Read pokoot 2 OTÖPTINO OSIS 12 Bible Online

2 OTÖPTINO OSIS 12 - pokoot bible

2 OTÖPTINO OSIS 12

¹Otini kikiketö Reopoam kïlïkwï pöytoghin akïchïchïm paytaghtanyi akïchïchïm nyinte kïpïstö nyinte nko pipö Israel kïmïkul kirurut pö Tororöt.

²Kipokyï Sisak pöytoghinto Misri Yerusalem ompö könyi mut nyo pö paytaghpa Reopoam, ompöwölo kikikïpïstö chane kirurut pö ECHOTYON.

³Kingwïn Sisak nko nkaritin 1,200 nko pich 60,000 cho kipöy angoletin. Kimeyitisyocha pïchoni kipka nko Sisak cho kipkana Misri nko Lipya nko Sukim nko Etopya.

⁴Kinam kanastin cho wokote cho pö Yuda ntökwit Yerusalem.

⁵Kungwïn werkoyonta nyo kikuro Syemaya wölo mi Reopoam nko kintöghoghi Yuda cho kikikusupchï kegh Yerusalem ompöwölo kiwöghöy Sisak, akïlenchï chane, “Mwoghöy ECHOTYON lö, ‘Kyopïstanïkwa nka nyoni kopïsyokwa Sisak.’ ”

⁶Atolapay kwip kegh kintöghoghichay pö Israel nko pöytoghinte ngwïny akïlö, “Pö man ECHOTYON.”

⁷Nyini kisïwa Tororöt lö, ki kwip kegh ngwïny pïchay kungwïnchï ngölyonto ECHOTYON werkoyon Syemay lö, “Ompöwölo kikwip kegh ngwïny chane mopöranye chane, wölo oghetan chane le wölana, mopöranye Yerusalem ompö mori Sisak.

⁸Kïrkegh kïlenyoni lïku chane mötwori Sisak, atömanyïl kunkïtï chane wölo lata pöghisyenyan nko pöghisyo pöytoghi koroswe walak.”

⁹Kïlenyona kupokyï Sisak pöytoghinto Misri Yerusalem akïcheng kaplawachtina Kö pö Tororöt* nko cho pö kö pö pöytoghin, kurit tïkwïn löwïr, kwip longoy cho kikitanga koltin cho kigh pöytoghintö Solomon tïkwïl.

¹⁰Wölo kigh Reopoam longoy cho pö taghoy kukera chay pö koltin, akutö kintöghoghi ripï cho kiripöy kuka kö pö pöytoghin.

¹¹Asis anka tïkwïl ato wetöy pöytoghintö kïlïtöy Kö pö Tororöt, kungwïnöy ripin kwipu longoy choni, atolapay kuyokta kïpa kö nyo kïripsyegho.

¹²Otini kip kegh ngwïny, kïpïstö nörekyo Tororöt nyinte atö mewur nyinte. Kimi nyo atoni ngala kuletöy nyo karam ompö Yuda.

¹³Kigh kegh Reopoam nyoman akwawesit paytaghtanyi ompö Yerusalem, kitor Reopoam kïpayta ato kitïng könyis cho le 41. Kïpayta könyis 17 ompö Yerusalem, kanasyan nyo kikïl ECHOTYON ompö ortïna pipö Israel kïmïkul kutö kaynenyi atoni, kikuro kame Nama, nyo ngwïno Amon.

¹⁴Kigh ghöyityö ompöwölo kïmayarnye ompö mïkulöwunyi ECHOTYON.

¹⁵Kïlenyona ighisyewut pö paytaghpa Reopoam cho tagh nko cho pö söröm kïmelö kikikirchï kikirut pö werkoyon Syemaya nko nyo pö kirosin Ido nyo rosöy tötut pö pïnwöy cho kikuwerï? Kimi poryo lïkos kwenu cho pö Reopoam nko cho pö Yeropoam kïnomnyö.

¹⁶Kïrapas Reopoam aketïpchï kanasyanta Daudi, kuker werïnyi Apiya kïlïkwï pöytoghin.