Read pokoot 2 OTÖPTINO OSIS 10 Bible Online

2 OTÖPTINO OSIS 10 - pokoot bible

2 OTÖPTINO OSIS 10

¹Kiwö Reopoam kutang Syekem ompöwölo kikipa kïtuyechï pipö Israel wöloni atökwigh nyinte kïlïkwï pöytoghin.

²Nyini kilïm Yeropoam wero Nepat ngalechoni nyo kimi kïwïngöy kegh koro Misri tömönyorï Solomon, kïmïlegha Misri.

³Keyonta chi kïkur Yeropoam atolapay kïwö nyinte nko pipö Israel löwïr wölo mi Reopoam akïlenchï,

⁴“Kitö papongu nïkisïn parakuncha, kïlenyona ato ighanyi nïkisïnay kipö papongu kïkwïskwïsit ompö acha, kepöghisyewucha nyi.”

⁵Kuyokyï Reopoam pïchay lö, “Opïswante osis cho le sömök.” Kïpechï kegh pïchay.

⁶Atolapay kïwö Reopoam kïngalan nko poy cho kiruröy paponyi Solomon ato kitö kïsöpöy, kïtep chane lö, “Ononekwa lö oyokyinan pïchï lö ne?”

⁷Kuyokyï poyichay lö, “Ato ikaramitunyi aighchï pïchï nyo karam aingölonchï ompö or nyo karam, kïpöghisyewunyi chane kokay.”

⁸Wölo mayangnye Reopoam ngalechoni kimwochï poyï nyinte, kïwö wölo mi chumwak cho kinar tïkwïl akikwigh chane kïlïkwï kirurichi.

⁹Kïtep chane lö, “Ngölyon ne nyo omukekwa okonanïn atoyokyan pïchï kapka kïmwowanïn lö, kanya kïkwïskwïsit nïkisyonay kitö papongu parakuncha?”

¹⁰Kuyokyï chumwak chay kinar tïkwïl lö, “Lenchinö chane tïrus mornenyan nyï mïnïng kïtïl muyeto paponyan.

¹¹Kinïkis rötutyeto paponyan, wölo nïkisitu nyinyan tya, kimungenokwa paponyan syaritin wölo omungenokwa syaritin cho ngwonöch le tokolonoy.”

¹²Otini kiwonyö osiswechay le sömök kïwö Yeropoam nko pïchay löwïr wölo mi Reopoam lenyini kimwochï nyinte chane.

¹³Kuyokyï pöytoghintö Reopoam pïchay ompö sïnyoryö, amayangnye ngalechay kirur poyï nyinte.

¹⁴Kïrïp ngal cho kimwochï chumwak nyinte. Kïlenchï pïchay, “Kigh paponyan nïkisïntönkwa kïyetï, wölo otösan ye nyu nïkisïnoni kïyetï tya. Kïmungenokwa syaritin wölo omungenokwa syaritin cho ngwonöch le tokolonoy.”

¹⁵Ki machata ECHOTYON nyoni kigh ngal cho kikïmwochï Yeropoam wero Nepat kuwerï kuti werkoyon Aiya nyo pö Syilo. Nka nyoni kïgh nyo kigh pöytoghintononi kïtagh ngal cho kimwochï poyï nyinte.

¹⁶Otini kisïwa pipö Israel lö, melö kighan, pöytoghintonay ngalekwa, kuyokyï nyinte lö, “Ne tagh nyo kakïtïngecha ka Daudi nya? Möminye kïgh nyo kïmïlocha wero Yese. Kepe, kemïlisyenö kestonicho we pipö Israel, paytena nyu kongu onkït Daudi!” Kïlenyona kïpechï kegh pipö Israel kestonikwa.

¹⁷Wölo kipayta Reopoam pipö Israel cho kimöngöy kanastina Yuda löwïr.

¹⁸Kiyonta pöytoghintö Reopoam Adoniram nyo kighyongchini ighisyewut cho pö kisiköt wölo kimi pipö Israel, kïlaka nyinte koghïn ntökïma. Nyini kilïm Reopoam ngalechoni, kïlany nkarinyi lawel akuperta kutang Yerusalem.

¹⁹Kitagh nyu pipö Israel paytaghpa pipö kö pö Daudi nko nyete le ye.