Read pokoot 2 OTÖPTINO OSIS 13 Bible Online

2 OTÖPTINO OSIS 13 - pokoot bible

2 OTÖPTINO OSIS 13

¹Kitor Apiya kïpayta koro Yuda könyis 18 nyo pö paytaghpa pöytoghin Yeropoam nyo pö Israel.

²Kipayta könyis sömök ompö Yerusalem. Kikïkuro kame Mikaya, chepö Uriel nyo pö Kipea. Kitor poryot kwenu Apiya nko Yeropoam.

³Kitat Apiya lïk nko mïrön cho le nyökon 400,000 cho kikiketö kïtïpï kïpsach. Kïporyegho Yeropoam lïko Apiya nko lïk nyo pö mïrön cho le nyökon ompö poryot cho le 800,000.

⁴Kughyongö Apiya kutïng pö Semaraim nyo mi kor nyo le kamas ompö Epraim akïlö, “Tere wena Yeropoam nko akwa pipö Israel löwïr!

⁵Kitö monkïtökwanye so lö, kitö ECHOTYON Tororöt pö Israel Daudi kïpayta Israel kokay? Nyinte nko werkachi kïrïp kegh nko kikïniniogh pö partinï?

⁶Wölo kitagh Yeropoam wero Nepat mötworinto Solomon wero Daudi ngala echotyontenyi.

⁷Kinyoryö nyinte nko pich cho le kwïle, werpö ghöyityö, kutö kegh owesyö akïtagh Reopoam wero Solomon ato kitökïmïnïng, kitïng kisyonöt akimemuknye kïrïnta chane.

⁸Olentekwa ye nyu omuköy orïntone pöyunöto ECHOTYON nyo mi mori werpö Daudi ompöwölo ochikwa söpïch nyo wow atïngetö mogh cho pö koltin cho kighwokwa Yeropoam kïlïkwï tororötinekwa.

⁹Ayo, melö so kyayonaka tïsi cho pö ECHOTYON, werpö Aron nko pipö Lawi, akïlchï kegh tïsï arïp otöptino pipö koros walak? Anka tïkwïl nyo ngwïnöy kutïlilö kegh ngaryanta kirïk anta mökol mut nko odeny, kïlïku tïsin nyo pö tïkuchay oghekwa tororötin.

¹⁰Wölo ompö chï le acha, ECHOTYON Kï Tororötïncha akï tomönye kepïstenöcha nyinte. Kïtïngetecha tïsï cho pöghisyechini ECHOTYON cho le werpö Aron nko pipö Lawi cho ighöy ighisyengwa.

¹¹Töni chane Tororöt ropöw cho kïpelöy nko cho ngutoy cho onyïn tökwoghö nko asïna anka tïkwïl nko ompö mönon anka tïkwïl, tötoy makaten cho pö kiporunöt cho pö kiporunöt ompö mesa nyo tïlil nyo kikigha koltin cho pïchighöch nko wölo nöghyegho motï nöghöy mönon anka tïkwïl ompöwölo kïrïpecha ighisyo ECHOTYON Tororötïnyo, wölo kyopïstekwa nyinte.

¹²Arose lö, mi Tororöt nko acha, kintöghoghintencha nyinte akïmi tïsichi cho tïng kontin cho kutöy konti rira poryot nko akwa. Werpö Israel moporyeghö ECHOTYON Tororöt pö papotïnekwo ompöwölo momukekwanye.”

¹³Kikikïyonta Yeropoam pich kïpkana chane pötogh, kïlenyona kimi lïkenyi tawu Yuda nko cho kilepisïyi ompö löt.

¹⁴Otini kisïwa pipö Yuda lö, kinam poryot chane löt nko tagh, kïrirchï Tororöt akïkut tïsï kontin.

¹⁵Atolapay kuchö rira poryot pipö Yuda akï nyini kichö rira pipö Yuda. Kïrïnta Tororöt Yeropoam nko pipö lïko Israel kïmïkul ompö tawu Apiya nko nyo pö pipö Yuda.

¹⁶Kiryagh pipö Israel kïryagha tawu Yuda, kutö ECHOTYON chane mori pipö Yuda.

¹⁷Kirïnta Apiya nko piko lïkenyi ompö pöryononi, kipar nyökon cho pö okumpö Israel, mïrön cho le 500,000.

¹⁸Kikïrïnta nyu monïngo Israel atoni, kïrïnta cho pö Yuda ompöwölo kitwoytoy kegh pipö Yuda ECHOTYON Tororöt pö kukötinekwa.

¹⁹Kiyon Apiya Yeropoam ntö kïsara nyinte kanastina: Petel nko Yesana nko Epron nko kestoni cho kiwit kanastinechoni.

²⁰Mönyorïnye owesyö Yeropoam ompö osiswo Apiya, kiwir Tororöt nyinte kïma.

²¹Wölo kiyetï owesyo Apiya nyoman, kip kor cho le taman nko angwan, kiyichï wor cho le 22 nko tipïn cho le 16.

²²Ighisyewut pö Apiya walak nko otöptanyi nko ngalechi kukirote ompö kitapu werkoyon Ido.