Read pokoot 2 PÖYTOGHÏ 2 Bible Online

2 PÖYTOGHÏ 2 - pokoot bible

2 PÖYTOGHÏ 2

¹Kitïta nyu ato kïmököy ECHOTYON kumïtöy Eliya yïm ompö pïchpïch. Kinam pan Eliya nko Elisya kïngetunö Kilkal.

²Akwotini kimi pan, kïlenchï Eliya Elisya, “Kanganïn yete, ompöwölo kayontanïn ECHOTYON wölnö le Petel.”

³Wölo kuyokyï Elisya lö, “Kile ato söpöy ECHOTYON nko nyi melö opïstoninyi kokay!” Kïpa nyu chane kwodeny wölini le Petel, kïpka werkoy cho kimöngöy wöloni cho kilenchï Elisya, “Einkïtönyi lö ngwïnöy ECHOTYON kumïtöy echotyontengu asisete nya?” Kuyokyï Elisya lö, “Owöy onkïtön, osisyenökwa!”

⁴Atolapay kïlenchï Eliya Elisya, “Kaykay töpene yete le Petel, ompöwölo kayontanïn ECHOTYON wölnö le Yeriko.” Wölo kuyokyï Elisya lö, “Kile ato söpöy ECHOTYON nko nyi, melö opïstoninyi kokay.” Kïpa nyu chane kwodeny ntökwitïta Yeriko.

⁵Atolapay kïtuyö chane ompö Yeriko nko werkoy cho kimöngöy wöloni cho kipka akïlenchï Elisya, “Einkïtönyi lö ngwïnöy ECHOTYON kumïtöy echotyontengu asisete nya?” Kuyokyï Elisya lö, “Owöy onkïtön, osisyenökwa!”

⁶Atolapay kïlenchï Eliya Elisya, “Kaykay töpene wölete, ompöwölo kayontanïn ECHOTYON wölnö le lalwa Yordan.” Wölo kuyokyï Elisya lö, “Kïle ato söpöy ECHOTYON nko nyi melö opïstoninyi kokay.” Kïpa nyu chane kwodeny

⁷nko werkoy tömönut mut cho kirïp chane. Kughyongö werkoychay ato low, kughyongö chane lalwa Yordan.

⁸Atolapay kïngwïs Eliya sampunyi akïmaman akulïwö pöghechay, kïmuryö pöghechay kwoghyö Eliya nko Elisya lalwanay kïtïyame.

⁹Kïlenchï Eliya Elisya ompö atoni, “Somanïn kïgh nyo imökenyi atokonïn kïtomö kemïtanïn.” Kuyokyï Elisya lö, “Kaykay konante owesyö nyo pö werkoynön, nyo teno nyengu kïnyïl odeny.”

¹⁰Kuyokyï Eliya lö, “Kesomaninyi kïgh nyo awes, wölo inyorunenyi ato isïwaninyi otini kïmi kemïtanïn. Wölo melö inyorunenyi ato mesïwanïnyinye.”

¹¹Otini kimi chane pan kukorotoy, kïrökunö nkari ma yïm panini nko angoletino ma akupesyö chane, kemïta Eliya atoni kïwö yïm ompö pïchpïch.

¹²Kïsïwa Elisya, kutegh lö, “Paponyu, paponyu! Kewenyi awey! Pchori Israel!” Melö nyu kitökïsïwa nyinte Eliya ngat. Kïkarer Elisya kolikenyi kïlïkwï odeny ompö nyarïl.

¹³Atolapay kïcheng sïranay pö Eliya kachïnuna wölo mi nyinte akïmïla akughyongö lalwa Yordan kamas.

¹⁴Kulïwö sïranay pö Eliya pöghechay akïlö, “Mi onö ECHOTYON Tororöt pö Eliya nya?” Otini kilïwö sïranay pöghechay, kïpesyö kïlïkwï odeny, kwoghyö nyu nyinte antakwagh.

¹⁵Kïsïwa werkoy cho le 50 nyinte, cho kimi Yeriko kïlö, “Mi owesyo Eliya paraku Elisya.” Kïpa kïtuyö nko nyinte, akungïrukisyö ompö tawunyi ompö könyït

¹⁶akïlö, “Kïmitecha yi cho le 50 akechicha pich cho owesöch löwïr. Nya kepecha keyara echotyontengu. Töptoy kemït mïkulöwu ECHOTYON akïpïsyï nyinte wölnö le kutïngkot anta wölo le mpöghogh.” Wölo kuyokyï Elisya lö, “Ewo, mosus kegh lö kïpetöy.”

¹⁷Wölo kuchikyï nyinte ntökïlalïyan, kïpïstö chane kïpa. Kïpa pïchay cho le 50 kïyarata Eliya kïghömï kutïngkot nko mpöghoghöy ompö osis sömök, wölo kimönyorïcha.

¹⁸Kïmïlisyö wölay kimi Elisya nyo kiköngöy chane ompö Yeriko. Kïlenchï Elisya pïchay, “Olentan kataghenakwa lö mapa?”

¹⁹Kïpa pipö Yeriko wölo mi Elisya akïlenchï, “Pïchigh tya kanasyantanï, le otini isïwïyenyi echotyon, wölo ghach pöghechi amöminye kïgh nyo rïro kore.”

²⁰Kïlö, “Opkanïn tïwan nyo tökïrel, ayin partin.” Kepchï tïwan,

²¹kïwö kutang köyay pö pögh akïlösyï partinechay kïlentöy, “Mwoghöy ECHOTYON lö, ‘Kosopön pöghechï, melö tökwighöy pich ngat kïmeghyot anta igh kor mörïrö tïkwïn.’ ”

²²Kïsil pöghechay kïngata atoni kïrïp kegh nko ngölyonto Elisya nyo kimwowï.

²³Kïweghö Elisya Yeriko kutang Petel, otini kitökïmi kïtuyö nko karachïna cho kipkono kanasyan, kïroröchï nyinte ompöwölo kipechate möt.

²⁴Kïwaghaka akïchïp chane ompö kaynata ECHOTYON. Kïpkana koghyenï odeny wuw cho sökote akïpar karachïnechay cho le 42.

²⁵Kïwö Elisya kïpusta kutïng pö Karmel, atolapay kïmïla Samaria.