Read pokoot 1 OTÖPTINO OSIS 19 Bible Online

1 OTÖPTINO OSIS 19 - pokoot bible

1 OTÖPTINO OSIS 19

¹Tomönye kite kïma Naas, pöytoghinto pipö Amon, kuker werïnyi Anun ngacharunyi.

²Kïlö Daudi, “Oghchinan nyo karam wero Naas, le wölo kighwanïn paponyi.” Kïyonta Daudi mötworichi kïpa kïsaghsagh nyinte ompö megheto paponyi. Nyini kit chane koro Amon akïnyorï pöytoghin Anun,

³kïlenchï kintöghoghi Amon pöytoghin, “Inonenyi so lö köyonï Daudi mötworichi kïsaghsaghinyi ompöwölo konyïtöy papongu? Köyonï pïchï kïpka kïghot kore atökïwaghach paytaghtöngu!”

⁴Kïnam Anun mötworichay pö Daudi akïrwach tamughayikwa akïtök sïrokökwa kïpesöy akïyon kïpa.

⁵Kinyorï chane arasï nyo wow, nyini kilïm Daudi kïmwatïta kelenchï chane, “Ompurö Yeriko ntökïtenö kïpit tamughayikwa ngat.”

⁶Otini kipköchï pöytoghin Anun nko pipö Amon lö kikïlïkwï Daudi punyontengwa, kutötö kilen 34,000 cho pö silpa atökïsom pipö nkaritin nko cho kötöy nkaritine kïpkana Mesopotamia nko Sirya nko Maaka nko Sopa.

⁷Kïpka kïmang atolekïtö Medepa nkaritinechay le 32,000 nko piko lïk chay kikïsoma pöytoghinto Maaka. Kïpkana kanastinekwa tïkwïl pipö Amon atökïpa poryot.

⁸Nyini kilïm Daudi choni, kïyonta Yoap nko pipö lïk cho le nyökon.

⁹Kïpka pipö Amon akïtötyï kegh ato poryegho ompö ato kïlïto Kanasyanta Rapa, kïtötyï kegh wölo le tömkö pöytoghï cho kipka kungarak.

¹⁰Kïsöwï Yoap lö kirik nyinte pung ompö tagh nko löt, kïlenyona kïkïl pipö lïk cho le nyökon akutö chane kïparta wölo mi pipö Sirya.

¹¹Kutö Apisyay werïngwa kuntöghoghchï pikö cho köngotï, nyo kitötyï chane kïparta wölo mi pipö Amon.

¹²Akïlenchï nyinte, “Ato isïwenyi lö mököy pipö Sirya kïrïntenanïn ingwïn ingarakanïn, kïnyïl ato asïwan lö mökoy pipö Amon kïrïntonanïn, ongwïnan ongörokinyi.

¹³Inyakanitï nyoman, akeporyö ompö piköcho nko kanastina Tororötïnyo nya kwigh ECHOTYON kïgh nyo sïwïyi nyinte lö karam.”

¹⁴Kïtas tagh Yoap nko pikachi kïporyö, kïryögh pipö Sirya.

¹⁵Nyini kisïwa pipö Amon lö kiryögh pipö Sirya, kïryögh chane tïkwïl ompö tawu Apisyay akïlïtöy kanasyan. Kïmïla nyu Yoap Yerusalem.

¹⁶Wölo nyini kisïwa pipö Sirya lö kikïrïnta Daudi chane, kwipunö pipö lïk koro Sirya okumpö kongasispa Yuparet, kintöghoghchï chane Syopach nyo kile kintöghoghinto pipö lïk cho pö pöytoghin Adadeser nyo pö Sopa.

¹⁷Nyini kikïmwochï Daudi, kutuyö pipö Israel akwoghyö Yordan akïtat chane kïparta wölo mi pipö Sirya, kutor nyu poryot,

¹⁸kïyon pipö Israel pipö Sirya. Kïpar Daudi nko pikachi pipö Sirya cho kötöy nkaritin cho le 7,000 nko pipö lïk cho pegho kelyön cho le 40,000 akïpar Syopach tïkwïl nyo kile yetïn pö lïk nyo pö Sirya.

¹⁹Otini kisïwa pöytoghï walaka cho kile mötwori Adadeser lö kikïrïnta Daudi chane kwam mis nko Daudi akïpöghisyechï nyinte. Mökïchamnye nyu ngat pipö Sirya kungarak pipö Amon.