Read pokoot 1 OTÖPTINO OSIS 17 Bible Online

1 OTÖPTINO OSIS 17 - pokoot bible

1 OTÖPTINO OSIS 17

¹Otini kikïmöngisyö Daudi katanyi, asis akonga kuyoktö kut wölo mi werkoyon Natan akïlenchï, “Rose köny lö omöngan kö nyo kikïteka tarak, kï mi Santuku Muma* nyo pö ECHOTYON ema!”

²Kïlenchï Natan nyinte, “Igha lapay cho inonenyi ompöwölo mi ECHOTYON nko nyi.”

³Wölo kïlenchï ECHOTYON Natan aghononi,

⁴“Wïyö mwochinö mötworintenyan Daudi lö, ‘Metekwanïnyinye kö nyo omöngan.

⁵Tömönye amangan kö kïngeta otini kyamïtunan pipö Israel Misri nko nyete le ye, kyomitan omöngöy Ema.

⁶Kimatepanye kintöghoghi Israel cho kyakïlan kïpayta piköchan ompö wop anka tïkwïl nyo kyowestan nko chane lö, ompö ne tömotekwanïkwa kö nyo pö tarak?

⁷“ ‘Mwochinö ye nyu mötworintenyan Daudi lö, kölö ECHOTYON Kimuktoghin, kyamïtuneninyi wuw pö achey ato kiyokwïyenyi kechir telïkuna pöytoghinto piköchan Israel.

⁸Kyomitan nko nyi ompö wop anka tïkwïl wölo kiwetenyi ayonan punköku ompö tawungu. Oghinyi rumunö le pich cho rumunote ompö ngwïny.

⁹Oyörchinan piköchan Israel kor, atökïmang korengwa amökïminye chi nyo susöy chane le atay le tagh.

¹⁰Kïngata otini kokïlchan piköchan kintöghoghï, okonokwa nyu kimïny ompö punkökwo ayomisan lö ghyongöy konkwa.

¹¹Otini kewonyö osiswekwa, aruyekwa nko papotïnekwo, okïlan akonga ompö monekwa kïlïkwï pöytoghin akönyan kughyongöy paytaghtanyi.

¹²Tekwanïn nyinte kö ayomisan lö ghyongöy paytaghtanyi kokay.

¹³Olïkunan paponyi, kïlïkwï nyinte werïnyan. Mochenganye kingörokutyenyan ompö nyinte le ato kyachengan Saulö, nyo kyanateghan ompö tawungu atelïkunanyi pöytoghin.

¹⁴Otönan nyinte kïpayta piköchan nko paytaghtanyan kokay. Ghyongöy paytaghtanyi kokay.’ ”

¹⁵Kïmwochï Natan Daudi ngal löwïr cho kingongchï ECHOTYON nyinte.

¹⁶Kïwö Daudi Ema nyo mi ECHOTYON* akïsagh lö, “Ochan ngo nya ECHOTYON Tororöt ompö kïyï keghwaninyi anta konyan.

¹⁷Akwanyï ye iminyi ighwanïn cho echön tya, keyomisönyi köromnyö ompö koto mötworintengu ompö pïn nyo tökungwïnöy We ECHOTYON Tororöt.

¹⁸Omwowunyi ne ye kïtïl atoni nya ECHOTYON Tororöt ainkïtaninyi akekonyïtaninyi nyo ochï mötworintengu.

¹⁹Ompö kiyomisötengu nko kinonsyewutköku, keghanyi ngalechï echön le nyï atökïsïwa mötworintengu wowïntanyi ompö osis cho pkonöy.

²⁰Möminye anka nyo lata nyi ECHOTYON, kinkïtucha lö nyi onkït nyo ichï Tororötïncha.

²¹Möminye korö anka ompö ngwïny nyo lata Israel nyo kisörunenyi Misri koro mötwornön atökïlïkwï piköku. Kighchinyi chane tïpö töngönchin ntökïyasta ororyengu kïghömï ngwïng kïmïkul otini kisörunenyi chane koro Misri aiyonanyi pich walaka cho kimi tawungwa.

²²Keghanyi Israel kïlïkwï piköku kokay ailïkunyi ECHOTYON Tororötïngwa.

²³“Puntenö ye nyu we ECHOTYON, kïgh anka tïkwïl nyo kemwaghanyi lö oghchini mötworintengu nko konyi.

²⁴Kïsölöy kaynengu akïmwoghöy pich lö, ‘ECHOTYON kimuytoghin kï Tororöt pö Israel.’ Akughyongöy paytaghpa mötworintengu kokay.

²⁵ECHOTYON Tororöt pö Israel, konyorwan nyakanat asaghan soghutyonï, ompöwölo kengongwaninyi ngalechï aimwowaninyi lö ighenyi monechan kïlïkwï pöytoghin.

²⁶ECHOTYON Ichinyi Tororöt nyo keyomiswaninyi ngalechï pö töngönchin.

²⁷Osoghinyi ye lö soyönö monechan atökïtas tagh kïngörokyï chömchintöngu, kesoyönönyi chane akïtöpo kisöyönötengu nko chane kokay.”