Read pokoot 2 PÖYTOGHÏ 7 Bible Online

2 PÖYTOGHÏ 7 - pokoot bible

2 PÖYTOGHÏ 7

¹Kïlö Elisya, “Atera ngölyon nyo mwoghöy ECHOTYON lö, kyoltegho ompö ara Samaria ato teno nyete asïyech kilen sömök cho pö pïsya anta kilen mut nko akonga cho pö matay ompö ropïyon akonga nyo pö silpa!”

²Kïlenchï wowïnay kitigho kegh pöytoghintö chichay pö Tororöt, “Möminye kïgh nyo lata nyoni nyo igho, kïrkegh kölentöy ECHOTYON oropönuno pögh yïm panete!” Kuyokyï Elisya lö, “Isïwïyenyi, wölo melö iyomenyi omisyononi.”

³Kimi nyu atoni pich angwanï cho kyamate psenkwet cho kitïpisot kuka kanasyanta Samaria, kïtep kegh chane lö, “Kïtïpisot so yete ntökemeghö?

⁴Ato kïlecha kïlïtöy kanasyan kïpörecha kömöy, ato kilö tïkwïl ato kïlecha kïtïpisot yete kemeghsocha, kïlenyona kepe kewonyechinö wölo mi lïko pipö Sirya. Nyo ato kesyonchech kesöpchö, ato parecha kewonyö.”

⁵Kïlenyona kïnget pïchay nyini le kiwasan akïpa ntökwit möngonay pö lïko pipö Sirya, kïlö kitomtö puryö chi nyonikïny!

⁶Ompöwölo kigh ECHOTYON lïko Sirya kïwir choghïn, kïlïm kighumöto nkaritin nko angoletin cho kiryöwu. Kutam nyu pïchay pö lïko pipö Sirya lö, manan kiwö pöytoghinto Israel kïsom pipö lïko pipö Ititi nko nyo pö pipö Misri kïpka kïporyeghenecha.

⁷Kïlenyona kupertoy pïchay pö lïko pipö Sirya nyini le kiwasan akïpïstö emenikwa nko angoletine nko sïkïröyikwa akïpïstö möngengwa lenyini kimi atökïsörï kegh.

⁸Nyini kitïta pïchay kyamate psenkwet sörömu möngonay, kïlït ema akonga, akwomisyö akïgheghsyö. Atolapay kwip silpa nko koltin nko sïro akïpa kïwïny akïmïlisyö ngat kïlït eme nyo pö odeny. Kïcheng tïkwïn akïpa kïwïny.

⁹Ato mi löt kïmwochinchö lö, “Melö kakighacha kïgh nyo karam. Pö asisï lökoy cho karamach. Amelö, karam kesisyenöcha! Itwecha nyarïl ato kïsisyecha ntökïyech. Kepe nyu lawel kemwochinö wowïntino pöytoghin.”

¹⁰Kïpa nyu akïmwochï ripi kukoti kanasyanta Samaria lö, “Kakïpecha möngonay pö lïko pipö Sirya, kelecha kitomtö puryö chi nyonikïny, amelö kikïlïmacha kuti chi, poto angoletine nko sïkïröy cho rötote, akïmi emenikwa le otini kipïstö chane!”

¹¹Kïmwochï ripichay lökoyechoni wowïntino pöytoghin.

¹²Kïnget pöytoghintö oghö akïlenchï mötworichi, “Omwowokwa ye nyu kïgh nyo kenan lïko pipö Sirya atökwigh! Nkït chane lö kyamecha kömöy nyoman, nka nyoni köpïstö möngengwa akïpa kïghïpcheghö wölo le wuw. Nonöy chane lö töptoy kïpïstocha kanasyantenyo akepa keyarata omisyö, atökïpka chane kïnamecha kesöpchone akïlït kanasyante.”

¹³Kïlö mötworintenyi anka, “Keyontena pich kïpegha angoletin mut ompö chete tökïsöpchote, ompö kanasyan, atökenkïtunö lö ne kitö nyo kegha karkegh pïchï söpchot nko söpïch pö pipö Israel chay kewonyö.”

¹⁴Kïlenyona kïyonta pöytoghintonay pich odeny cho kipegho angoletin atökïpa kuros lïkonay pö pipö Sirya.

¹⁵Kïrïp pïchay ntökwit lalwa Yordan, akwotini kipetöy, kïnyorchï arawet sïro nko karïn cho kilasta pipö Sirya otini kimi kïryoghöy. Kïmïlisyö pïchay kikïyonta akïpa kïmwochï pöytoghin.

¹⁶Kïpa pipö Samaria kïcheng tïkwïn cho kimi möngonay pö Sirya. Kïlenyona kikyaltegha pïsya kilen sömök anta kilen mut nko akonga cho pö matay ropïyon akonga nyo pö silpa, le ato kimwa ECHOTYON!

¹⁷Kutö pöytoghinto Israel wowïn pö lïk nyo kitigho kegh kïrip kuka kanasyan. Kïtyakatyak pich nyinte ompö kukanoni ntökïma le ato kökimwa Elisya otini kiwö pöytoghintö kïtuyö nko nyinte.

¹⁸Kökimwochï Elisya pöytoghin lö, kyoltegho ompö ara Samaria ato teno nyete asïyech kilen sömök cho pö pïsya anta kilen mut nko akonga cho pö matay ropïyon akonga nyo pö silpa,

¹⁹akiyokyï wowïn lö, “Möminye kïgh nyo lata nyoni nyo igho, kïrkegh kölentöy ECHOTYON oropönuno pögh yïm panete!” Kuyokyï Elisya lö, “Isïwïyenyi wölo melö iyomenyi omisyononi.”

²⁰Kighisyö lenyoni ngalechoni, ompöwölo kikïtïka nyinte otini le kumat.