Read pokoot 1 OTÖPTINO OSIS 28 Bible Online

1 OTÖPTINO OSIS 28 - pokoot bible

1 OTÖPTINO OSIS 28

¹Kïmwochï Daudi yetïntino pipö Israel kïtuyechï Yerusalem: yetïntono ortïn nko cho kighöy ighisyö nyo pö ka pöytoghin nko yetïntino korïn nko cho kiripöy tïkwïn nko cho kiyokwïyi tïch cho pö pöytoghin nko werkachi nko yetïntono ka pöytoghin nko yetïntino pipö lïk nko pich walaka cho konyïtote.

²Kughyongö Daudi tawungwa akïlenchï, “Oterwante pikachu. Kyomökan oteke kö nyo pö Santuku Muma* nyo pö ECHOTYON, wölo tïköy nyinte. Kö kyatatan otekyï kö nyo kikonyïto nyinte,

³wölo kitaghenanïn nyinte, ompöwölo ochan chipö lïk akiparanyi pich cho chang.

⁴Kikïlanïn nko monechu ECHOTYON Tororöt pö Israel apayta Israel kokay. Kikïl ara Yuda atökïpayta, kïkïl ompö ara Yuda koto paponyan. Kïkïlanïn ompö koto paponyan alïkwan pöytoghinto Israel.

⁵Kikonïn ECHOTYON wor cho chang, kïkïl Solomon ompö choni löwïr kïlïkwï pöytoghin ompö Israel, paytaghpa ECHOTYON.

⁶“Kïlenchanïn ECHOTYON, ‘Werïngu Solomon nyo teköy Konyan. Kakïlan nyinte kïlïkwï werïnyan alïkwan kwanta.

⁷Ochïchiman paytaghtanyi kokay atotas tagh nyinte kïrip kirurutköchan akïrïp ngalechan lenyini ighöy ye.’

⁸“Omwowokwa ye nyu pikachu ompö tawu Tororöt nko tuyonï pö Israel pipö ECHOTYON lö, arïp kïgh anka tïkwïl nyo mwowekwa ECHOTYON Tororötïnyo, atö onyorunö koronï karam, apïsyinikwa monekwo kïmïl kokay.”

⁹Kïlenchï Daudi Solomon, “Werïnyu, inkïtï Tororöt pö papongu aipöghisyechï nyinte ompö mïkulögh akonga nko kinonut akonga. Nkït nyinte kinonsyewutköcha nko möchutköcha, ato iwechinyi nyinte kïtokinyi. Wölo ato itaghanyi nyinte, kïtöghinyi kokay.

¹⁰Nkïtunö lö kikïkïlinyi ECHOTYON ateteka Konyi nyo tïlil. Igha ye nyu aigh ompö nyakanat.”

¹¹Kutö Daudi werïnyi Solomon tötut cho pö tekata Kö pö Tororöt,* cho pö kari karïn nko kori walaka nko cho pö Wölo Tïlil Tya* kïlöstegho ngokï.

¹²Kutö tïkwïl tötut cho kitïng nyinte ompö kinonutkachi, cho pö Kö pö Tororöt okumpö sany nko korïn cho kimi nko korïn cho pö Kö pö Tororöt nko tïkwïn cho kakitïlilchï ECHOTYON.

¹³Akutö tïkwïl tötut cho pö wölo ightoy ighisyengwa tïsï nko pipö Lawi, kwigh ighisyö ompö Kö pö Tororöt akïrip karïn cho kïpöghisyegho ompö Kö pö Tororöt.

¹⁴Akïmwochï nyinte lö silpa nko koltin cho tya cho kïpöghisyegho ompö karïn

¹⁵nko kitömöwö nko atay kikönoghöy kitömöwö

¹⁶nko meseni silpa nko meseni koltin cho kikitoni makatin cho kïropchini Tororöt.

¹⁷Kimwochï nyinte lö koltin cho karamach cho tya cho kigho umen nko pakulin nko alepïtis nko silpa nko koltin cho tya cho kikigho söpïryen,

¹⁸nko koltin cho karamach cho tya cho kikigho atay kïpelo tïkwïn cho ngutoy cho onyïn nko cho kigho nkari nyo pö kerupimtinechay* syolöy köpepokökwa ompö paraku Santuku Muma nyo pö ECHOTYON.

¹⁹Kïlö pöytoghin Daudi, “Mi chï löwïr tötut cho kikir kïrïp kegh nko ngala ECHOTYON cho kikonanïn amwa.”

²⁰Kïmwochï Daudi werïnyi Solomon lö, “Iawesitï ainyakanitï. Torö ighisyö amewöghisyö. Mi nko nyi ECHOTYON Tororöt nyo opöghisyechinan. Möpïsteninyinye, töpo nko nyi ntökïtenö wanganyi ighisyo Kö pö Tororöt.

²¹Kiketö ighisyewutkökwa tïsï nko pipö Lawi cho ighöy ompö Kö pö Tororöt. Kikïcham pich kengarakinyi cho tïng tïnganat nyo pö tïkwïn cho chang, intöghoghchinenyi pïchï löwïr nko kintöghoghikwa.”