Read pokoot 2 OTÖPTINO OSIS 1 Bible Online

2 OTÖPTINO OSIS 1 - pokoot bible

2 OTÖPTINO OSIS 1

¹Kinam Solomon wero Daudi paytaghtanyi lasiny, akwigh nyo karam ompö koro Israel, kusoyön ECHOTYON Tororötïnyi akwigh nyinte kïyetï tya.

²Kingölonchï Solomon pipö Israel löwïr, kingölonchï yetïntino lïkos cho peghotegho 1,000 nko cho peghotegho 100 nko muti ngal akwomchï yetïn anka tïkwïl ompö pipö Israel, kïmi nko cho kintöghoghchini ortïneko papotïnekwa.

³Kïwö Solomon nko pïnchoni löwïr kutang Kipyon wölo kikïsogho, ompöwölo kimi wöloni Ema nyo mi ECHOTYON* nyo kïtek Musa mötworinto ECHOTYON ompö surkwen.

⁴Kikikwipï Daudi Santuku Muma* ECHOTYON kwipunö Kiryat Yearim kungwïn wölo kikikwighchï nyinte, ompöwölo kikïtekyï nyinte Santuku Muma ECHOTYON ema ompö Yerusalem.

⁵Kimi atoni le Kipyon ato kïpelo amöros nyo kikïteka kari akwangen, nyo kitek Pesalel wero Uri aki kuköto Ur nyo kimi nyinte tawu Tororöt Kïwö nyu Solomon nko pïchay löwïr kïsagha ECHOTYON atoni.

⁶Kipusta Solomon kutang ato kïpelo amöros nyo kikïteka akwangen nyo kimi Ema nyo mi ECHOTYON, akutötö ropöw cho kïpelöy cho le 1,000 ompö atoni.

⁷Kuporchï kegh ECHOTYON Solomon oghononi akïlenchï, “Somö kïgh nyo imököy atokonïn.”

⁸Kïlenchï Solomon Tororöt, “Kiporchinyi paponyan Daudi chomnyogh nyo wow nyo möngötönye aighaninyi apayta aker nyinte.

⁹Ye nyu, we ECHOTYON Tororöt, nya kïpïntö ayomistöngu nyo kiyomisönyi paponyan Daudi, ompöwölo keghaninyi alïkwan pöytoghinto pich cho chang tya le nyïngwïn.

¹⁰Konanïn nyu ye ngöghomnyö nko chïreryö, atamukan apayta pïchï nyo karam, ompöwölo muköy ngo kïpöytoy piköku chï chang le chï?”

¹¹Kiyokyï Tororöt Solomon lö, “Ompöwölo kimi ngölyontonï mïkulöwungu amelö kesomönyi tïkwïn, anta sïkönöt anta chönökopïrnön anta lö kepar punköku, anta lö tesöpö nyo kogh, wölo ketepchinyi kegh ngöghomnyö nko chïreryö, ate paytena piköchan cho kyotöninyi lïkuna pöytoghintengwa.

¹²Kïlenyona okoninyi ngöghomnyö nko chïreryö, okoninyi mökosyö nko tïkwïn cho chang nko ororyö nyo mönyorïcha pöytoghï cho kinyaghinyi amönyorucha cho rïpunyi.”

¹³Kungwïna Solomon Kipyon wölo kïsogho, tawu Ema nyo kïnyoryegho kutöngwï Yerusalem, kïpayta nyu Israel.

¹⁴ Kunyoryö Solomon nkaritino lïk nko pich cho ipöy angoletin, kitïng nkaritin cho le 1,400 nko mïrön cho kipöy angoletin cho le 12,000 cho kitö kïmang kanasyanta nkaritin akïmang nko pöytoghin ompö Yerusalem.

¹⁵Kwigh pöytoghintö silpa nko koltin kusyew le köghïn ompö Yerusalem, akïtör tarakit ntö kïchangit makany ompö Syepela.

¹⁶Kikïrongunö koro Misri nko Kilikia angoletin cho kitïng Solomon. Kyal mïnchïrïs pö pöytoghin angoletinechay kïrïp kegh nko olyotanyi.

¹⁷Kikötunö Misri nkari nyo kikyala ropïyeni silpa 600 nko angole nyo kikyala ropïyeni silpa cho le 150, kigh lenyoni pöytoghi pipö Ititi nko cho pö Sirya.