Read pokoot 2 PÖYTOGHÏ 20 Bible Online

2 PÖYTOGHÏ 20 - pokoot bible

2 PÖYTOGHÏ 20

¹Kikasa pöytoghintö Esekia osiswechoni nyo kirich kïma. Kïwö werkoyon Isaya wero Amos kuros nyinte akïlenchï, “Kölö ECHOTYON yomisö moneku ompöwölo melö tesöpenyi.”

²Kïwaghaka Esekia kïparta nayat akïsagh lö,

³“Inan, we ECHOTYON ighisyewutköchan löwïr cho kaghan ompö kighanat nko ompö mïkulögh akonga amukyan osis agh kïgh anka tïkwïl nyo karam ompö tawungu.” Atolapay kïrir kïlok nyoman ompö ngwonïn.

⁴Kïpïstö Isaya pöytoghintonay, wölo otini kitomönye kïtïl köyay pö pöytoghin kïlenchï ECHOTYON nyinte.

⁵Mïlena ngat wölo mi Esekia, nyo le pöytoghinto piköchan ailenchï, “Kölö ECHOTYON Tororöt pö papongu Daudi, kalïman saghatengu asïwan lokeku. Osopinyi, nyo ato mi asispa sömök iwenyi Kö pö Tororöt.

⁶Otösunyi könyiswe walaka cho le taman nko mut asörunyi nko kanasyanta Yerusalem ompö mori pöytoghinto Asirya. Osörunan kanasyantanete ompö konyït nyo pö kaynenyan nko ompö mötworintenyan Daudi.”

⁷Atolapay kïlenchï Isaya pich cho kiripöy Esekia okonö makatyan nyo kikigha akwa makany, anyïra tasustanyi atökïsöp.

⁸Kïtep pöytoghintö Esekia Isaya lö, “Ne macheyu nyo poru lö sopanïn ECHOTYON ntowan asispa sömök Kö pö Tororöt?”*

⁹Kuyokyï Isaya lö, “Koninyi ECHOTYON nyinte machey tenkïtunö lö, ighöy nyinte lenyini keyomisinyi. Kïlenyona imökenyi kïwetöy rurwö tagh kelyön taman anta kïmïla löt kelyön taman?”

¹⁰Kuyokyï Esekia lö, “Kwïskwïs kïwö rurwö tagh kelyön taman, wölo nya kïmïla löt kelyön taman.”

¹¹Kïsagh Isaya ECHOTYON, kwigh ECHOTYON rurwonay kïmïla ompö kïgh nyo kïtopöno satïn nyo kigh pöytoghintö Aas.

¹²Kïlïm osiswechoni Merodak Paladan wero Paladan pöytoghinto Papilon lö kikasa pöytoghintö Esekia. Kïlenyona kutö pich palalyan nko ropöwon kwipchï.

¹³Kïtak Esekia pïchay akuporchï sïkönötenyi, kari silpa nko koltin nko tïkwïn cho ngutoy cho onyïn nko mwowöy cho pö olyot nyo wow nko wölo kïrorchini kari lïk. Melö kimi kïgh nyo kituch nyo melö kiporchï chane.

¹⁴Kïwö werkoyon Isaya wölo mi pöytoghintö Esekia akïtep lö, “Kapkana onö pïchï, akömwowunyi ne chane?” Kuyokyï Esekia lö, “Kapkana chane kor nyo löw nyoman, koro Papilon.”

¹⁵Kïtep lö, “Akïne nyo kasïwa chane ompö kongu?” Kuyokyï lö, “Kasïwa chane tïkwïn löwïr, möminye kïgh nyo melö koporchan ompö korichan.”

¹⁶Kïlenchï Isaya pöytoghintonay, “Mwoghöy ECHOTYON Tororöt lö,

¹⁷‘Itu osiswö cho kïchengeninyi kïgh anka tïkwïl ompö kongu, ata cho kirorunyi papotïneku ntökïtenö nyete le ye. Kipoy koro Papilon tïkuchoni löwïr möminye kïgh nyo ngötu, mwoghöy ECHOTYON.

¹⁸Petöy chini le moneku kegh kïlïku latan* cho pöghisyechini ka pöytoghinto Papilon.’ ”

¹⁹Kuyokyï Esekia werkoyon Isaya lö, “Karamach ngalechoni kemwowunyi kamwa ECHOTYON.” Kimwa nyinte lenyoni ompöwölo kipköchï lö möminye tapan nyo itu otini tökïsöpöy nyinte.

²⁰Kirote ighisyewut löwïr cho kigh Esekia nko owesyenyi nko wölo kitekta ngarpïl nko ara pögh nyo kip pögh kanasyan kitapu “Otöptino osiswo pöytoghi Yuda.”

²¹Kïma Esekia kuker werïnyi Manase kïpayta.