Read pokoot 1 OTÖPTINO OSIS 5 Bible Online

1 OTÖPTINO OSIS 5 - pokoot bible

1 OTÖPTINO OSIS 5

¹Chï kï monïngo Rupen, poretya Yakopo. Akï ompöwölo kirï nko chemïnïngwo* kwanta, kechenga nyinte manpa poretnan aketö Yosep.

²Kïrökegh kyowesitu ara Yuda akungwïna pöytoghintö ompö ortïnechoni löwïr, kï kikitö Yosep manpa poretnan.

³Kitïng Rupen poretya Yakopo wor angwan: Anok nko Palu nko Esron nko Karmi.

⁴Chï kï monïngo Yoel: Syemaya nko Kok nko Syimey

⁵nko Mika nko Reaya nko Paal

⁶nko Peera nyo kinam Tilkat Pilneser pöytoghinto Asirya akumït kïwö korenyi, kï nyinte nyo ki wow ompö ara pipö Rupen.

⁷Chï kï pich cho kile kintöghoghï ompö ara Rupen: Yeiel nko Sakaria

⁸nko Pela wero Asas wero Syema wero Yoel. Kimang pïchï Aroer ntökwit ewu löt nyo pö Nepo nko Paal Meon.

⁹Kitïng chane kyak cho chang ompö koro Kiliad, kïlenyona kimang chane kore kutang okumpö kongasis ntökwit surkwen nyo kighïtö ntökwit lalwa Yuparet.

¹⁰Kiporyeghö pipö Rupen pipö Akri ompö osiswo pöytoghin Saulö, akïpar chane akïmang kore ompö kongasispa Kiliad.

¹¹Kimang monïngo Kad okumpö ewu löt nyo pö pipö Rupen ompö koro Pasyan ntökwit Saleka.

¹²Yoel nyo kiwowö pikö cho chang, Syapam nyo pö odeny, Yanay nko Syapat cho kighechön ompö pich cho kimi Pasyan.

¹³Tïlyayikwa walaka cho kintöghoghchini ortïnekwa kï: Mikael nko Mesyulam nko Syepa nko Yoray nko Yakan nko Sia nko Eper.

¹⁴Chane kï monïngo Apiail wero Uri, lata nyï tötutyo kukötinekwa: Apiail nko Uri nko Yaroa nko Kiliad nko Mikael nko Yesyisyay nko Yado nko Pus.

¹⁵Ai wero Apdiel wero Kuni nyo kile kintöghoghinto ortïnechï.

¹⁶Kimang chane Kiliad nko Pasyan nko kanastinekwa cho mïnkech nko wölo kyoketïyi kyakï ompö Syaron.

¹⁷Kikikir pïchï ompö osiswo pöytoghin Yotam nyo pö Yuda nko pöytoghin Yeropoam nyo pö Israel.

¹⁸Kimito pipö lïk ompö ara Rupen nko ara Kad nko ara Manase cho le 44,760 cho kikinet lasiny kïpöghisyeghö longoy nko kotï nko chokon.

¹⁹Akïpa kïporyeghö pipö Akri nko Yetur nko Napis nko Nodap.

²⁰Kitwayta kegh chane Tororöt akïsom nyinte kingörokut, kungarak Tororöt chane akwigh chane kïrïnta pipö Akri nko pöröriskökwa.

²¹Chï kï pöröw cho kinyorunö pungkökwa: Tamasay 50,000 nko kechir 250,000 nko sïkïröy 2,000 akïnam pich 100,000

²²kïpar chane pungkökwa cho chang, ompöwölo ki machata Tororöt porye. Akïmang kore ntökïtenö osiswo wuwöt.

²³Kïmang pipö Manase cho kimi kongasis Pasyan ntökwit Paal Ermon okumpö ewu löt nko Senir nko kutïng pö Ermon akïtösisyö chane tya.

²⁴Chï kï pich cho kile kintöghoghikwa: Eper nko Isyi nko Eliel nko Asriel nko Yeremia nko Odapia nko Yadiel, ki pipö poryot chane cho rumunote akï ki kintöghoghi pikökwa.

²⁵Kighchï pich nyo gha Tororöt pö kukötinekwa akïtagh nyinte akïsagh tororötin walaka cho pö pich cho kikiyona Tororöt kore.

²⁶Kïlenyona kwigh Tororöt pöytoghin Pul nyo pö Asirya, nyo kïkuro kayne anka Tilkat Pilneser, kïlït korengwa akïnam pipö Rupen nko Kad nko pipö Manase cho pö kongasis akïkany kumpur Ala nko Apor nko Ara nko rerangu lalwa Kosan nko Ye.