Read pokoot 1 OTÖPTINO OSIS 26 Bible Online

1 OTÖPTINO OSIS 26 - pokoot bible

1 OTÖPTINO OSIS 26

¹Kikïchagh ighisyö le nyï ompö pipö Lawi cho kiripöy Kö pö Tororöt.* Cho pö ara Kora kï, Mesyelemia wero Kore nyo pö ara Asap.

²Kitïng nyinte wor mut nko odeny, nyo tagh kï: Sakaria nko Yediael nko Sepadia nko Yatniel

³nko Elam nko Yeoanan nko Elieoenay.

⁴ Kitïng tïkwïl Oped Edom wor mut nko sömök, nyo tagh kï Syemaya nko Yeosapad nko Yoa nko Sakar nko Netanel

⁵nko Amiel nko Isakar nko Peuletay.

⁶Kïtïng Syemaya wero Oped Edom nyo wow wor mut nko akonga: Otni nko Repael nko Oped nko Elsapad nko Eliu nko Semakia. Ki pich chane cho kile kintöghoghï ompö ortïnekwa tökïmïr tya cho le odeny cho pö söröm.

⁸Kimito pich ara Oped Edom cho le 62 cho kimuköy kwigh ighisyö.

⁹Kïmito ara Mesyelemia cho le 18.

¹⁰Ompö ara Merari kï Osa, nyo kitïng werkachi angwan: Syimri nyo kikïl paponyi nyinte kïlïkwï kintöghoghin kïrökegh melö ki poret nyinte,

¹¹nko Ilkia nko Tepalia nko Sakaria ki pich taman nko sömök cho pö ara Osa cho kile ripi Kö pö Tororöt.

¹²Kikïchagh ripi Kö pö Tororöt ompö söpïchis kïrïp kegh nko ortïnekwa aketö ighisyewutkökwa ompö Kö pö Tororöt le pipö Lawi walaka.

¹³Kigh chane pkiryot, cho mïnkech nko cho echön atökunkïtï lö kukat ne nyo ripöy.

¹⁴Kipöyit kuke nyo pö kongasis Syelemia, kïpöyit nyo pö okumpö löt werïnyi Sakaria, chi nyo kitïng ngal cho pö ngöghomnyö.

¹⁵Ketö Oped Edom kuke nyo pö okumpö tagh, ketö werkachi kïrip Kori Karïn.

¹⁶Ketö Syupim nko Osa kuke nyo pö okumpö ta, ketö Kuka Syaleket, kukat nyo mi or nyo wetöy wölo to. Kikïchagh ighisyö nyo pö ripsyö, akipörchini kegh pich pösyö.

¹⁷Kimi kongasis ripï cho le mut nko akonga ompö asis anka tïkwïl, kïmi okumpö löt cho le angwan, kïmi okumpö tagh cho le angwan. Kimi ripï cho le angwan Kori Karïn chik, odeny ompö kö akonga.

¹⁸Kimi ripï angwanï atolekïtö or nyo mi okumpö ta nyo pö atosïtote.

¹⁹Lata nyete wölo kikitötyï ighisyewutkökwa pipö ara Kora nko cho pö Merari.

²⁰Kiripöy pipö Lawi walaka mïloto ropïyeni Kö pö Tororöt nko korïn cho mi tïkwïn cho kakitïlilchï Tororöt.

²¹Ki kuköto ortïn cho chang Ladan nyo kile wero Kersyon kïmi nko werïnyi Yeiel.

²²Kiripöy mïloto ropïyen nyo pö Kö pö Tororöt Setam nko Yoel cho kile werpö Ladan.

²³Kikitö tïkwïl ighisyö monïngo Amram nko Isar nko Epron nko Usiel.

²⁴Ki rorinto ropïyeni Kö pö Tororöt Syepuel nyo pö ara Kersyom, wero Musa.

²⁵Chï kï werkökwa: ki tupchö Elieser nko Syelomit, Elieser kï papoto Reapia nyo kile papoto Yesyaya papoto Yoram papoto Sikri papoto Syelomit.

²⁶Syelomit nko piko arengwa cho kiripöy ropöw cho kitïlilchï Daudi Tororöt nko kintöghoghi ortïn nko kintöghoghi söpïchis nko yetïntino pipö lïk.

²⁷Kitötö chane tïkwïn cho kipörï ompö ighisyo Kö pö Tororöt.

²⁸Kiripöy Syelomit nko piko arengwa tïkwïn löwïr cho kitötö pich ompö ighisyö nyo pö Kö pö Tororöt. Kïmi nko cho kikonï werkoyon Samwel nko pöytoghin Saulö nko Apner wero Ner nko Yoap wero Seruya.

²⁹Kikitö monïngo Isar nko Kenania nko werkachi kuros kitapun nko kirwokut ompö pipö Israel.

³⁰Ketö monïngo Epron nko Asyapia, pich cho le 1,700 cho kitïng owesyö kughyongtö ngala Din nko cho pö pöytoghin ompö lalwa Yordan okumpö ta.

³¹Ki Yeria nyo kile kintöghoghinto monïngo Epron. Kikïyar ara monïngo Epron ompö konyi angwan nyo pö paytaghpa Daudi, kenyorï pich cho pö aranoni cho kimuköy poryot cho kimöngöy Yaser rotyo Kiliad.

³²Kïkïl Daudi pich cho le kintöghoghi ortïn 2,700 cho kitïng owesyö ompö tïlyayi Yeria akutö chane kuntöghoghchï ngal Din nko cho pö pöytoghin ompö kongasispa lalwa Yordan rotyotïno Rupen nko Kad kwenu pipö Manase cho mi kongasis.