kyakirwakwa. Masagh tororötin walaka

³⁸amowutyeghö muma nyo kyaman nko akwa.

³⁹Okonyïtanïn ECHOTYON Tororötïnkwa atosörunenokwa punkökwo.”

⁴⁰Wölo melö kiter pïchoni ngalechoni, kilet tagh kïrïp otöptinekwa cho kipö tagh.

⁴¹Kikonyït nyu pïchoni ECHOTYON akïsagh körkeyïntin cho kipötöy, akïtökïmi monekwa kïsoghöy lenyoni nko ye.