Read pokoot 2 PÖYTOGHÏ 5 Bible Online

2 PÖYTOGHÏ 5 - pokoot bible

2 PÖYTOGHÏ 5

¹ Kikonyïtöy pöytoghinto Sirya Naaman nyoman, nyo kile wowïn pö pipö lïkenyi. Ompöwölo kitö ECHOTYON rïntagh pipö Sirya ompö nyinte. Ki chi nyinte nyo kile nyakan nyoman, wölo kyamate psenkwet.

²Kiset asistanka pipö Sirya koro Israel akïnam työ nyo kingwïn kïlïkwï chepö monïng ompö kö pö Naaman.

³Kïlenchï chepay asistanka koko Naaman, “Ntökökwö hi echotyontenyan Samaria wölo mi werkoyon, kötösöpöy nyinte ompö sömewonï!”

⁴Nyini kilïm Naaman lenyoni, kïwö wölo mi pöytoghintenyi akïmwochï ngalechay kamwa chepay,

⁵akïlenchï pöytoghintonay, “Wïyö wölo mi pöytoghinto Israel aipchï palalyantanï.” Kïlenyona kutor Naaman pantanyi. Akwip ropöwo ropïyen cho kïkuro talanta cho kingata olyengwa ropïyeni silpa cho le 30,000 nko ropïyeni koltin cho le 6,000 nko sïro taman cho kiloköy.

⁶Kilentöy palalyantanoni kikikirchï pöytoghinto Israel, “Komwowunyi ompö palalyantanï lö, chichï ipu kï mötworintenyan nyo kïkuro Naaman. Omökan sopönyi nyinte ompö sömewononi pö kagh.”

⁷Nyini kisomön pöytoghinto Israel palalyantanay, kïkarer sïrokachi ompö nörekyö akïlö, “Kalïkwan so Tororöt nyo tïghöy akusopöy tökïlenchanïn pöytoghintonï pö Sirya sopö chichï? Arose wölo yöro kong kïporyot nko ani.”

⁸Nyini kilïm chi pö Tororöt Elisya lö kikarer pöytoghinto Israel sïrokachi, kïyonta chi wölo mi nyinte kïlenchï, “Kölö ne tekareranyi sïroköku? Yonunö chichoni wölï omitan atökunkïtï lö mi werkoyon koro Israel!”

⁹Kïwö nyu Naaman nko angoletinechi nko nkarinechi akughyongö kuka kö pö Elisya.

¹⁰Kïyonata Elisya chi nyo kiwö kïlenchï Naaman, “Wïyö wunenö kegh lalwa Yordan kïnyïl mut nko odeny atesöpö aitïlilitï.”

¹¹Wölo kïwö Naaman ompö nörekyö akïlö, “Kononan lö kötengwïnöy ompö wölo omitan atökïsagh ECHOTYON Tororötïnyi, akuwiswisö ewunyi yete omitan atökusopanïn!

¹²Melö so karamach pögho lalwatïna Damaska nko Apana nko nyo pö Parpar kïtïl pögho lalwatïna Israel? Kwompö ne tömowunan kegh lalwatïnechoni atosöpön?” Kïlenyona kïwaghaka akïwechï kegh ompö nörekyö.

¹³Wölo kïpa mötworichi kïrich nyinte akïlenchï, “Echotyon, antökömwowunyi werkoyontonini kïgh nyo wow, melö so keghenyi? Kï gha ne ato iwenyi iwun kegh lenyini kamwa nyinte atesöpö?”

¹⁴Kïlenyona kïwö Naaman akïröytö lalwanay pö Yordan akilït pögh kïnyïl mut nko odeny, lenyini kimwochï Elisya, kïsöpö nyarïltanyi akïwaghaka portanyi kïkarkegh nko nyo pö monïng nyo mïnïng.

¹⁵Kïmïla nko pikachi löwïr wölini kimi Elisya akïlenchï, “Kosöwan ye nyu lö möminye tororöt ngwïny kïmïkul kïpoto koro Israel, kïlenyona, chenga ropöwon nyo okoninyi.”

¹⁶Wölo kuyokyï Elisya lö, “Mochenganye ropöwon kwamanïn Tororöt nyo opöghisyechinan.” Kïlö asaghsagh nyinte, kïtagh.

¹⁷Kïlenyona kïlö Naaman, “Ato ketaghanyi ropöwontenyan, kanya kekonïn nyïngwïny cho kösönöy sïkïröy odeny ompöwölo kïngata ye melö toropchinan tororöt anka tïkwïl ropöw cho kïpelöy anta amörostin, kïpoto ECHOTYON.

¹⁸Kïlenyona oghonan lö löstoghwanïn ECHOTYON ato onomnyotan nko pöytoghintenyan otini wetöy nyinte koto tororötïnyi Rimon, tororöt pö pipö Sirya atökïsagha wöloni. Oghönan nyoman lö löstoghwanïn ECHOTYON!”

¹⁹Kïlenchï Elisya, “Wïyö ompö kalya.” Kïwechï kegh Naaman. Wölo otini kiwö nyo tangogh,

²⁰kunan mötworinto Elisya Keasi ompö mïkulöwunyi lö, “Atï köpïstö echotyontenyan Naaman kïwö kwïle mökonï kïgh! Ompö ne tömöchenga chichini pö Sirya kïgh? Ompö ECHOTYON nyo söpöy, orïpan nyinte atachengan nyinte kïgh.”

²¹Kïlenyona kïrïp Keasi Naaman. Nyini kisïwa Naaman chi nyo kirïpu nyinte, kïrokunö nkarinyi akïtarok, akïtep lö, “Mi kïgh nyo gha nya?”

²²Kuyokyï Keasi lö, “Ewo, wölo köyonwanïn Elisya tomwowunyi lö kapka werpö werkoy odeny cho kapkana koro kutïngkoti Epraim, nyo möcheninyi ye nyu nyinte ropïyeni silpa cho le 3,000 nko sïro odeny cho pïchighöch cho kitöni chane.”

²³Kuyokyï Naaman lö, “Chenga silpa 6,000, kïrötyï ropïyenichay mïlot odeny akutö Keasi nko sïrochay pïchighöch le odeny akïyonta mötworichi odeny cho kikösönöy kuntöghoghchï Keasi.”

²⁴Akwotini kitïta chane kutïngay kimi Elisya, kïchenga Keasi mötworichay mïlotwechay akwip kutang konyi. Atolapay kïmwochï mötworichay pö Naaman kïmïlonchö.

²⁵Kïwö nyinte kïlït kö wölo kimi Elisya, kïtep Elisya lö, “Ingwïnonyi onö nya Keasi?” Kuyokyï lö, “Melö mi wölo kowan.”

²⁶Wölo kïlenchï Elisya, “Komitan nko nyi ompö mïkulögh otini kirökunö chi nkarinyi akungwïn kitarokinyi. Kalïkwï so ye nyo kïtoköy ropïyen nko sïro nko pareni arol nko pareni sapipun nko kechir nko eghin nko mötworï cho le mïrön nko tipïn?

²⁷Kïlenyona ye nyu, nöminyi sömewo Naaman akïnam moneku kokay!” Nyini kiweghö Keasi tawunyi, kïnam sömewonay nyinte kïrelit por lönga.