Read pokoot 1 OTÖPTINO OSIS 22 Bible Online

1 OTÖPTINO OSIS 22 - pokoot bible

1 OTÖPTINO OSIS 22

¹Kïlö Daudi, “Yete nyu ato mïchini kïmi Kö pö ECHOTYON Tororöt. Kwanyï atay tötegho pipö Israel amöros nyo kïpelöy.”

²Kïmwochï Daudi pipö punton walaka cho kimöngöy koro Israel kïtuyö akutö chane ighisyö nyo kitïghöy koghïn cho kïteko Kö pö Tororöt.

³Kitötö Daudi karïn cho kikitongöy chumaris cho pö nko taghoy cho mötïny kepim chongïntö.

⁴Kïmwochï nyinte pipö Tiro nko Sidon kwipchï nyinte keti tarak cho chang.

⁵Kunan nyu Daudi lö, “Kö pö Tororöt nyo teköy werïnyan Solomon kï pö töngonchin nyoman. Wölo tökïmïnïng nyinte, nya atatan tötutkö pat.” Kutö nyu Daudi kari teksyö kïpsach kïtomö kïrapas.

⁶Kïkur Daudi werïnyi Solomon akïmwochï kïtek Kö pö Tororöt pö Israel.

⁷Kïlenchï Daudi nyinte, “Werïnyu, kyomökan oteke Kö pö Tororöt ompö konyït pö ECHOTYON Tororötïnyan.

⁸Wölo kïlenchanïn ECHOTYON, kiparanyi pich cho chang akiwenyi poryotïn cho chang, akwompöwölo kyamïltan kisön cho chang kïmöchömwanïnye otekyinan nyinte ko.

⁹Kiyomiswanïn tïkwïl lö, ‘Inyorunenyi weri nyo pöytoy ompö kalya, ompöwölo otönan nyinte kalya ompö pungkachi. Kïkuro kaynenyi Solomon, ompöwölo otönan Israel kalya nko ripöt ompö paytaghtanyi.

¹⁰Tekwanïn nyinte kö. Lïku nyinte werïnyan alïkwan paponyi. Töpo paytaghtanyi Israel kokay.’ ”

¹¹Kïtas tagh Daudi kïlö, “Ye nyu werïnyu, nya kïtöpö ECHOTYON Tororötïngu nko nyi, akusïlta kiyomisötenyi kwighinyi muktena tekyinö nyinte kö.

¹²Nya kïkoninyi ECHOTYON Tororötïngu pköchin nko ngöghomnyö aterwokyinö Israel kïrïp kegh nko kirurutyenyi.

¹³Ato irïpanyi kirurut löwïr cho kitö ECHOTYON pipö Israel kuwerï Musa, imuktonyi. Inyakanitï aighyong lasiny, amewöghisyö nyonikïny.

¹⁴Kyonoghyan nyoman ntaroran ompö Kö pö Tororöt tanin cho pö koltin 3,400 nko tanin cho pö silpa 34,000 cho kïtektoy nko taghoy nko karïn cho mötïny keyit. Kyaroran tïkwïl ket nko koghïn, wölo itas walaka.

¹⁵Itïngönyi pich cho chang cho tïghöy koghïn nko cho tektoy koghïn nko cho tektoy ket nko cho nkït ighisyo,

¹⁶koltin nko Silpa nko taghoy nko karïn. Ngeta nyu torö igha pöghisyonï, akungarakïn ECHOTYON.”

¹⁷Kïmwochï Daudi kintöghoghi pipö Israel kungarak Solomon.

¹⁸Akïlenchï, “Kimi nko akwa ECHOTYON Tororötïnkwa, akikonokwa kalya ompö wop anka tïkwïl. Kingarakanïn arïntan pich cho kimi koronï, mötworikwa chane ye akï mötwori ECHOTYON.

¹⁹Opöghisyechinö ye nyu ECHOTYON Tororötïnkwa ompö mïkuliskökwa löwïr nko ompö söponwekwa. Otorö ateka Kö pö Tororöt, atö otönö ori Santuku Muma* ECHOTYON nko tïkwïn walaka cho Tïlilöch cho kïpöghisyegho ato kïsoghöy nyinte.”