Read pokoot 1 OTÖPTINO OSIS 13 Bible Online

1 OTÖPTINO OSIS 13 - pokoot bible

1 OTÖPTINO OSIS 13

¹Kutuyö Daudi pipö Israel cho kïlote cho kintöghoghchini pich 1,000 nko cho kintöghoghchini cho le 100.

²Atolapay kïlenchï Daudi pipö Israel, “Ato kachamakwa anta ato machata Tororöt, keyonta pich kïkurï piköcho löwïr nko tïsï nko pipö Lawi ompö kanastinekwa, atökïpka ketuyenö tïkwïl.

³Atökepe kepunö Santuku Muma nyo pö Tororöt, nyay kikïsas ompö paytaghpa Saulö.”

⁴Kïcham pich kwigh lenyoni ompöwölo kikaram ngölyontononi.

⁵Kïkur Daudi pipö Israel ompö kore kïmïkul, kïngata rotyo Misri ompö okumpö ewu tagh nyo pö Amat, wölo kïlïto okumpö ewu löt atökesïtunö Santuku Muma Kiryat Yearim kungwïn Yerusalem.

⁶Kïwö Daudi nko pich kutang kanasyanta Paala, nyo mi Kiryat Yearim ompö koro Yuda, atökwipï Santuku Muma nyo pö Tororöt, nyo kïkurtegho kaynata Tororöt nyo mi paytaghtanyi kwenu kerupimtin.*

⁷Kisïtunö Santukunay kö pö Apinadap akutö nkari nyo tökïrel. Aki Usa nko Aio cho kikötöy nkaritö,

⁸kïmi Daudi nko pich löwïr kïnyolöy akïtumchini ECHOTYON ompö owesyengwa kïmïkul. Akitïng pilimpin nko tokigh nko kayampen nko kontin.

⁹Nyini kit chane ghatya pagh nyo mi Kodon kïchityö eghinechay, kïnam Usa Santuku Muma.

¹⁰Kïnyala ECHOTYON ompö Usa akïtagh nyinte ompöwölo kighïtö eghunyi akïnam Santuku Muma, kïmeghchï atoni kamasu Santuku Muma.

¹¹Kïnarek Daudi ompöwölo kötïgh ECHOTYON Usa, kekurö atoni Peres Usa nko nyete le ye.

¹²Kuwagh Daudi ECHOTYON akïlö, “Osïtan nyu lö ne Santuku Muma?”

¹³Melö kitökïsït Daudi nyu santukunay pö kiyomisöt kutang Yerusalem. Wölo kipïsyï kö pö chi nyo kikïkuro Oped Edom, chi pö Kit.

¹⁴Kïtöpö Santuku Muma kö pö Oped Edom aro sömök, kusoyön nyu ECHOTYON nyinte nko katanyi.