Read pokoot 2 PÖYTOGHÏ 19 Bible Online

2 PÖYTOGHÏ 19 - pokoot bible

2 PÖYTOGHÏ 19

¹Otini kilïm pöytoghintö Esekia ngalechay, kïkarer sïrokachi ompö nyarïl akulach sarankwachtin akïwö kïlït Kö pö ECHOTYON Tororöt.

²Kïyonta Elyakim nyo ki wow ompö kö pö pöytoghin nko Syepna nyo kile kikirin nko tïsï cho echön, kïpa wölo mi werkoyon Isaya wero Amos. Kilach sarankwachtin chane tïkwïl.

³Kïlenchï chane Isaya, “Kölö Esekia asis nyete nyo pö nyarïl, kakïkarecha kong akenyorucha arasï. Kïlatecha ye nyu korka nyo karich kïlusyö wölo mötïngnye owesyö.

⁴Köyonï pöytoghinto Asirya Rapsyake nyo kengwïn kumwagh Tororöt nyo söpöy. Nya kunan ECHOTYON Tororötïngu ngalechï pö chïpö atökïkar kong pïchoni kangalana kutingwa ngalechoni. Kïlenyona, soghchinö piköcho cho le ngötunön.”

⁵Nyini kit pïchay kiyonta pöytoghin Esekia wölo mi Isaya,

⁶kïlenchï nyinte chane, “Omwochinö echotyontenkwa lö, kölö ECHOTYON, ‘Memïgh ompö ngal cho kelïmanyi cho kömwowunyi pöytoghinto Asirya nyo kemwaghanïn.

⁷Arosa lö otöninan nyinte mïkulögh nyo pö mïghöt, atökïlïm ngala putintön cho ighöy nyinte kïmïla korenyi kegh atopïstan kepar ompö wöloni!’ ”

⁸Otini kimïla Rapsyake, kïnyorï pöytoghinto Asirya kïporyegho kanasyanta Lipna, ompöwölo kilïm lö kiweghö pöytoghinto Lakis.

⁹Nyini kilïm pöytoghinto Asirya lö kiset pipö Misri cho kintöghoghchini pöytoghinto Tiraka nyo pö Etopya. Kïyonta pich wölo mi pöytoghintö Esekia nyo pö Yuda

¹⁰tökïlenchï nyinte, “Mekany kïlïsïn Tororötïngu nyo ighönenyi lö memukönye ketö Yerusalem mori pöytoghinto Asirya.

¹¹Olentan kelïmanyi wölo keda pöytoghi Asirya koros löwïr cho kiporyeghö akunyar lömïs. Kesörunyi nyu lö ne?

¹²Mi onö kanastina Kosan nko Aran nko Resep cho kinyar papotïnecha akïpar pipö Peteden cho kimöngöy Telasar amelö mi tororötïngwa ompö akong nyo kimï kïsörï chane?

¹³Mi onö pöytoghi kanastina Amat nko cho pö Arpad nko cho pö Separpaim nko cho pö Ena nko cho pö Ipa?”

¹⁴Kïchenga pöytoghintö Esekia palalyantanay pïchay kikïyonta akusomön. Atolapay kïwö kïlït Kö pö Tororöt* akukörkorchï tawu ECHOTYON,

¹⁵akïsagh lö, “We ECHOTYON Tororöt pö Israel, nyo itöpo ngacharu paytagh, nyo mi paraku kerupimtin,* nyi onkït nyo ichï Tororöt nyo ipöytoy pöytoghi ngwïny kïmïkul. Kighanyi ngwïny nko yïm.

¹⁶Kapa yit, we ECHOTYON, iter aingany konyiku irosïta ompö ngala Senakerip nyo kemwaghinyi, Tororöt nyo isöpöy.

¹⁷Kinkïtöcha we ECHOTYON lö, kipar pöytoghi Asirya punton cho chang akwigh koroswekwa kïlïkwï kïratis

¹⁸akïpel tororötinekwa cho kimelö tororötin nyonikïny, wölo körkeyïntin cho pö ket nko koghïn cho kikigha morïn.

¹⁹Kïlenyona we ECHOTYON, Tororötïnyo, osoghinyi lö sörwecha ompö mori pöytoghinto Asirya atökunkïtï pipö ngwïny kïmïkul lö nyi onkït ECHOTYON nyo ichï Tororöt.”

²⁰Atolapay kutötö kut Isaya wero Amos kemwochï pöytoghin Esekia lö, kïrïp kegh nko sowutköku ompö Senakerip pöytoghinto Asirya,

²¹lentöy ECHOTYON Tororöt pö Israel ompö Senakerip, “Roröchininyi akïsasinyi Sayon,* kangeminyi akïmïninyi kanasyanta Yerusalem.

²²Ngo nyini kemwaghanyi airoröchï nya? Ngo nyï keteghchinyi aichirchï konyïn ompö menöt nya? Keratanyi Tororöt pö Israel nyo Tïlil!

²³Kemwaghanyi Echotyon ompö piköku chï keyonunyi kïpka kïkwölö kegh tawunyan aimwaghanyi lö, ‘Ompö nkarinechan cho chang, karïntan Lepanon, ntowongwï kutïngkot löwïr cho koghöch. Kotörön keti tarakitkachi cho koghöch akïlchan kegh keti saypras cho pïchighöch. Kolïtön ompö wudö wölnö kidïrö.

²⁴Ani ngo, nyo kyawas kori pöghon aghegh pögho koros walaka. Kityaka kelyekwa lïkenyan lalwa Nile kïyam.’

²⁵“Tomönye so lïmanyi lö kyatatan choni otini le könyisyok? Nka nyï ye kaghan kwitïta. Kyokoninyi owesyö para kanastin cho kikïteka nöyet ainyar.

²⁶Melö kitïng owesyö pich cho kimöngöy kanastinechoni, kikigh chane kwotyö akïtangany. Ki karkegh chane nko suswo paren anta sus cho kipita pörkö, nyo otini kila asis kïsilonchö.

²⁷“Wölo onkïtön kïgh anka tïkwïl ompö nyi, kïgh nyo ighenyi nko wölo iwetenyi. Onkïtön wölini wow kïlïkwï sïngiryengu ompö ani.

²⁸Konkïtwan sïngiryengu ompö ani nko wölini kekwoltenyi kegh. Nyo omwowunyi ye nyu lö otömölinyi angasyaminyi kut ayodinyi mïlena aranini kingwïnenyi.”

²⁹Atolapay kïlenchï Isaya pöytoghin Esekia, “Lïku nyï machey ompö nyi. Iyomenyi könyinete tïkwïn cho pitöy opïn könyi nyo pö odeny iyamanyi yapanka, wölo iletonyi kösïgheku ompö könyi nyo pö sömök aikas pagheku aikatkat keti sapipun aiyam akwe.

³⁰Ngötuno pich koro Yuda akïtösisyö le ket cho ipöy tikitkökwa ori ngwïny lasiny atökïyiyï akwa.

³¹Ompöwölo ngötuno pich Yerusalem nko kutïng pö Sayon,* ompöwölo ECHOTYON nyo tötöy lenyoni.

³²“Mwoghöy ECHOTYON ompö pöytoghinto Asirya lö, ‘Melö lïtu nyinte kanasyantanï anta wutï kotöt kwit kanasyan. Amengwïnönye kanasyantanï nko longa anta rik kanasyante.

³³Mïlo nyinte aranini kingwïna amelö lïtu kanasyan nyonikïny. Omwoghan ante ECHOTYON.

³⁴Oripan kanasyantanete asörï akarta ompö konyït pö kaynenyan nko mötworintenyan Daudi.’ ”

³⁵Kïwö malaykayanta ECHOTYON oghononi wölo kimöngöy pipö Asirya akïpar pipö lïk cho le 185,000. Nyini kiyech, kelö kïtopön kimeghö kurïnkïsus!

³⁶Kïchïchïka Senakerip pöytoghinto Asirya, kïmïla kutang Ninawi.

³⁷Kimi asistanka ato kisogho nyinte koto tororötïnyi Nisrok, kïpar werkachi odeny nyinte, chane kï: Adramelek nko Syareser. Atolapay kupertoy kutang koro Ararat. Kuker werïnyi akong kïpayta nyo kïkuro Esaradon.