Read pokoot 1 OTÖPTINO OSIS 15 Bible Online

1 OTÖPTINO OSIS 15 - pokoot bible

1 OTÖPTINO OSIS 15

¹Kïtekyï kegh kö Daudi ompö kanasyanta Daudi, akïpor wölo kitöni Santuku Muma Tororöt akïparta Ema.

²Atolapay kïlö, “Möminye chi anka nyo sïtöy Santuku Muma kïpoto pipö Lawi, ompöwölo kikïl ECHOTYON chane kïsït Santuku Muma akïpöghisyechï nyinte kokay.”

³Kutuyö Daudi pipö Israel löwïr ompö Yerusalem atökïpa kïsïtï Santuku Muma wölo kikwigh Daudi.

⁴Atolapay kïkur monïngo Aron nko cho pö pipö Lawi:

⁵cho pö ara Koat ompö pipö Lawi kï Uriel nyo kintöghoghchini pikökwa cho le 120,

⁶cho pö ara Merari kï Asaya nyo kintöghoghchini pich cho le 220,

⁷cho pö ara Kersyon kï Yoel nyo kintöghoghchini pich cho le 130,

⁸cho pö ara Elisapan kï Syemaya nyo kintöghoghchini pich cho le 200,

⁹cho pö ara Epron kï Eliel nyo kintöghoghchini pich cho le 80,

¹⁰cho pö ara Usiel kï Aminadap nyo kintöghoghchini pich cho le 112.

¹¹Kïkur Daudi Sadok nko Apyatar ompö tïsï nko pipö Lawi cho le mut nko akonga: Uriel nko Asaya nko Yoel nko Syemaya nko Eliel nko Aminadap.

¹²Kïlenchï pipö Lawi, “Ochikwa kintöghoghi pipö Lawi, ye nyu otïlilö kegh nko pikökwo atosïtunö Santuku Muma nyo pö ECHOTYON Tororöt pö Israel kungwïn wölo kaghan.

¹³Ompöwölo kimosïtukwanye atanye le tagh, kïnyölechecha Tororöt, ompöwölo melö kikïripöcha le wölo kikïmöktoy.”

¹⁴Kutïlil kegh tïsï nko pipö Lawi, atökwipï Santuku Muma nyo pö ECHOTYON Tororöt pö Israel.

¹⁵Kïsït pipö Lawi Santuku Muma nyo pö Tororöt ompö löyoswekwa kïsïtö ket, kïle ato kimwa Musa kïrïp kegh nko ngölyonto ECHOTYON.

¹⁶Kïmwochï Daudi kintöghoghi pipö Lawi kïkïl werkökwa cho tumöy tumwöy akïpöghisyegho pilimpin nko kayampen.

¹⁷Kïkïl pipö Lawi pïchï: Eman wero Yoel nko werïngwa Asap wero Perekia nko Etan wero Kusyaya nyo pö ara Merari.

¹⁸Kïkïl ngat tïlyayikwa atökungarak chane: Sakaria nko Yasiel nko Syemiramot nko Yeiel nko Uni nko Elyap nko Penaya nko Maaseya nko Matatia nko Elipeleu nko Mikneia. Cho kiripöy kukat kï: Oped Emod nko Yeiel.

¹⁹Tumï cho kilïwöy karïn cho silyot kï: Eman nko Asap nko Etan.

²⁰Pich cho kipïtöy pïkantis cho mïnkech kï, Sakaria nko Asyel nko Syemiramot nko Yeiel nko Uni nko Elyap nko Maaseya nko Penaya.

²¹Pich cho kipïtöy pïkantis cho echön kï: Matitia nko Elipeleu nko Mikneia nko Oped Edom nko Yeiel nko Asasia.

²²Kekïl Kenania kïlïkwï kintöghoghinto tumï cho pö Lawi ompöwölo ki tumin nyinte.

²³Perekia nko Elkana nko Oped Edom cho kiripöy Santuku Muma.

²⁴Tïsï cho kikutöy kontï ompö tawu Santuku Muma kï Syepania nko Yosyapat nko Netanel nko Amasay nko Sakaria Penaya nko Elieser. Kilïkwï tïkwïl Oped Edom nko Yeia ripi santukunoni.

²⁵Kïwö Daudi nko kintöghoghi Israel nko yetïntino pipö lïk kutang kö pö Oped Edom kïsïtï Santuku Muma akingörekyote chane tya.

²⁶Kitö chane ECHOTYON amöros nyo pö eghin mut nko odeny nko kechir mut nko odeny ompöwölo kingarak Tororöt pipö Lawi cho sïtöy Santuku Muma.

²⁷Kiloköy Daudi sïra katani, akiloköy tumï tïkwïl nko Kenania kintöghoghintengwa nko pipö Lawi cho kisïtöy Santuku Muma. Akiloköy Daudi epod.*

²⁸Kwipï pipö Israel Santuku Muma Yerusalem akuteghyot ompö ngörekyö, akïkutöy kontin nko kuy nko toasin nko kurerun.

²⁹Otini kikwitï Santuku Muma kanasyan, kurosunö tïrisya Mikal chepö Saulö akïsïwa Daudi ato kidöngonyöy ompö ngörekyö, kïsas nyinte nyoman ompö mïkulöwunyi.