Read pokoot 1 OTÖPTINO OSIS 12 Bible Online

1 OTÖPTINO OSIS 12 - pokoot bible

1 OTÖPTINO OSIS 12

¹Kipa pich walaka cho owesöch cho kingarak Daudi ompö poryot wölo kimi nyinte ompö Siklak, wölo kiwö kïwïnchï kegh akwompö pöytoghin Saulö,

²pich cho kipö ara Penchamen, tïlyayi Saulö. Kiwutïtoy chane kotï akïwirtegho koghïn porköy ompö ewune kwodeny.

³Kintöghoghintengwa kï Aieser nko Yoas, chane kwodeny kï werpö Syema nyo pö Kipea. Chï kï piko lïk: Yaasiel nko Pelet werpö Asmapet Peraka nko Yeu nyo pö Anatot Ismaya nyo pö Kipyon, chi pö lïk nyo oror ompö chay le tömönut sömök akï kintöghoghinte nyinte Yeremia nko Yasiel nko Yoanan nko Yosapad nyo pö Kedera Elusai nko Yerimot nko Pealia nko Syemarya nko Syepatia nyo pö Arip Elkana nko Isyia nko Asarel nko Yo Eser nko Yasyope Am nyo pö ara Kora Yoela nko Sepadia werpö Yeroam nyo pö Kedor

⁸Chï kï pich cho owesöch cho pö ara Kad cho kipa wölo kimi Daudi ompö surkwen, pich cho kinkït kïpöghisyegho longoy nko ngötwö akï lata owesyengwa nyo pö ngötuny aki lata korinyoy.

⁹Chane chï: Eser nko Opadia nko Elyap

¹⁰nko Mismana nko Yeremia

¹¹nko Atai nko Eliel

¹²nko Yoanan nko Elsapad

¹³nko Yeremia nko Makpanai.

¹⁴Pïchete pö ara Kad kï yetïntin cho ghyongchini pich 1,000 nko cho mïnkech cho ghyongchini pich pokol.

¹⁵Chane cho kyoghyö lalwa Yordan arawa tagh otini kitö kuyintoy kunyalta akutoyö pich cho kimi mpöghogh okumpö kongasis nko okumpö ta.

¹⁶Kïpa pikö walaka cho pö ara Penchamen nko Yuda wölo kimi Daudi.

¹⁷Kïwö Daudi kïtarok chane akïlenchï, “Ato kapkanakwa le kongot angarakanïn, kï ochikwa tokote, wölo ato kapkanakwa atö olchanïn pungköchan, kïrökegh motïngetanye ghöyityö nko akwa, akany nyu kïlïkwï Tororöt pö papotïnecho nyo rosu choni akï konok sitöt.”

¹⁸Kïngölonchï mïkulögh Amasay nyo kile kintöghoghinto pïchay le tömönut sömök, kïlö, “Kïchicha cheku Daudi wero Yese! Inyorï köromnyo nko pich cho ngörokinyi, ompöwölo mi Tororöt nko nyi.” Kïtach Daudi chane akwigh kïlïkwï yetïntino pikachi pö lïk.

¹⁹Kïpa pipö Manase walaka kutang wölo mi Daudi otini kingwïnöy nko Pilisti atökïporyeghö Saulö. Wölo melö kingarak nyinte Pilisti, ompöwölo kiwagh pöytoghi Pilisti akïlö, “Töptoy muköy ntökïwaghaka akungarak Saulö yetïntanyi.” Kïlenyona kuyoda nyinte kïwö Siklak.

²⁰Chï kï pipö ara Manase cho kipa wölo mi Daudi otini kimïlo: Adna nko Yosapad nko Yediael nko Mikael nko Yosapad nko Eliu nko Siletay, ki kintöghoghï chane cho pö pich 1,000 ompö ara Manase.

²¹Kintöghoghchï chane pipö lïko Daudi, ompöwölo ki pipö lïk chane cho le nyökon. Ki lïkwï chane ato le lötï yetïntino pipö lïk cho pö Israel.

²²Kitösisyö pich chik cho kingarak Daudi, ntökwawesit lïkenyi tya.

²³Chï kï kiyitut pö pipö lïk cho kipka wölo mi Daudi ompö Epron, atökïwaghach paytaghpa Saulö akutö Daudi kïle ato kimwa ECHOTYON: Yuda: 6,800 cho kitïng longoy nko ngötwö Simion: 7,100 cho kyowesöch ompö poryot Lawi: 4,600 pipö Yeoyada nyo pö ara Aron: 3,700 tïlyayi Sadok, nyo kinkït poryot: 22 cho le kintöghoghi pipö lïk Penchamen nyo pö ara Saulö: 3,000 (kingötï pipö Penchamen cho chang okumpö Saulö) Epraim: 20,800 akï pich cho rumunote ompö artïnekwa Manase okumpö ta: 19,000 cho kikïkïl kïpa kutö Daudi paytagh Isakar: 200 kintöghoghchini pich walaka (kinkït kïgh nyo kimïchini Israel kwigh) Saplon: 50,000 cho kighönote akimi kïpsach kïporyö, kinkït kïpöghisyegho kari lïk löwïr Naptali: 1,000 kintöghoghï nko pich 37,000 cho kitïng longoy nko ngötwö Dan: 28,600 cho kinkït poryot Asyer: 40,000 cho kimi kïpsach kïporyö Rupen nko Kad nko Manase okumpö kongasis: 120,000 cho kipöghisyegho kari lïk löwïr.

³⁸Kipa pïchï pö lïk löwïr Epron, akimi kïpsach kïporyö, ki machatengwa kwigh Daudi kïpayta Israel kïmïkul. Akirïp pipö Israel löwïr ngalekwa.

³⁹Kimpur chane wöloni nko Daudi ompö osis sömök, kyomisïyi akïgheghsïyi, ompöwölo kökikwighchï werkökwa omisyö.

⁴⁰Kipka tïkwïl pöröriskökwa cho pö Isakar nko Saplon nko Naptali, akïrongwï sïkïröy nko tamasay nko nyumpun* nko eghin cho kikösönu pïsya nko makany nko sapipun cho kikiyam nko dipay* nko mwaghpa arol nko tïch nko kechir cho kyomöy. Ompöwölo kimi ngörekyo Israel kïmïkul.