Read pokoot 2 OTÖPTINO OSIS 15 Bible Online

2 OTÖPTINO OSIS 15 - pokoot bible

2 OTÖPTINO OSIS 15

¹Kingwïnchï Mïkulöwu Tororöt Asaria wero Oded.

²Kïwö kuryan nko Asa akïlenchï nyinte, “Terwante Asa, aiter Yuda nko Penchamen kïmïkul: mi Tororöt nko akwa ato tomitenökwa nko nyinte ato ayarakwa nyinte onyorunekwa, wölo ato opïstekwa nyinte kïpïstenokwa.

³Kitïpïyö pipö Israel osis cho chang kïpuryö Tororöt pö man akimöminye tïsin nyo kinetöy, akimöminye kirurut.

⁴Wölo otini ompö nyarïl, kimïlisyö wölo mi ECHOTYON Tororöt pö Israel akïyar nyinte ntökïnyorï.

⁵Kimöminye kalya osiswechoni ompö chi nyo kiwetöy anta kingwïnöy korononi ompöwölo kimi tapan nyo wow pïchoni kimöngöy korononi.

⁶Kimi kore anka kïpöröy kore anka akupokyï kanasyante anka kanasyante anka, ompöwölo kitö Tororöt chane kisusut nko kömpölelut cho chang.

⁷Wölo onyökönitu cho le akwa makany kwoghochö ewunekwa, ompöwölo onyorunekwa ropöwon ompö ighisyenkwa.”

⁸Nyini kilïm Asa ngalechoni pö werkoyon Asaria wero Oded kïnyakanit, akuwurta tororötin walak ompö koro Yuda kïmïkul nko Penchamen nko ompö kanastin cho kikikïpörï nyinte ompö kutïngkoti koro Epraim. Kigh akïtek ngat ato kïpelo amöros pö ECHOTYON nyo kimi tawu Kö pö Tororöt.*

⁹Kïkur nyu pipö Yuda nko cho pö Penchamen löwïr nko cho pö Epraim nko Manase nko cho pö Simion cho kimang kwenungwa. Ompöwölo kipkana pich cho chang Israel otini kisïwa lö mi ECHOTYON Tororötïnyi nko nyinte.

¹⁰Kïlenyona kusupchï kegh Yerusalem ompö arawa sömök ompö könyi taman nko mut nyo pö paytaghpa Asa.

¹¹Kitö ECHOTYON amöros asisoni ompö ngataran cho kirongu, eghin 700 nko kechir 7,000.

¹²Kwomchï kegh muma* kïyar ECHOTYON Tororöt pö kukötinekwa ompö mïkuliskökwa nko söpönwekwa.

¹³Akï lö, chi anka tïkwïl nyo möyörönye ECHOTYON Tororöt pö Israel, ketïghöy kïma, ato kö mïnïng anta kö wow, mïrön anta korka.

¹⁴Kyam muma ompö tawu ECHOTYON, ompö ngalanat nko kiteghat nko ompö kutata kontin nko kuy.

¹⁵Kingörekyö pipö Yuda löwïr ompö mumanoni ompöwölo kyam muma ompö mïkuliskökwa akikïyar nyinte ompö pïrchin nyo wow. Kinyorï chane nyinte, akutö ECHOTYON chane kalya kuwit.

¹⁶Kiyon pöytoghintö Asa kame Maaka ompö ngacharu paytagh ompöwölo kikikwigh körkeyïntino Asyera.* Kirultö Asa körkeyïnoni pö Asyera akïtïghotïgh akïpel ompö mpöghoghyo Kidron.

¹⁷Wölo menateghanye Asa wölo kïsogho körkeyïntin ompö Israel. Wölo ompö choni löwïr kï kitö nyinte mïkulöwunyi Tororöt ompö osis löwïr.

¹⁸Atolapay kwipï Kö pö Tororöt tïkwïn cho kikïlchï paponyi Tororöt nko cho kikïl nyinte, silpen nko koltin nko kari walak.

¹⁹Kimöminye poryot anka ntö kïtenö kwit könyi 35 nyo pö paytaghpa Asa.