Read pokoot 1 OTÖPTINO OSIS 16 Bible Online

1 OTÖPTINO OSIS 16 - pokoot bible

1 OTÖPTINO OSIS 16

¹Kïsït Santukunay pö Muma akutö Ema nyo kökikïtekyï Daudi. Atolapay kutö ECHOTYON amöros nko ropöwo pöghisyö.

²Otini kiwany Daudi kutötö amöros, kusoyön pich ompö kaynata ECHOTYON.

³Akutö pipö Israel löwïr cho kile kor nko mïron, makatyan nko peny nko sapipun cho kikiyam.

⁴Kïkïl Daudi pipö Lawi cho kintöghoghchini saghat ompö tawu Santuku Muma,* cho kitumöy akïkwolöy ECHOTYON.

⁵Kikïl Asep kïlïkwï kintöghoghinte, kïrïptoy Sakaria nko Yeiel nko Syemiramot nko Yeiel nko Matitia nko Elyap nko Penaya nko Oped Edom nko Yeiel cho kikutöy kurerï, kïpïtöy Asap pïkan,

⁶kïkutöy kontin Penaya nko Yaasiel ompö tawu Santuku Muma.

⁷Kitö Daudi atoni Asap nko pikökwa pö Lawi kïlïkwï cho kwolöy ECHOTYON ompö tumwöy.

⁸Yökinö söro ECHOTYON, aimwatïta ororyenyi, mwochinö punton kïgh nyo kikwigh.

⁹Sala ECHOTYON ompö tum mwatïtena ngala töngonchin cho kwigh.

¹⁰Ngaraka ompöwölo kïchicha chechi nya kïngörekyö chona soghöy nyinte!

¹¹Wïyö wölo mi ECHOTYON atenyorunö kingörokut, sagha nyinte kïtenö osis.

¹²Nana ngala töngönchin cho kikwigh nyinte, nko wölo mutïtöy nyinte kirwokenyi.

¹³Akwa monïngo Apraam nyo le mötworintenyi, akwa monïngo Yakopo nyo le kïlanenyi.

¹⁴ECHOTYON kï Tororötïncha, mi kirwokenyi ngwïny kïmïkul.

¹⁵Mewutyeghö Santukunyi pö kiyomisöt nko ngölyontenyi nyo kimwochï ompö pïnwöy löwïr,

¹⁶Muma* nyo kyam nko Apraam nko ayomis nyo kitö Isak.

¹⁷Kyam ECHOTYON muma nko Yakopo nyo mpuröy kokay.

¹⁸Kilö, “Okonokwa koro Kanan lïku nyinkwa kokay.”

¹⁹Kingor pipö ECHOTYON, ki to chane ompö Kanan.

²⁰Kipestegha chane kor anka ntökwit anka, kïngeta paytagh anka ntökwit anka.

²¹Wölo möchömchïnye ECHOTYON chi kïpïr chane kisyölchï pöytoghï atömöswany chane,

²²akïlenchï, “Maswany piköchan, mapar werkoyköchan!”

²³Tumchinö ECHOTYON ngwïnya kïmïkul! Mwatïtena lökoyechi cho karamach lö kikïsörwecha.

²⁴Mwochinö punton ororyenyi, imwochï pich tïkwïn cho kegh nyinte.

²⁵Wow ECHOTYON nyoman, mïchini kekwol nyinte tya, kïkwolöy kïtïl tororötin walaka.

²⁶Tororötino pich walaka kï körkeyïntin, wölo ECHOTYON nyo kigh yïmwöy.

²⁷Kiwit nyinte konyït nko kimuytaghat, mi wölo mi nyinte ororyö nko ngörekyö.

²⁸Okwolö ECHOTYON pipö ngwïny kïmïkul okwolö ororyenyi nko owesyenyi.

²⁹Kwolö kaynata ECHOTYON nyo oror ipunö tawunyi amöros. Kïtïngö ompö tawu ECHOTYON otini kipörï kegh ompö tïlilyenyi,

³⁰opotonchenö pipö ngwïny ompö tawunyi kikekatkat ngwïny, amökenoteghonye

³¹Ngaraka ngwïnya nko yïm. Mwochinö punton lö, “ECHOTYON kï Pöytoghin.”

³²Pororö nanam nko kïgh anka tïkwïl nyo mi oringu nya kïngarak korö nko kïgh anka tïkwïl nyo mi ori.

³³Tumöy ketï cho mi wuw ompö ngörekyö ompö tawu ECHOTYON, otini kengwïn kïpayta ngwïny.

³⁴Yokyinö sörö ECHOTYON ompöwölo karam, ompöwölo töpo chomnyenyi kokay.

³⁵Mwochinö nyinte lö, “Sörwecha we Tororöt Sörunintencha nyoryecha löwïr aisörunenecha pungköcho atökeyokyinöcha sörö kaynengu nyo tïlil.”

³⁶Kwolö ECHOTYON Tororöt pö Israel. Kwolö nyinte kokay! Kïlö pich löwïr, “Amen!”* Nya kïkwolö ECHOTYON.

³⁷Kutö Daudi Asap nko werkökwa kïpöghisyö ompö tawu Santuku Muma chik.

³⁸Kingörekyö chane Oped Edom nko Yedutun nko werkökwa cho le 16. Kiripöy kukat Osa nko Oped Edom.

³⁹Kipïsï Daudi Sadok nyo le tïsin nko tïsi walaka kïtat ngala saghat ompö Ema nyo mi ECHOTYON* ompö tïkumwoko Kipyon.

⁴⁰Kipelöy chane amöros tökwoghö nko mönon, le wölo kikir ompö kirurut cho kitö ECHOTYON Israel.

⁴¹Mi chane nko Eman nko Yedutun nko pikö walaka cho kikïkïl kïtum akuyokyï sörö ECHOTYON ompö chomnyenyi nyo töpo kokay.

⁴²Kiripöy Eman nko Yedutun tïkwïl kontin nko tasim nko kari walaka cho kïpöghisyegho ato kïtumöy tumwöyi kwolöt. Pipö ara Yedutun cho kikïkïl kïrip kukat.

⁴³Kïwö chi anka tïkwïl katanyi, kïwö Daudi tïkwïl katanyi kumpur nko monechi.