Read pokoot 2 PÖYTOGHÏ 21 Bible Online

2 PÖYTOGHÏ 21 - pokoot bible

2 PÖYTOGHÏ 21

¹Kitïng Manase könyis taman nko odeny otini kitor kïpayta koro Yuda. Kipayta ompö kanasyanta Yerusalem könyis 55. Kikuro kame Epsipa.

²Kigh Manase ngokï ompö tawu ECHOTYON ompöwölo kirïp otöptino pipö punton cho kiyon ECHOTYON ompö tawu pipö Israel.

³Kitek nyinte ngat wölo kïsogho körkeyïntin cho kinyar paponyi Esekia. Kitek ato kïpelo amöroso Paal* akwigh körkeyïn nyo pö tororöt nyo le korka nyo kikuro Asyera.* Kigh nyinte le pöytoghin Aap nyo pö Israel. Kisagh nyinte tïpö yïm löwïr,

⁴akïtek Kö pö Tororöt* ori ato kïpelo amöroso pipö punton. Kïgh nyo kitagh ECHOTYON ompöwölo kilö, “Kïsoghenanïn Yerusalem.”

⁵Kïtek köyini pö Tororöt ori ato kïpelo amöros cho pö kokel.

⁶Kutötö werïnyi kepel kïlïkwï amöros. Kïpöghisyeghö ponintön akïmar pich cho ngoröy tïkwïn cho ighisyot akïngalan nko pich cho mi ngwen. Kigh ngokï cho ghach tya ompö tawu ECHOTYON akwigh nyinte kïnarek.

⁷Akutö körkeyïn pö tororöt nyo le korka nyo kïkuro Asyera* kïtöpö Kö pö Tororöt, kö nyo kökimwochï ECHOTYON Daudi nko werïnyi Solomon lö, “Yete le Yerusalem, ato kakïlan kesaghenanïn ompö koros taman nko odeny cho pö pipö Israel.

⁸Nyo ato cham pipö Israel kïrïp ngalechan löwïr nko kirurutköchan cho kyotönön mötworintenyan Musa, kïmelö opïstenan chane keyona koronete kyotönön papotïnekwa.”

⁹Wölo kitagh pipö Yuda kïterchï ECHOTYON. Kintöghoghchï Manase chane kwigh ngokï cho ghach tya kïtïl cho kigh pipö punton cho kiyona ECHOTYON koroswechoni akutö chane.

¹⁰Kingalan ECHOTYON kuwerï mötworichi werkoy lö,

¹¹“Ompöwölo kegh pöytoghintö Manase ngokï cho ghach tya, ngokï cho ghach kïtïl cho kigh pipö Kanan akwigh pipö Yuda kïsagh körkeyïntinechi le nyinte.

¹²Kïlenyona, mwoghöy ECHOTYON Tororöt pö Israel lö, opunan nyarïl nyo wow Yerusalem nko Yuda nyo ato lïm chi anka tïkwïl kinyaratanoni kïtangany.

¹³Ochopan kong Yerusalem le wölo kyachopan Samaria, le wölo kyadan pöytoghin Aap nyo pö Israel nko piko orenyi. Omisan pipö Yerusalem löwïr, le wölo kïmistoy sani akeköpïghtö.

¹⁴Otortonan ngötunön pö piköchan atönön mori pungkökwa kïlïkwï pöröwekwa.

¹⁵Ompöwölo keghwanïn ngokï chane akwighanïn anarekan kïngata atanye kipkana papotïnekwa koro Misri nko nyete le ye.”

¹⁶Kipar Manase pich cho chang cho kipuryö lelut kuyintegha kisön ortïna Yerusalem le pögh akwigh pipö Yuda kwigh ngokï ompö tawu ECHOTYON.

¹⁷Kirote ighisyewut löwïr cho kigh pöytoghintö Manase nko ngokichi kitapu Otöptino pöytoghi Yuda.

¹⁸Kïrapas Manase ketïpchï parenyi nyo mi para Usa, kuker werïnyi Amon kïpayta.

¹⁹Kitïng Amon könyis 22 otini kitor kilïkwï pöytoghinto Yuda. Kipayta könyis odeny ompö Yerusalem. Kikuro kame Mesyulemet chepö Arus nyo pö kanasyanta Yotpa.

²⁰Kigh nyinte ngokï ompö tawu ECHOTYON le kwanta Manase.

²¹Kirïp nyinte otöpto kwanta kïsagh körkeyïntin cho kisoghöy kwanta akïpöghisyechï.

²²Kipïstö nyinte ECHOTYON, Tororöt pö papotïnechi akïpeny kirurutkachi.

²³Kïchomnyechï mötwori pöytoghin Amon kïpar nyinte, kïpörchï konyi.

²⁴Kïpar pipö Yuda pïchoni kipar Amon akutö werïnyi Yosia kuker nyinte.

²⁵Kirote ighisyewut löwïr cho kigh pöytoghintö Amon kitapu Otöptino pöytoghi Yuda.

²⁶Ketïpchï pïrïmpenyi nyo ki mi para Usa, kuker werïnyi Yosia kïpayta.