Read pokoot 2 PÖYTOGHÏ 25 Bible Online

2 PÖYTOGHÏ 25 - pokoot bible

2 PÖYTOGHÏ 25

¹Kingwïn Nepukadnesa nko pikachi löwïr cho pö lïk atökïporyeghö Yerusalem asis nyo pö taman nyo pö arawa taman nyo pö könyi mut nko angwan nyo pö paytaghpa Sedekia. Kurich kanasyantanay kuwit akïtek nayat nyo kïghïpo.

²Kurich nyu kanasyantanoni ntökwit könyi taman nko akonga nyo pö paytaghpa Sedekia.

³Nyini kitïta asispa mut nko angwan nyo pö arawa angwan kïngwanit kömöy lakat. Melö kitökïmi kïgh nyonikïny nyo kingötï nyo kikyomöy.

⁴Kïngany pïchay nayatu kanasyantengwa, kïrkegh kimi pipö Papilonia kuriköy chane. Kuperta pöytoghintö nko piko lïk löwïr oghökwen, kipa akuwer or nyo kikwen nïyetwo odeny nyo lekïto para pöytoghin akupertoy kutang mpöghoghyo Arapa.

⁵Wölo kïrïp pipö lïko Papilonia pöytoghin Sedekia ntökïnömchï mpöghogh nyo lekïto Yeriko, kïtoyö piko lïkenyi.

⁶Kenam Sedekia akemït wölo mi pöytoghinto Papilon ompö kanasyanta Ripla. Kurwokyineghö Nepukadnesa nyinte wöloni.

⁷Kepar werpö Sedekia kïsïwïyi nyinte akeködötï konyichi akerata nyinte sïrïmtin akemït kïwö Papilon.

⁸Kïlït Nepusaradan nyo kiwowö pipö lïk kanasyanta Yerusalem, arawa mut nko odeny könyi 19 nyo pö paytaghpa Nepukadnesa nyo pö Papilon.

⁹Akïpel Kö pö Tororöt nko kö pö pöytoghin nko korïn löwïr cho pö Yerusalem nko kö anka tïkwïl nyo ki wow.

¹⁰Akïngany nïyetwo kanasyanta Yerusalem lïko Papilonia nyo kighyongchini ripinto pöytoghin.

¹¹Kïrang Nepusaradan pich cho kidong kanasyantanay nko söpïch pö pich cho le tïngon nko cho kökikupertegho pöytoghinto Papilon.

¹²Wölo kipïstö pich ompö Yuda cho le mey atökumï kïrip pareni sapipun akïngor.

¹³Kïrïngarïng pipö Papilonia pchörino kari taghoy cho kikïteka Kö pö Tororöt kïlïkwï mïnchïran akunyar ngarpïlu taghoy nyo wow nko nkari nyo pö taghoy nyo kimi köyoni. Atolapay kwip karichoni pö taghoy löwïr kanasyanta Papilon.

¹⁴Akwip tören nko kichiken nko tïkwïn cho kikipukuno ato kïpelo amöros nko karïn löwïr cho pö taghoy cho kikïpöghisyegho ompö Kö pö Tororöt.

¹⁵Kip wowïn pö lïk kïgh anka tïkwïl nyo kikigha koltin anta silpa, tïwan nko kapempoy cho kikipo ma.

¹⁶Ki nïkisöch pchörinechoni le odeny nko ngarpïlu nko ngöcherwe cho kighchï pöytoghintö Solomon Kö pö Tororöt, nyo melö kikimuköy ntökepim.

¹⁷Ki karkegh pchörinechoni kwodeny, ki ngata miten mut nko sömök koghïntö akikïmina möt adïkïsyonto taghoy nyo ngata miten odeny. Akesïlö makumanka* taghoy kuwitwit.

¹⁸Kumït Nepusaradan nyo kile wowïn pö lïko Papilon, Saradan kïrat kïlïkwï mampustin ompö Seraya Tïsin nyo Wow* nko Sepania tïsinte anka nyo rïptoy nyinte nko pikö walaka sömök cho echön cho kiripöy kuka Kö pö Tororöt.

¹⁹Akumït chi ompö kanasyan nyo ki wowö pipö lïk nko pich mut cho kile kiruri pöytoghin cho kikïnyorchï kanasyan, kimi kikirinto wowïn pö lïk nyo kikiröy pich walak 60 cho kirumunote.

²⁰Kïrang Nepusaradan nyo kile wowïn pö ripi pïchoni löwïr wölo mi pöytoghinto Papilon Ripla.

²¹Kïmuny pöytoghinto Papilon chane ompö Ripla koro Amat atolapay kepar. Kïlenyona kerang nyu pipö Yuda korengwa akegh kïlïkwï pïnot.

²²Kwigh Nepukadnesa pöytoghinto Papilon Kedalia wero Aikam kuköto Syapan kïlïkwï kirwokinto pipö Yuda cho kingötï.

²³Nyini kilïm lenyoni wowïntino lïk nko pipö lïk löwïr lö kakïl pöytoghinto Papilon Kedalia kïlïkwï kirwokin, kïpa Mispa wölo mi Kedalia. Wowïntinechoni kï: Ismael wero Netania nko Yoanan wero Karea nko Seraya wero Tanumet nyo kingwïna kanasyanta Netopa nko Yesania nyo kingwïno Maaka.

²⁴Kuwolwolchï Kedalia wowïntinechay lö, “Mawagh yetïntino Papilonia. Amangakwa kore opöghisyechï pöytoghinto Papilon. Köromöchitu ngala ompö akwa.”

²⁵Wölo kïwö Ismael wero Netania, kuköto Elisyama nyo kipö ara paytagh kutang Mispa nko pich taman, akïpar Kedalia nko pipö Yaudi nko Papilonia cho kimi tïkwïl Mispa.

²⁶ Kïpa pïchay löwïr cho mïnkech nko cho echön, kïmi nko wowïntino lïkos kutang Misri, ompöwölo kiwagh pipö Papilonia.

²⁷Otini kitor Epilmerodak kïpayta Papilon kusyonchï Yeoyakin pöytoghinto Yuda akutyokunö chela asispa 27 nyo pö arawa taman nko odeny ompö könyi 37 nyo pö pïnotön.

²⁸Kïngalan nko nyinte nyo karam ompö chomnyogh akutö nyinte ngachar nyo wow kïtïl pöytoghï walaka cho kimi pïnotön nko nyinte ompö koro Papilon.

²⁹Kïlenyona, kïngwïsta Yeoyakin sïrokachi cho kiloköy otini kitö kï mi chela akïwö kwomisyö ompö kö pö pöytoghin osiswechoni löwïr.

³⁰Aketö nyinte kïgh anka tïkwïl nyo kimököy otini kitökïsöpöy.