Read pokoot 1 OTÖPTINO OSIS 23 Bible Online

1 OTÖPTINO OSIS 23 - pokoot bible

1 OTÖPTINO OSIS 23

¹Kikïl Daudi werïnyi Solomon kïlïkwï pöytoghinto Israel otini kiyosit nyinte.

²Kutuyö Daudi kintöghoghi Israel löwïr nko tïsï nko pipö Lawi löwïr.

³Kuyit pipö Lawi löwïr cho le mïrön cho kitïng könyis tömönut sömök kutok, kïlïkwï chane löwïr 38,000.

⁴Kutö Daudi cho le 24,000 kwigh ighisyö ompö Kö pö Tororöt,* kïlïkwï cho le 6,000 yetïntin nko kirwokï.

⁵Kïripsyö cho le 4,000, kïtumchï ECHOTYON cho le 4,000 akïpöghisyegho kari tumöt cho kikonï pöytoghintö ompö ighisyononi.

⁶Kichagh Daudi pipö Lawi kïlïkwï söpïchis sömök, kïrïp kegh nko monekwa: Kersyon nko Koat nko Merari.

⁷Kitïng Kersyon werko odeny: Ladan nko Syimey.

⁸Kitïng Ladan wor sömök: Yeiel nko Setam nko Yoel,

⁹cho kile kintöghoghi ortïnekwa. Kitïng Syimey wor sömök: Syelomot nko Asiel nko Aran akï chane cho kile kintöghoghi ortïna ara Ladan.

¹⁰Kitïng Syimey wor angwan: Yaat nko Sina nko Yeus nko Peria kïrïp kegh nko könyiswekwa.

¹¹Ki wow Yaat ompö chane aki nyo kirïpöy nyinte kï Sisa. Wölo kimötïngnye Yeus nko Peria monïng cho chang, kïlenyona kikiyit chane le or akonga.

¹²Kitïng Koat wor angwan: Amram nko Isar nko Epron nko Usiel.

¹³ Kitïng Amram wor odeny: Musa nko Aron, kikïkïl Aron nko monechi kïrip karïn cho tïlilöch kokay akïpel tïkwïn cho ngutoy cho onyïn ato kïsoghöy ECHOTYON akïpöghisyechï nyinte, akusoyön pich ompö kaynenyi.

¹⁴Kikiyit monïngo Musa nyo le chi pö Tororöt nko cho pö pipö Lawi.

¹⁵Kitïng Musa wor odeny: Kersyom nko Elieser.

¹⁶Kintöghoghchini Syepuel werpö Kersyom.

¹⁷Kitïng Elieser weri akonga nyo kikïkuro Reapia akitïng Rapia monïng cho chang.

¹⁸Kitïng Isar wero Koat nyo pö odeny weri akonga, Syelomit nyo kile kintöghoghinto arengwa.

¹⁹Kitïng Epron wero Koat nyo pö sömök wor angwan: Yeria nko Amaria nko Yaasiel nko Yekameam.

²⁰Kitïng Usiel wero Koat nyo pö angwan wor odeny: Mika nko Isyia.

²¹Kitïng Merari wor odeny: Mali nko Musyi. Kitïng Mali wor odeny: Eleasar nko Kis,

²²wölo kirapas Eleasar kïmötïng wor kïpoto tipïn. Kip werpö Kis tipichoni.

²³Kïtïng Musyi wor sömök, Mali nko Eder nko Yeremot.

²⁴Chete kï monïngo pipö Lawi cho kikikir ompö kaynötut kïrïp kegh nko ortïnekwa nko korikwa, cho kitïng könyis tömönut odeny kutok, atökwigh ighisyö ompö Kö pö ECHOTYON Tororöt.

²⁵Kïlö Daudi, “Kikutö ye nyu ECHOTYON Tororöt pö Israel pikachi Kalya, akïmöngöy nyinte Yerusalem kokay.

²⁶Mökïminye machata ye kïsïtsetö pipö Lawi Ema nyo mi ECHOTYON* nko tïkwïn cho kïpöghisyegho ompö saghat.”

²⁷Kimwa Daudi ompö ngalechi cho pö söröm lö, kiyitöy pipö Lawi cho tïng könyis tömönut odeny kutok

²⁸aketö chane ighisyewutchï: kungarak tïsï cho pö ara Aron ompö saghat ompö Kö pö Tororöt akïrip kirorye nko kori akuwun tïkwïn cho tïlilöch

²⁹akïrip makatyan nyo kïropchini Tororöt nko pïsye nko makateni cho mïnkech cho puryö mumar nko ropöw cho kakïchïl nko pïsya cho kakinyornyoryö nko mwaghpa arol, kuyit akupim ropöwo Kö pö Tororöt,

³⁰kuyokyï sörö akïkwol ECHOTYON tökwoghö nko mönon

³¹nko ato kïpelöy ropöwo ECHOTYON ompö Sapato* nko Ichon pö Relïn pö Arawa nko ichontin walaka, kïrïp kegh nko chini machate chik ompö ECHOTYON.

³²Chane cho kiripöy Ema nyo mi ECHOTYON nko Kö pö Tororöt akungarak monïngo tïsï cho pö ara Aron nko werkökwa ompö Kö pö Tororöt.