Read pokoot 2 PÖYTOGHÏ 3 Bible Online

2 PÖYTOGHÏ 3 - pokoot bible

2 PÖYTOGHÏ 3

¹Kilïkwï Yeoram wero Aap pöytoghinto Israel ompö könyi 18 nyo pö paytaghpa Yeosyapat pöytoghinto Yuda, kïpayta könyis taman nko odeny ompö Samaria.

²Kigh nyinte ngokï ompö tawu ECHOTYON, wölo melö kikarkegh ghöyityenyi nko nyo kipö kwanta anta kame Yesepel, ompöwölo kirultö körkeyïn nyo kigh paponyi atökesagha Paal.*

³Wölo kikarkegh nyinte nko pöytoghin Yeropoam wero Nepat nyo kinya kïpayta, akwigh pipö Israel kwigh ngokï.

⁴Kipöghöy Mesya pöytoghinto Moap kechir, akimi kïropchini pipö Israel köny anka tïkwïl wara kechir 100,000 nko puto kechir 100,000.

⁵Wölo otini kima Aap pöytoghinto Moap, kïchuniö Mesya pöytoghinto Moap nko nyo pö Israel.

⁶Kïweghö pöytoghintö Yeoram panini Samaria akïghamït pikachi cho pö lïk löwïr

⁷Akïyonta chi wölo mi pöytoghintö Yeosyapat nyo pö Yuda kïlenchï, “Köchuniö pöytoghinto Moap nko ani, ingwïnenyi kepete tökeporyenö nko nyinte?” Kuyokyï pöytoghintö Yeosyapat lö, “Owöy ongwïnan, omitan kïpsach okoninyi kingörokut anka tïkwïl, cheku piköchan nko angoletine.

⁸Ekepetöy or ne otini kïsetöy?” Kuyokyï Yeoram lö, “Kïrïpecha aranay low weröy surkwen pö Edom.”

⁹Kïset nyu pöytoghintö Yoram nko pöytoghichay pö Yuda nko Edom. Otini kipa chane ompö osis mut nko odeny, kïrörchï pögh chane nko angoletinekwa tïkwïl.

¹⁰Kïrir pöytoghinto Israel lö, “Ne nyarïlta nyï, kighöy ne ye nyu? Kemïtwecha ECHOTYON so wölete atökuwanyecha pöytoghinto Moap?”

¹¹Kïtep pöytoghintö Yeosyapat lö, “Möminye so werkoyonto ECHOTYON nyo muköy kïmwowecha kïgh nyo kighöy?” Kuyokyï yetïntö anka nyo pö pipö lïko pöytoghin Yoram lö, “Mi yete Elisya wero Syapat, akï nyinte nyo kingöroköy Eliya.”

¹²Kuyokyï pöytoghintö Yeosyapat lö, “Werkoyonto man nyinte!” Kïlenyona kïpa pöytoghichay kï sömök wölo mi Elisya.

¹³Kïlenchï Elisya pöytoghintonay pö Israel, “Ongörokinyi nyo pö ne? Wïyö tepa werkoyiko papongu nko cho pö yongu?” Kuyokyï Yoram lö, “Ewo! Nyinte ECHOTYON nyini ketuyecha kï sömök atökuwanyecha pöytoghinto Moap.”

¹⁴Kuyokyï Elisya lö, “Kïle ato söpöy ECHOTYON nyo opöghisyechinan, ntömökï Yeosyapat pöytoghinto Yuda nyo okonyïtan, melö kötö otuyenan nko nyi!

¹⁵Kïlenyona, amïtwanïn chi nyo le tumin.” Otini kitor tumintonay kïpït pïkantinyi, kungwïnchï Elisya kuti ECHOTYON

¹⁶nyo kilenchï, “Mwoghöy ECHOTYON lö, ‘Awasa kori pöghon kïghömï lalwanete kitenya pögh.

¹⁷Ompöwölo, kïrkegh mosïwïyekwanye yomöt anta rop, wölo nyïghiti pögh lalwanoni cho ogheghekwa nko kyakikwo!’ ”

¹⁸Atolapay kulet tagh Elisya kïlö, “Melö awes nyoni ompö ECHOTYON, konokwa nyinte owesyö ngat nyo orïntegho pipö Moap.

¹⁹Orïntokwa kanastinekwa löwïr cho kikïtek nöyet nko kanasyan anka tïkwïl nyo karam atörökwa ket anka tïkwïl nyo karam atïpökwa kö pö pögh anka tïkwïl atïpchï koghïn korengwa wölo akwagh.”

²⁰Asïyechu ato teno atay kïroptoy amörostin kirotuno pögh okumpö Edom kïnyïghï koronay!

²¹Nyini kilïm pipö Moap lö kipus pöytoghichoni kï sömök korengwa atökïporyeghö chane, kïkur pich löwïr cho kimuköy kïporyö, kïngata nyo wow tya ntökwit nyo mïnïng aketö chane kusyepisyeghö rotyo korengwa.

²²Kïlö kïnget ato le asïyech, kiköryol asis pögh kïpïröchitu le kisön!

²³Kïlö chane, “Heywey! Kipka kisön! Töptoy kiporyö pöytoghichay akïpar kegh chane! Kepe nyu kechenga tïkukwa ompö wölini le möngengwa!”

²⁴Wölo otini kitïta chane wölay le möngot, kïporyeghö pipö Israel chane kiryagh ompö tawungwa. Atolapay kulet tagh pïchay pö Israel kïparata pipö Moap ntökwit korengwa.

²⁵Kunyar kanastin akïwirchï chi anka tïkwïl koghïn kor wölo akwagh ntökulum akïtïpö koghïn kori pöghon löwïr akïtör keti akwa löwïr, kïpoto kanasyanta Kirareset nyo kingötï, wölo ato mi löt kïporyeghö nyoni tïkwïl.

²⁶Nyini kisïwa pöytoghinto Moap lö kikerïnta pipö lïkenyi, kumukyï nko pikachi 700 cho tïng chokon lö kïlïtöy kwenu pungkökwa tökepe ketuyenö nko pipö pöytoghinto Sirya wölo kupöl.

²⁷Kïcheng werïnyi nyo le poret nyo kikeröy nyinte kïpöytoy akïropta ompö kanasyan sany kïlïkwï amöros nyo kïpelöy ompö tororöt pö Moap. Kwotyö pipö Israel nyoman ompö kïyoni kigh nyinte kuyodegha kegh kanasyantanay kutang korengwa.