Read pokoot 2 PÖYTOGHÏ 22 Bible Online

2 PÖYTOGHÏ 22 - pokoot bible

2 PÖYTOGHÏ 22

¹Kitïng Yosia könyis mut nko sömök otini kitor kilïkwï pöytoghinto Yuda. Kipayta könyis 31 ompö Yerusalem. Kikuro kame Yedida chepö Adaya nyo pö kanasyanta Poskat.

²Kigh Yosia nyo karam ompö tawu ECHOTYON. Kirïp otöpto kwanta pöytoghin Daudi. Melö kipïstö kirurut pö ECHOTYON nyo le ompö akonga.

³Kiyonta pöytoghintö Yosia Syapan, wero Asalia nyo kile kikirin aki nyinte nyo le kuköto Mesyulam ompö könyi 18 nyo pö paytaghtanyi kïwö kïlït Kö pö Tororöt* akïlenchï,

⁴“Wïyö wölo mi Ilkia Tïsin nyo Wow* tökïmwowun lö tya kerpes cho kikwagh tïsï cho ripöy Kö pö Tororöt

⁵aimwochï nyinte kutö ropïyenichoni pich cho ghyongchini ighisyo Kö pö Tororöt. Ghokyini chane nyu

⁶pich cho pöghisyegho mpawtin nko teki walaka nko cho tektoy koghïn. Atökwal mpawtin nko koghïn cho kïkïno kot.

⁷ Möminye machata ketep pïchoni lö köpöghisyeghö chane ropïyen cho kikitö lö ne, ompöwölo pich chane cho ghönote.”

⁸Kïmwochï Ilkia Syapan nyo kile kikirin lö, “Kyonyorwan kitapu Kirurut pö Musa ompö Kö pö Tororöt ori!” Kutö Ilkia Syapan kitapunay, kusomön nyinte,

⁹kïmïla Syapan wölo mi pöytoghintö akïlenchï, “Kikïcheng mötworiku ropïyenichay kimi Kö pö Tororöt akutö pich cho kighyongchini ighisyo Kö pö Tororöt.”

¹⁰Atolapay kïlö, “Otïngetan kitapï nyo kökonanïn Ilkia, akusomönchï Syapan pöytoghin kitapunay.”

¹¹Nyini kilïm pöytoghintonay ngalechoni kusomönöy Syapan, kïkarer sïrokachi kuporï nyarïltanyi.

¹²Kïmwochï pöytoghintö Ilkia Tïsin nko Aikam wero Syapan nko Akpor wero Mikaya nko Syapan kikirin nko Asaya mötworinto pöytoghin lö,

¹³“Wïyö lïkuna kutinyan nko nyo pö pipö Yuda aitepï ECHOTYON kïgh nyo poru ngalechï mi kitapunï. Narekate ECHOTYON ompö acha ompöwölo kitagh papotïnecha kwigh le nyï mwoghöy kitapunï.”

¹⁴Kïlenyona, kïwö Ilkia nko Aikam nko Akpor nko Syapan nko Asaya wölo mi Ulda, werkoyon nyo le korka, koko Syalum wero Tikpa wero Aras nyo kiripöy wölo kïrorchini sïro pö Kö pö Tororöt (kimöngöy nyinte kareranpa Yerusalem nyo kitö keteköy) akïmwochï nyinte ngalechay keghisyö.

¹⁵Kïlenchï kokonay pïchay omïlonchenö wölo mi pöytoghintö alenchï,

¹⁶kölö ECHOTYON, “Onyörilan kong Yerusalem nko pikachi löwïr, kïrïp kegh nko ngal cho mi kitapunoni kesomön pöytoghinto Yuda.

¹⁷Köpïstanïn chane akïpelchï köröstin tororötin walaka, atökumï kwighanïn anarek ompö ighisyeghutkökwa. Kïlenyona ongwonitunan lakat ompö Yerusalem.

¹⁸Olenchinö pöytoghinto Yuda nyini keyokwokwa, mwoghöy ECHOTYON, Tororöt pö Israel lö, kesomönönyi ngal cho kakikir kitapunï,

¹⁹ikötenyi aipönyi kegh ngwïny ompö tawunyan aikarer sïroköku kuporï nyarïltanyi otini kilïmanyi lö karich anyaran Yerusalem nko pikachi ntökïlïkwï kïratyan nyo tuw akï chïpö. Wölo kalïman ye nyu saghatengu,

²⁰Melö topunan ye nyu kinyarat Yerusalem ntökïtenö rapasanyi ompö kalya.” Kïmïlonchö pïchay wölo mi pöytoghintö Yosia akïmwochï ngalechay.