Read pokoot 2 PÖYTOGHÏ 23 Bible Online

2 PÖYTOGHÏ 23 - pokoot bible

2 PÖYTOGHÏ 23

¹Kïkur pöytoghintö Yosia kintöghoghi Yuda nko cho pö Yerusalem,

²akïwö kïpusta nko chane kutang Kö pö Tororöt,* kimi nko tïsï nko werkoy nko pikö walaka löwïr, cho pö Yuda nko cho pö Yerusalem, cho mïnkech nko cho echön. Atolapay kusomönö tawungwa löwïr ngal cho kikikir kitapunay pö muma* kikïnyorchï Kö pö Tororöt.

³Kighyongo pöytoghintö atolekïto pchörï akwam muma ompö tawu ECHOTYON lö, orïpöy ECHOTYON arip kirurutkachi löwïr ompö mïkulöwunyi kïmïkul nko söpontanyi kïmïkul, akïcham kïrïp ngal löwïr cho kikikir kitapunoni pö muma. Kïcham pïchoni löwïr kïrip mumanoni.

⁴Atolapay kïmwochï Yosia Ilkia Tïsin nyo Wow* nko tïsï walaka cho mïnkech nko pich cho kiripöy kuka Kö pö Tororöt, kuritunö karïn Kö pö Tororöt cho kikighchï Paal* nko Asyera* nko töpogh akïpel tïkuchoni löwïr ompö sanypa kanasyan atolekïtö mpöghoghyo Kidron akïghamït areni akwip kutang Petel.

⁵Akïyon tïsï löwïr cho kikïl pöytoghi Yuda atökïpelchï körostin ompö wölo kïsogho körkeyïntin kanastina Yuda nko woptine walaka cho lekïto Yerusalem nko cho kipelchï Paal köröstin nko asis nko arawa nko töpogh.

⁶Akïsïtunö Asyera Kö pö Tororöt ompö Yerusalem ntökwit mpöghoghyo Kidron akïpela wölini akïghamït areni akïlösyï wölo kïtïpchini pich kïtïkon.

⁷Akurul korïn cho kimi cheporestin ompö Kö pö Tororöt ki atoni wölo kinöpo korï sïro cho koghöch cho kikïkörtegho Asyera.

⁸Atolapay kumïtï tïsï löwïr cho kimi kanastina Yuda akusïmnyon wölo kïsogho körkeyïntin kïngata Kepa ntökwit Persyepa. Kunyar wölo kïsogho körkeyïntin cho kimi kukoti kanasyan cho pö kuka Yoswö nyo kipöytoy kanasyante, nyo kimi okumpö löt ompö kuka kanasyan.

⁹Wölo melö kichömchï tïsichoni kïpka Kö pö Tororöt, wölo kikitö kwam makatin cho puryö mumar nko werkökwa cho le tïsï.

¹⁰Kusïmnyon pöytoghintö Yosia Topet, nyo mi mpöghoghyo werpö Inom ato memï chi kïpela atoni werïnyi anta cheptanyi kïlïkwï ropöwon nyo kitöni tororöt nyo kïkuro Molek.

¹¹Akunategha angoletin cho kingötyï pöytoghi Yuda asis, akïpel angoletine nko nkarinekwa cho kikïpöghisyegho ompö saghatanoni. Kikïrorchï tïkuchoni ato kïlïto Kö pö Tororöt, atolekïtö möngo Natan Melek nyo le wowïn pö lïk.

¹² Atolapay kïngany pöytoghintö Yosia ato kïpelo amörostin cho kitek pöytoghi Yuda pörko kö pö pöytoghin Aas akïngany ato kïpelo amöros cho kitek pöytoghintö Manase ompö woptin odeny ompö Kö pö Tororöt. Kirultö nyinte ato kïpelo amöros akïtörotör akïwirchï mpöghoghyo Kidron.

¹³Kusïmnyon Yosia wölo kïsogho körkeyïntin cho kitek pöytoghintö Solomon kongasispa Yerusalem, okumpö ewu tagh nyo pö kutïng pö Arol nyo kitekyï Solomon pöytoghinto Israel, Astoret, tororöt nyo le korka nyo pö Sidon nko Kemos tororöt pö Moap nko Molek, tororöt pö pipö Amon.

¹⁴Kurultö Yosia pchörino koghïn kïmïnchïrisyö, akïtörotör körkeyïn pö Asyera tororöt nyo le korka akunyïghit otini kighyongo koyo pich.

¹⁵ Kurultö Yosia ngat tïkumwoko Petel nyo kitek pöytoghintö Yeropoam wero Nepat, nyo kigh pipö Israel kwigh ngokï akurul tïkwïl ato kïpelo amöros. Kïpel atoni kïnagh ntökïlïkwï terïtyon akïpel Asyera.

¹⁶Kïlö Yosia awaghaka kïsïwa pïrïmpoti pich cho kimi atoni kïchengunö ko ori akïpela ato kïpelo amöros atökusïmnyon. Kigh nyinte kïgh nyo kinya werkoyon kïngor ato le tagh lö igho

¹⁷Atolapay kïtep pich lö, “Pö ngo mötït nyinö?” Kuyokyï pïchay pö kanasyanta Petel lö, “Möt pö werkoyon nyo kingwïna koro Yuda akï nyinte nyo kingor lö ighisyot tïkuchï keghchinyi ato kïpelo amöros ompö Petel.”

¹⁸Kïmwochï Yosia pïchay lö, “Opïstenökwa kïtöpö lenyoni.” Kïlenyona, melö mi chi nyo kiwösï koyechi, amelö kikïwösï koyo werkoyon nyo kingwïna Samaria.

¹⁹Kirultö nyu pöytoghintö Yosia ato kïpelo amöros nko wölo kïsogho körkeyïntin cho kimi kanastin löwïr cho pö Samaria cho kitek pöytoghi Israel akwigh ECHOTYON kïnarek. Kighchï choni löwïr wölo kida cho kimi Petel.

²⁰Akïpar tïsï wölo kïsogho körkeyïntin löwïr cho kimi wop anka tïkwïl ompö ato kïpelo amöros akïpela koyo pich atoni. Atolapay kïmïla Yerusalem.

²¹Kïmwatïta pöytoghintö Yosia kyam Ichon pö Pasaka ompö könyït nyo pö ECHOTYON Tororötïngwa lenyini kirate kitapu Muma.

²²Ompöwölo möminye Pasaka nyo lata nyoni nyo kökikyam ato le tagh, ompö osiswo pöytoghi Israel anta cho pö Yuda kïngata otini kitor kirwokï kïpayta pipö Israel.

²³Kegh Ichon pö Pasaka ompö könyi 18 ompö paytaghpa Yosia keghchï ECHOTYON ompö Yerusalem.

²⁴Kiyon pöytoghintö Yosia kapolok nko ponï nko chemöwostin nko körkeyïntinekwa ompö koro Yuda nko Yerusalem atökumï pich kïrïp kirurut cho kirote kitapï nyo kinyorchï Tïsin nyo Wow Ilkia Kö pö Tororöt.

²⁵Melö kimi pöytoghintö tawunyi nyo kikarkegh nko nyinte. Kirïp nyinte ECHOTYON ompö mïkulöwunyi kïmïkul nko ompö söpontanyi kïmïkul nko ompö owesyenyi kïmïkul, kïrïp kegh nko kirurut pö Musa, amelö kitökïpusï pöytoghinte anka nyo karkegh nko nyinte.

²⁶Wölo melö kiwonyö nörekyo ECHOTYON nyo kitïng ompö pipö Yuda ompö tïkwïn cho ghach cho kigh Manase atökïnarek nyinte.

²⁷Kïlö ECHOTYON, “Oghchinan pipö Yuda kïgh nyo kyoghchan pipö Israel. Opuktenan chane ompö tawunyan ataghan Yerusalem nko Konyan nyo kyakïlan tökesaghenanïn.”

²⁸Kirote ighisyewut löwïr cho kigh pöytoghintö Yosia kitapu Otöptino pöytoghi Yuda.

²⁹Ki pöytoghinto Misri Neko ompö osiswo Yosia. Kïwö Neko nko piko lïkenyi kïpusta kutang lalwa Yuparet atökungarak pöytoghinto Asirya. Kïwö pöytoghintö Yosia kïporyeghö nyinte ompö Mekido, wölo kepar Yosia ompö poryot.

³⁰Kïsïtyï mötworichi portanyi nkari akwip kutang Yerusalem. Ketïpchï pïrïmpoti pöytoghï. Kïkïl pipö Yuda wero Yoaas wero Yosia kïlïkwï pöytoghin kuker kwanta.

³¹Kitïng Yoaas könyis 23 otini kitor kïpayta, kïpayta aro sömök ompö Yerusalem. Kikuro kame Amutal chepö Yeremia nyo pö kanasyanta Lipna.

³²Kigh nyinte ngokï ompö tawu ECHOTYON le papotïnechi.

³³Wölo kiwonyö paytaghtanyi otini kinam Parao Neko nyinte kïlïkwï mampusyon ompö Ripla, koro Amat atömöpayta ompö Yerusalem akwigh Neko pipö Yuda kïghakta kilen 3,400 cho pö ropïyen nko kilen 34 cho pö koltin.

³⁴Kwigh nyu pöytoghintö Neko Elyakim wero Yosia kïlïkwï pöytoghinto pipö Yuda kuker kwanta akïwaghach kaynenyi kïkuro Yeoyakim. Kumït Neko Yoaas kutang Misri, kïtöpö wöloni ntökïrapas.

³⁵Kitö Yeoyakim Parao Neko silpa nko koltin, cho kikwagh pipö Yuda lenyini kimwa Parao. Kichenga chi anka tïkwïl kïrïp kegh nko sïkönötengwa.

³⁶Kitïng Yeoyakim könyis 25 otini kilïkwï pöytoghinto Yuda akïpayta könyis taman nko akonga ompö Yerusalem. Kikuro kame Sepida, chepö Pedaya nyo pö kanasyanta Ruma.

³⁷Kigh nyinte ngokï ompö tawu ECHOTYON le papotïnechi.