Read pokoot 1 OTÖPTINO OSIS 21 Bible Online

1 OTÖPTINO OSIS 21 - pokoot bible

1 OTÖPTINO OSIS 21

¹Kipchï Onyötö pipö Israel kömpölelyö, kïlenyona kwigh Daudi kuyit pipö Israel.

²Kïmwochï Daudi Yoap nko yetïntin walaka lö, “Ape oghömunö koro Israel kïngata söröm ntökwit sörömu anka ayit pich löwïr, atonkïtwan lö tya chane.”

³Kïlenchï Yoap pöytoghin, “Nya kïtas ECHOTYON pipö Israel kïnyïl 100 ompö chongïn kïtïl ye! Cheku pïchï löwïr we pöytoghin. Wölo ompö ne temökenyi yite chane aipchï lelut Israel löwïr.”

⁴Wölo kwigh pöytoghintö Yoap kwigh lenyini kamwa nyinte, kïwö nyu Yoap kïghömï koro Israel akïmïla Yerusalem.

⁵Kwipchï Yoap pöytoghin Daudi kaynötut pö pich cho kimuköy poryot: pipö Israel cho le 1,100,000 nko cho pö Yuda 470,000.

⁶Kimeyitnye Yoap pipö ara Lawi nko ara Penchamen ompöwölo melö kicham nyinte ngala Daudi.

⁷Kimangaraknye Tororöt ompö ngalechoni, kïlenyona kutö sitöt pipö Israel.

⁸Kïlenchï Daudi ECHOTYON, “Kaghan lelut nyo wow ompö kïyï kaghan wölo osoghinyi we ECHOTYON lö sölwontön.”

⁹Kïlenchï ECHOTYON Kad nyo le werkoyonto Daudi,

¹⁰“Wïyö mwochinö Daudi lö otöninan nyinte tïkwïn sömök kïkïl, oghan nyo kakïl nyinte.”

¹¹Kïwö Kad wölo mi Daudi akïmwochï ngalechay kamwa ECHOTYON, kïtep nyinte lö, “Nyono nyo imökenyi?

¹²Kömöy nyo pö könyis sömök ompö korengu nya anta rïpenönyi tawu punköku ompö aro sömök anta parakwa ECHOTYON akuyokwï sömew nyo pö osis sömök ompö korengu akïpöghisyeghö malaykayan kwipï meghat kïghömï Israel? Omwochinan ne ECHOTYON?”

¹³Kïlenchï Daudi Kad, “Omitan ato kampalal! Wölo mochömanye kïkonanïn ptangengmöt sitöt. Nya kïkonanïn ECHOTYON sitöt, ompöwölo tïng kisyonchin.”

¹⁴Kutö ECHOTYON sömewe pipö Israel kïmeghö cho le 70,000.

¹⁵Kïyonta ECHOTYON malaykayan kunyar Yerusalem, wölo kïwaghach kinonsyewutkachi akïlenchï malaykayantanay, “Pïstenö kikïmïchï.” Kimi malaykayantanay atoni atolekïtö ghatya Arauna nyo pö pipö Yepusin.

¹⁶Kïsïwa Daudi malaykayan nyo kighyongo mïröt akitïng chok ompö ewunyi, kimi psach kunyar Yerusalem. Kïkïtïng Daudi ntökwit tokochunyi ngwïny kïmi nko kintöghoghï cho kiloköy sarankwachtin.

¹⁷Kïsagh Daudi ECHOTYON lö, “We Tororöt, ani nyo kaghan ngokï amwatïta keyit pich. Ne kitö nyu nyo gha nyo kegh pïchï? Nya kïlïkwï nyinyan site nko katanyan.”

¹⁸Kïlenchï malaykayanta ECHOTYON Kad, mwochinö Daudi kïtekyï ECHOTYON atay kïpelö Amöros ompö ghatya Arauna.

¹⁹Kiter Daudi ngölyonto ECHOTYON akïwö le ato kömwochï Kad.

²⁰Kimi Arauna nko werkachi angwan kïtïghöy nkanun ompö ghatyanoni, nyini kisïwa chane malaykayan, kïryögh werkachi kïpa kïwïng kegh.

²¹Kïsïwa Arauna pöytoghin Daudi kungwïnöy ghatyanay akïwö kïkïtïngchï Daudi ompö konyït ntökïswany tokochunyi ngwïny.

²²Kïlenchï Daudi nyinte, “Olwante ghatyengu, atotekyan ECHOTYON ato kïpelö Amöros atökïngeta pich sömewö. Olan lenyini imökenyi.”

²³Kïlö Arauna, “Chenga we pöytoghin, aigh le wölo keda, achï eghin cho pö amöros nyo kïpelöy nko ketichï kinyertoy cho lïku kwenka nko nkanune cho kïroptoy. Okoninyi löwïr.”

²⁴Wölo kïlö pöytoghintö, “Melö lenye nyona oghokunyi löwïr. Melö otönan ECHOTYON ropöwon ompö kïgh nyo le nyengu, nyo melö kalan.”

²⁵Kïghokyï Daudi Arauna ropïyeni koltin cho le 600 cho pö ghatyanay kinyertoy.

²⁶Kïtekyï Daudi ECHOTYON atay kïpelö Amöros ompö atoni akutötö Amöros nyo kïpelöy nko nyo pö pöghisyö. Kïsagh ECHOTYON, kïterchï nyinte ECHOTYON sowutkachi akuyokwï ma kungwïna yïm nyo kipel Amörostinechay kimi atay kïpelo Amöros.

²⁷Kïmwochï ECHOTYON malaykayantanay kïror chokenyi, kïror nyu malaykayantanay chokonay.

²⁸Kïsïwa nyu Daudi ompö nyoni lö kikïcham ECHOTYON sowutkachi, kïropta nyu Amörostin ompö atay kïpelo Amöros ompö ghatya Arauna.

²⁹Kitökïmi Ema nyo mi ECHOTYON* nyo kinap Musa ompö surkwen nko atay kïpelo amöros tïkumwoko Kipyon,

³⁰wölo kiwagh Daudi kïwö kïsagha wölo ompöwölo kiwagh choko malaykayanta ECHOTYON.