Read pokoot 2 PÖYTOGHÏ 24 Bible Online

2 PÖYTOGHÏ 24 - pokoot bible

2 PÖYTOGHÏ 24

¹Kipokyï Nepukadnesa pöytoghinto Papilon koro Yuda osiswechoni kipöytoy Yeoyakim. Kïnam Yeoyakim kïlïkwï mötworintenyi ompö könyis sömök, atolapay kïtagh Yeoyakim nyinte.

²Kïyonta ECHOTYON söpïchu Papilonia nko cho pö Sirya nko cho pö pipö Moap nko cho pö pipö Amon kïpa kïporyeghö Yeoyakim atökunyar koro Yuda kïrïp kegh nko ngölyonto ECHOTYON nyo kimwa ompö mötworichi werkoy.

³Kigha lenyoni ompö pipö Yuda kïrïp kegh nko ngölyonto ECHOTYON atökupuktö chane ompö tawunyi, ompö ngokï löwïr cho kigh pöytoghintö Manase,

⁴kipar nyinte pich cho kipuryö lelut kuyintegha kisön ortïna Yerusalem. Melö kimï ECHOTYON kïlöstoghchï Manase ompö ngokichoni.

⁵Kirote ighisyewut löwïr cho kigh Yeoyakim kitapu “Otöptino osiswo pöytoghi Yuda.”

⁶Kïrapas Yeoyakim, kuker werïnyi Yeoyakin kïpayta.

⁷Melö kitökïsetyï pöytoghinto Misri ngat, ompöwölo kökikïcheng pöytoghinto Papilon kore wölo kipöytoy pöytoghi Misri kïngata lalwa Yuparet ntökwit rotyo ewu löt nyo pö sörömu koro Misri.

⁸Kitïng Yeoyakin könyis 18 otini kitor kïpayta Yuda. Kipayta aro sömök ompö Yerusalem. Kikuro kame Neusta chepö Elnatan nyo pö Yerusalem.

⁹Kigh nyinte ngokï ompö tawu ECHOTYON le paponyi.

¹⁰Kisetyï Yerusalem osiswechoni pich cho pö lïk cho kiyonï Nepukadnesa pöytoghinto Papilon, kïpka akurich kanasyantanoni.

¹¹Kungwïn Nepukadnesa ntökwitï kanasyantanoni kirik pikachi pö lïk.

¹²Nyini kisïwa Yeoyakin pöytoghinto Yuda lenyoni, kutö kegh nko kame nko pich cho kipöghisyechini nyinte, mori Nepukadnesa, pöytoghinto Papilon. Ki könyi mut nko sömök nyo pö paytaghtanyi atoni kinam Nepukadnesa nyinte kïlïkwï mampusyon

¹³akïcheng kïgh anka tïkwïl nyo kimi kaplawachpa Kö pö Tororöt* nko cho kimi kö pö paytagh akwip kutang Papilon kïrïp kegh nko ngölyonto ECHOTYON nyo kimwa akïtörotör kari koltin cho kigh pöytoghintö Solomon atökepöghisyeghö ompö Kö pö Tororöt.

¹⁴Kïrang Nepukadnesa pipö Yerusalem löwïr nko pipö ka pöytoghin löwïr nko pich löwïr cho kile nyökon. Ki ngata chane löwïr pich 10,000. Kikïl pich cho kile tïngon ompö ighisyeghut nko kitongï, wölo kipïsyï mey opïn koro Yuda.

¹⁵Kimït Nepukadnesa Yeoyakin le mampusyon kutang Papilon nko kame nko koruchi nko kirwokotichi nko kintöghoghi koro Yuda.

¹⁶Kirang Nepukadnesa pich löwïr cho le nyökon, pich 7,000 nko cho le tïngon ompö ighisyeghut nko kitongï 1,000, pich löwïr cho owesöch akimuköy kïpetöy poryot. Kïrang pöytoghintö Nepukadnesa kutang Papilon.

¹⁷Atolapay kwigh Nepukadnesa Mataniya werto ompö Yeoyakin kïlïkwï pöytoghinto Yuda akïwaghach kaynenyi kïlïkwï Sedekia.

¹⁸ Kitïng Sedekia könyis 21 otini kitor kïlïkwï pöytoghinto Yuda, kïpayta könyis taman nko akonga ompö Yerusalem. Kikuro kame Amutal chepö Yeremia nyo pö kanasyanta Lipna.

¹⁹Kigh Sedekia ngokï ompö tawu ECHOTYON le pöytoghin Yeoyakim.

²⁰Kïnörekyï ECHOTYON tya pipö Yerusalem nko cho pö Yuda akïyona chane tawunyi.