Read pokoot 2 PÖYTOGHÏ 8 Bible Online

2 PÖYTOGHÏ 8 - pokoot bible

2 PÖYTOGHÏ 8

¹ Kökimwochï Elisya kokonanya kigh werïnyi kututï lö, “Ngeta wïyö nko piko kongu atamanga kor nyo ochömekwa atïpï wöloni le pïnot, ompöwölo konu ECHOTYON kömöy ompö könyis mut nko odeny.”

²Kïrïp kokononi ngalechoni akïwö kïmang koro pipö Pilisti nko piko konyi ompö könyis mut nko odeny.

³Otini kiwonyö könyiswechay le mut nko odeny, kïmïla ngat kokonay koro Israel akïwö wölo mi pöytoghintö akïrirchï nyinte ketö konyi nko parenyi.

⁴Kwitï kamanay mi pöytoghintö kïngölonöy nko Keasi, mötworinto Elisya. Kimököy pöytoghintö kunkïtu ngal cho pö töngönchin cho kigh Elisya.

⁵Otini kimi Keasi kwomchini pöytoghin wölo kimï Elisya ntökwigh karöchïnin nyo kökima kututï, kwitï kokonay kigh Elisya werïnyi kututï akïtep nyinte ketö konyi nko parenyi. Kïlenchï Keasi pöytoghintonay, “Anyï kokonanya mi nko werïnyi nyay kigh Elisya kututï!”

⁶Kïtep pöytoghintö kokonay lö, “Nyoman ngalechoni nya?” Kïwöghökwï lö, “Lecha choni.” Kïlenyona kïkur pöytoghintö wowïn akonga akïlenchï, “Iyokyï kokonï tïkuchi löwïr cho kitïng nko tïkwïn cho kipkana parenyi ompö könyiswechoni le mut nko odeny.”

⁷Kiwö Elisya Damaska ato kichirate Pen Adad pöytoghinto Sirya. Nyini kilïm pöytoghintö lö kimi Elisya wöloni,

⁸kïlenchï Asael, “Ipö ropöw aiwö itö chi pö Tororöt aimwochï nyinte kïtepï ECHOTYON lö etosöponan kichïrnï?”

⁹Kïlenyona kïrany Asael tamasay tömönut angwan cho kösönöy kïgh anka tïkwïl nyo karam nyo pö Damaska akïwö wölo mi Elisya. Nyini kituyö Asael nko nyinte kïlenchï, “Köyonwanïn mötworintengu pöytoghintö Pen Adad atatepinyi lö tepunenö ECHOTYON lö etökïsopo nyinte kichir nyo tïng?”

¹⁰Kuyokyï Elisya chichay lö, “Wïyö mwochinö lö söpöy nyinte, wölo kömwowanïn ECHOTYON lö meghöy nyinte.”

¹¹Kuchirchï kong Elisya ntökïlalïyan Asael. Kïlok chichay pö Tororöt.

¹²Kïtep Asael lö, “Kalïkwï ne telokanyi nya echotyontenyu?” Kuyokyï Elisya lö, “Ompöwölo onkïtön tïkwïn cho ghach cho ighchinenyi pipö Israel, ipelonyi ma nïyetwekwa cho wïnyo kegh aipar mïrönkökwa ainyaknyaka tengonkökwa ghatoy aikarer mutïno korukwa cho mirsïyi!”

¹³Kïlö Asael, “Ochan ne nya kukïy nyo omuköy ntagh tïkwïn cho teno choni?” Kuyokyï Elisya lö, “Keporwanïn ECHOTYON lö ilïkunenyi pöytoghinto Sirya.”

¹⁴Kïmïla nyu Asael wölo mi Pen Adad. Nyini kitïta kïtep Pen Adad lö, “Kamwa ne Elisya nya?” Kuyokyï lö, “Kölenchanïn isöpenyi.”

¹⁵Wölo nyini kiyech, kïcheng Asael ananka akulut pögh akuyenö tokochunyi ntökïma. Kuker nyu Asael Pen Adad kïpayta Sirya.

¹⁶Kitor kïpayta Yeoram wero Yeosyapat Yuda ompö könyi mut nyo pö paytaghpa Yoram wero Aap pöytoghinto Israel.

¹⁷Kitïng nyinte könyis 32 otini kilïkwï pöytoghin. Kïpayta könyis mut nko sömök ompö Yerusalem.

¹⁸Kirïp nyinte ara pöytoghi Israel le Aap ompöwölo kip chepö Aap. Kigh ngokï ompö tawu ECHOTYON.

¹⁹Wölo melö kicham ECHOTYON kunyar Yuda akwompö mötworintenyi Daudi, ompöwölo kiyomis lö lïku nyinte nko monechi pöytoghï kokay.

²⁰ Kïpeny pipö Edom paytaghpa Yoram pöytoghinto Yuda, akïkïl pöytoghintengwa.

²¹Kïwö pöytoghintö Yoram kwoghyö nko lïkenyi löwïr lö toporyeghö kanasyanta Sair, wölo kurich lïko pipö Edom chane. Kïnget oghökwen nko wowïntino lïkenyi akïpar pipö Edom cho kökikurik nyinte, wölo kïpïstö lïkenyi nyinte akupertoy kutang kestonikwa.

²²Kïlenyona kïpesyö pipö Edom nko pipö Yuda kïngata atoni nko ye. Kipesyö tïkwïl pipö kanasyanta Lipna.

²³Kirote ighisyewut löwïr cho kigh pöytoghintö Yoram kitapu Otöptino pöytoghi Yuda.

²⁴Kïrapas Yoram aketïpchï kanasyanta Daudi, kuker werïnyi Aasia kïpayta.

²⁵Kitor Aasia wero Yeoram kïpayta Yuda ompö könyi taman nko odeny nyo pö paytaghpa Yoram wero Aap pöytoghinto Israel.

²⁶Kitïng Aasia könyis 22 otini kitowï kïpayta. Kïpayta ompö Yerusalem köny akonga. Kikuro kame Atalia kuköto Omri pöytoghinto Israel.

²⁷Kïrïp Aasia tïkwïl ara pöytoghin Aap kwigh ngokï ompö tawu ECHOTYON, ompöwölo kip Aasia chepö ka Aap.

²⁸Kïwö pöytoghintö Aasia nko pöytoghin Yoram nyo pö Israel kïporyeghö Asael pöytoghinto Sirya ompö ato kïkuro Ramot Kiliad, kekotön Yoram ompö atoni.

²⁹Atolapay kïmïla pöytoghin Yoram kanasyanta Yesrel atökïsarar moyokachi chay kikotön pipö Sirya ompö Rama otini kiporyot nko Asael pöytoghinto Sirya. Kïwö Aasia wero Yeoram pöyoghinto Yuda, kura nyinte otini kikasate.