Read pokoot 2 OTÖPTINO OSIS 11 Bible Online

2 OTÖPTINO OSIS 11 - pokoot bible

2 OTÖPTINO OSIS 11

¹Nyini kitïta Reopoam Yerusalem, kïghamït mïrön cho le wutï 180,000 cho kipkana Yuda nko cho pö Penchamen, kïporyeghö pipö Israel, atökïpöyit Reopoam paytagh.

²Wölo kingwïnchï ngölyonto Tororöt werkoyon Syemaya chi pö Tororöt.

³“Lenchinö Reopoam wero Solomon pöytoghinto Yuda nko pipö Israel löwïr cho mi Yuda nko Penchamen lö,

⁴lentöy ECHOTYON, ‘Mapa oporyeghö werkökwa pipö Israel, mïlena chi anka tïkwïl katangu ompöwölo pkono ngalechï löwïr wölo omitan.’ ” Kïter nyu pïchay ngala ECHOTYON akïmïlisyö kestonikwa amakïpacha kïporyeghö Yeropoam.

⁵Kimang Reopoam Yerusalem akïtek kanastin cho gheto kegh ompö Yuda.

⁶Kitek Petleem nko Etam nko Tekoa

⁷nko Petsur nko Soko nko Adulam

⁸nko Kat nko Maresya nko Sip

⁹nko Adoraim nko Lakis nko Aseka

¹⁰nko Sora nko Ayalon nko Epron, kanastin cho mi Yuda nko Penchamen.

¹¹Kitek nïyet kwoghïghitu akutö kighyongteghï ori nko töpotoni omisyö nko mwagh nko dipay.*

¹²Atolapay kutö kanastinechoni löwïr longoy nko ngötwö akwigh kwongeritu tya. Kïpayta nyu Yuda nko Penchamen kïlïkwï nyenyi.

¹³Kipka tïsï nko pipö Lawi löwïr cho kimi Israel wölo mi nyinte.

¹⁴Ompöwölo kipïstö pipö Lawi koroswekwa wölo kiyokwïyöy kyakikwa akïpïstö tïkukwa akïpka kutöngwï Yuda nko Yerusalem, ompöwölo kiyon chane Yeropoam nko werkachi lö, tömegh ighisyo tïsö kwighchï ECHOTYON.

¹⁵Kïkïlchï kegh tïsichi cho pöghisyechini wölo kïsogho körkeyïntin nko cho kisoghöy oy nko cho kisoghöy körkeyïntin cho kikigh ompö körkeyïntino mogh.

¹⁶Kïpka pipö Israel löwïr cho kikikutö kïpsach mïkuliskökwa kïyar ECHOTYON Tororöt pö Israel. Kïrïpï pipö Lawi, kïpa kutö ECHOTYON Tororöto papotïnekwa amöros ompö Yerusalem.

¹⁷Kiyetï nyu paytaghpa koro Yuda, akwawesit Reopoam wero Solomon ompö könyis sömök ompöwölo kirïp otöpto kwanta Daudi nko Solomon ompö könyis sömök.

¹⁸Atolapay kwip Reopoam Maalat chepö Yerimot wero Daudi nko nyo pö Apiail chepö Elyap wero Yese,

¹⁹kïyichï kokononi wor sömök: choni kï ompö Yeus nko Syemarya nko Saam.

²⁰Kwip ngat Maaka chepö Apsolom, kïyichï Maaka nyinte Apiya nko Atai nko Sisa nko Syelomit.

²¹Kicham Reopoam Maaka chepö Apsolom kïtïl koruchi löwïr nko koru walak cho kimatarnye. Koruchi löwïr kï ki 18 nko chemïnïngwenichi* cho le 60, kitïng wor cho le 28 nko tipïn cho le 60.

²²Kitö Reopoam Apiya wero Maaka kïpöyï werkökwa, ompöwölo kimököy kwighöy nyinte kïlïkwï pöytoghin.

²³Kichaghta ompö chïreryö werkachi walak kïghömï koro Yuda nko Penchamen nko kanastin löwïr cho kikiwach, akutö chane omisyö nyo wow nyoman akïyörchï kor cho chang.