Read pokoot 1 OTÖPTINO OSIS 14 Bible Online

1 OTÖPTINO OSIS 14 - pokoot bible

1 OTÖPTINO OSIS 14

¹Kuyoktö Iram pöytoghinto Tiro pich wölo mi Daudi, cho kipöy tarak nko pich le teki korïn, atökïtekyï Daudi katanyi.

²Kïsöwï Daudi lö kikwigh ECHOTYON nyinte kïlïkwï pöytoghinto Israel akïsyol paytaghtanyi ompö pikachi Israel.

³Kwip Daudi ompö Yerusalem kor cho chang, akïnyorï monïng cho chang wor nko tipïn.

⁴Chï kï kaynötut pö cho kikïyichï Yerusalem: Syamua nko Syopap nko Natan nko Solomon

⁵nko Ipar nko Elisyua nko Elpelet

⁶nko Noka nko Nepek nko Yapia

⁷nko Elisyama nko Peliada nko Elipelet.

⁸Nyini kilïm Pilisti lö kakïkïl Daudi kïlïkwï pöytoghinto Israel, kïpa Pilisti kïyar Daudi, kïlïm Daudi, kïwö kïtarok chane atökïporyeghö.

⁹Kïpka Pilisti akupokyï mpöghoghyo Repaim.

¹⁰Kïtep Daudi ECHOTYON lö, “Owan oporyeghö Pilisti? Itöninyi chane morichan?” Kïlenchï ECHOTYON Daudi, “Wïyönyi, otönan chane moriku.”

¹¹Kupokyï Daudi chane ompö Paal Perasim akïrïnta akïlö, “Kepuktö Echotyo pungköchan ompö tawunyan asete, le atay chutöy puseryonta chemuserya.” Kïlenyana kekurö atoni Paal Perasim.

¹²Otini kiryögh Pilisti, kïpïsyï atoni körkeyïntinekwa, kïlö Daudi apela.

¹³Kïpka ngat Pilisti akupokyï mpöghoghyo Repaim.

¹⁴Kïtep ngat Daudi ECHOTYON, kïlenchï, “Mepokyï chane ompö onkunï, wita chane okumpö löt aingwïna okumpö keti Miporsadi.

¹⁵Nyini kelïmanyi kighumöto kelyön ompö paraku ket, ipokyï chane, ompöwölo omitan tawungu atarïntan lïko Pilisti.”

¹⁶Kwigh Daudi lenyini kimwochï ECHOTYON, kïyon Pilisti kïngeta Kipyon ntökwit Keser.

¹⁷Kïrumtö ororyo Daudi ompö wop tïkwïl, akwigh ECHOTYON punton walaka kuwagh Daudi.