Read pokoot 1 OTÖPTINO OSIS 29 Bible Online

1 OTÖPTINO OSIS 29 - pokoot bible

1 OTÖPTINO OSIS 29

¹Kïmwochï Daudi tuyot kïmïkul lö, “Werïnyan Solomon nyo kakïl Tororöt, wölo tökïmïnïng akïtomönye kunkïtï cho chang. Wow ighisyonï nyoman, ompöwölo melö pö tekate chi, wölo Kö pö ECHOTYON Tororöt.

²Kyonoghyan nyoman ayar tïkuchï kïtektoy: Koltin nko silpa nko taghoy nko karïn nko ket nko koghïn cho pïchighöch nko koghïn cho walaka cho sisinchö nko koghïn walaka cho karamach nko senkwet cho chang.

³Ompö paraku choni konyorwan, kotötan silpa nko koltin cho le chichan kegh ompöwölo ochöman Kö pö Tororöt.*

⁴Kotötan tïkwïl tanin cho tïlöy 100 cho pö koltin cho pïchighöch nko tanin cho ngata 240 cho pö silpa cho karamach cho kïsïlo nöyetwo Kö pö Tororöt

⁵nko tïkwïn walaka löwïr cho igho puntinö morikwa. Ngo ye nyu chi anka nyo mököy kïropchini kïgh ECHOTYON ompö machatenyi?”

⁶Kutöto nyu ompö chamatengwa kintöghoghi korïn nko yetïntino ortïn nko kintöghoghi pipö lïk nko kirwokoti ka pöytoghin

⁷tïkuchï atöketeka Kö pö Tororöt: Tanin cho tïlöy 170 cho pö koltin nko tanin cho tïlöy 340 cho pö silpa nko tanin cho ngata 620 cho pö taghoy nko tanin cho tïlöy 3,400 cho pö karïn.

⁸Kitötö pich koghïn cho pïchighöch cho kitïng kutö Kö pö Tororöt, akï Yeiel nyo pö ara Kersyon nyo kiripöy.

⁹Kingörechote pich ompöwölo kitötö chane ompö machatengwa, kingörekyö ompöwölo kikitötö tïkwïn cho tenö choni. Kingarak pöytoghintö Daudi tya.

¹⁰Kïsal Daudi Tororöt ompö tawu tuyonini kïmïkul, kïlentöy, “Nya kïsala kaynengu kokay, we ECHOTYON, Tororöt pö paponcha Israel!

¹¹ Ichinyi wow aitïngönyi owesyö nko ororyö nko rïntagh nko kimuytaghat. Tïkwïn cho mi yïm nko ngwïny kï cheku aichinyi pöytoghin iminyi paraku tïkwïn löwïr.

¹²Ngwïno wölo imitenyi monkornan nko konyït, ipöytonyi tïkwïn löwïr ompö owesyengu aimukenyi ighenyi chi kïyetï akwawesit.

¹³Kiyokuchanyi sörö ye Tororötïnyo akekwolecha kaynengu nyo oror.

¹⁴“Momukanye nko piköchan ntokoninyi kïgh, ompöwölo ropöwon kïgh anka tïkwïl nyo ngwïno wölo iminyi. Kökïkonichanyi pat tïkwïn cho köle cheku tagh.

¹⁵Kïlatecha to nko pïnot ompö tawungu le wölo kilata papotïnecha. Körökegh osiswecha nko rurwö nyo weröy, amökimukechanye ntökechïwïta meghat.

¹⁶Kakipuchanyi tïkuchï löwïr ECHOTYON Tororötïnyo, atö keteka kongu nyo kïkonyïto kaynengu nyo Tïlil, wölo kapkana wölo imitenyi akï cheku.

¹⁷Onkïtön lö ityömenyi mïkulis, aichömenyi pich cho tïng konyït. Kokonwan chete ompö konyït nko ompö chamatenyan kegh, akasïwan piköku chï kötuyechï yi lö kepunyi ropöw ompö ngörekyö.

¹⁸ECHOTYON Tororöt pö papotïnecha Apraam nko Isak nko Yakopo, itö ngalechete mïkulis pö piköku kokay aikany kïpöru chane wölo imitenyi.

¹⁹Tönö werïnyan Solomon mïkulögh nyo karam atökwigh kïgh anka tïkwïl nyo imwochinenyi akïrïp wölo kïtektoy.”

²⁰Atolapay kïmwochï Daudi pich lö, “Okwolö ECHOTYON Tororötïngwo!” Kïkwol tuyonay kïmïkul ECHOTYON Tororöt pö kukötinekwa akïkïtïngchï ECHOTYON ompö konyït nko ompö pöytoghin.

²¹Kutö chane ECHOTYON asisto odeny amörostin cho kïpelöy: Eghin 1,000 nko mökol 1,000 nko wara kechir cho le 1,000 cho kikïpel löwïr ompö atay kïpelo Amöros. Kipï tïkwïl ropöwo dipay.*

²²Kingörekyö chane asisoni akwomisïyi: akïgheghsïyi ompö tawu ECHOTYON. Nyo pö odeny kïkïl Solomon kïlïkwï pöytoghin. Kuyil nyinte ompö kaynata ECHOTYON kïlïkwï pöytoghintengwa, kïlïkwï Sadok tïsinte.

²³ Kïcheng Solomon ngacharuto paponyi Daudi nyo kitor ECHOTYON. Ki pöytoghin nyinte nyo karam, kitek nyinte pipö Israel löwïr.

²⁴Kicham yetïntinö nko pipö lïk nko chini le werpö Daudi kïlïkwï Solomon pöytoghin.

²⁵Kïmwochï ECHOTYON pipö Israel löwïr kughyongö tawu Solomon akwigh nyinte kwororit kïtïl pöytoghin anka nko anka nyo kipayta Israel.

²⁶Kipayta Daudi wero Yese Israel

²⁷ompö könyis tömönut angwan. Kipayta ompö Epron könyis mut nko odeny, kïpayta ompö Yerusalem könyis 33.

²⁸Kirapas nyinte ato kikïyosit, kï monkoryon akïkonyïtote, kïcheng werïnyi Solomon ngacharu kïlïkwï pöytoghin.

²⁹Kirate ngala Daudi ompö kitapuna werkoy sömök: Samwel nko Natan nko Kad.

³⁰Poru ompö kitapunechoni wölo kilata paytaghtanyi nko owesyenyi nko ngal cho kighisyö ompö nyinte nko Israel nko paytaghpa koros cho kiwit nyinte.