Read pokoot 2 OTÖPTINO OSIS 14 Bible Online

2 OTÖPTINO OSIS 14 - pokoot bible

2 OTÖPTINO OSIS 14

¹Kïrï nyu Apiya, ketïpchï nyinte kanasyanta Daudi, kuker werïnyi Asa kïpayta koro Yuda. Kïtöpö koro Yuda ompö kalya ompö könyis taman.

²Kigha Asa nyo karam nko man ompö tawu ECHOTYON Tororötïnyi.

³Kingany ato kïpelo amörostin ompö tororötin walak nko wölo kïsogho körkeyïntin akï tïwu koghay tïlil akïtör wölo kighyongo Asyera.*

⁴Akïmwochï Yuda kïyar ECHOTYON Tororöt pö papotïnekwa akïrïp kirurutkö nko kiyomisutkachi.

⁵Kinategha wölo kïsogho körkeyïntin nko ato kïpelo amörostin cho ngutoy cho onyïn ompö kanastina Yuda akitïng koro Yuda kalya osiswo paytaghtanyi.

⁶Kitek nïyet kuwik kanastina Yuda ompöwölo kimi kalya korenyi. Kimöminye poryot nyo kiporyö pipö Yuda könyiswechoni. Ompöwölo kitö ECHOTYON payasat.

⁷Kimwochï Asa pipö Yuda lö, “Keteka kanastinechï aketek nïyet cho koghöch kïpa yïm nko wölo kïmörörisyegho nko kukot cho echön nko möröw, tökïnyincha kore ompöwölo kikeyaracha machata ECHOTYON Tororötïnyo akikïkonecha kalya ompö woptine löwïr.” Kïteksyö akïsïkönon.

⁸Kitïng Asa pipö lïk 300,000 cho pö Yuda cho kitïng longoy nko ngötwö nko pipö lïk walak cho pö Penchamen 280,000 cho kipöy longoy akiwutïtoy kotï, choni löwïr kï ki mïrön pö poryot cho owesöch.

⁹Kïsetyï Sera nyo pö Etopya kïpar kegh nko chane kungwïn nko lïk nyo pö mïrön cho makïrar nko nkaritin 300, kingwïn ntökwitï Maresya.

¹⁰Kïwö Asa kuryam nko nyinte, kïtat lïkengwa kïtïpï kïpsach ompö mpöghoghyo Sepata nyo mi Maresya.

¹¹Kïlokyï Asa ECHOTYON Tororötïnyi lö, “ECHOTYON, möminye chi nyo lata nyi nyo ngöroköy cho nyarkalal ompö kwenu cho tïng owesyö. Ngarakecha, we ECHOTYON Tororötïnyo, ompöwölo kitwoytonecha kegh nyi kakïpkanacha kepar kegh nko söpïchï wöw le nyï ompö kaynengu. We ECHOTYON, ichinyi Tororötïncha. Mekany kïkwol kegh ptangengmöt ompö tawungu.”

¹²Kïlenyona kïrïnta ECHOTYON pipö Etopya kïsïwïyi Asa nko pipö Yuda, kiryagh pipö Etopya nyoman.

¹³Kïrïp Asa nko lïkenyi pïchoni ntö kurel Kerar, kikïpar pipö Etopya amöminye nyo le ompö akong nyo kichïwït, ompöwölo kikingïr chane ompö tawu Tororöt nko ompö tawuto pikachi, kikasan pipö Yuda tïkwïn cho chang cho kipïtö pïchoni.

¹⁴Kipar kunyar kanastin löwïr cho kiwit Kerar ompöwölo kingwïnchï otyogh pö Tororöt pich cho kimöngöy kanastinechoni. Kingagh kanastine tïkwïl, ompöwölo kimi tïkwïn cho chang ori.

¹⁵Kipar ngat kestoni pich cho kitïng kyak akïrany kechir nko ngaror cho chang nko tamasay, atolapay kïmïlisyö kutang Yerusalem.