Read pokoot 2 OTÖPTINO OSIS 16 Bible Online

2 OTÖPTINO OSIS 16 - pokoot bible

2 OTÖPTINO OSIS 16

¹Otini kitïta könyi 36 nyo pö paytaghpa Asa, kïset Paasya pöytoghinto Israel kïwö kïporyö nko pipö Yuda akïtek Rama nayat nyo kogh nyo kïripsyegho atömömi chi nyo lïtöy sany anta nyo lïtu ori wölo mi Asa pöytoghinto Yuda.

²Atolapay kïcheng Asa silpa nko koltin ompö kaplawachtina Kö pö Tororöt* nko cho pö kö pö pöytoghin akutötö kepchï Pen Adad pöytoghinto Sirya nyo kimöngöy Damaska akïlenchï,

³“Nya kïtöpö chomnyogh ompö kwenunyan nko nyi, le wölo kilata ompö kwenu paponyan nko papongu, koropunyi silpa nko koltin, wïyö pesyenö nko Paasya pöytoghinto Israel, atökïmala kegh wölo omitan.”

⁴Kïterchï pöytoghintö Pen Adad Asa ngalechi, akïyonta kintöghoghiko piko lïkenyi kïpa kïporyeghö kanastina Israel. Kïpa kïporyö ntökïrïnta Iyon nko Dan nko Apel Pet Maaka nko kanastina Naptali löwïr cho pö kaplawachtin.

⁵Nyini kilïm Paasya ngalechoni kïpïstö teksyo Rama, melö kitö kulet ighisyö teksyö ompö Rama.

⁶Atolapay kumït Asa, pöytoghinto Yuda, pipö Israel kïmïkul kïpa kurit köghïn nko ket cho kiteksyegho Paasya kïteko Rama kwip kïteka Kepa nko Mispa.

⁷Kungwïn werkoyontö Anani osiswechoni wölo mi Asa pöytoghinto Yuda akïlenchï nyinte, “Ompöwölo itighonenyi kegh pöytoghinto Sirya, ametwaytenyinye kegh ECHOTYON Tororötïngu, kachïwïteninyi nyu lïko pöytoghinto Sirya.

⁸Kitö kimölïknye nyo wow pipö Etopya nko Lipya, chay kitïng nkaritin nko pich cho chang cho kipöy angoletin so? Wölo ompöwölo kitwaytenyi kegh ECHOTYON kikoninyi nyinte rïntena chane.

⁹Ompöwölo pestoy konyi Tororöt ompö ngwïny kïmïkul, akutöni owesyö chane cho ighöy mïkuliskökwa man ompö tawu Tororöt. Keghanyi kïyoni ompö sölwontön ompöwölo kïngeta ye kutang tagh iporyonyi.”

¹⁰Kïnarek Asa ompö werkoyontonay, kïlenyona kïnam akïtorchï nyinte chela. Kinyaril kong Asa pikö walak tïkwïl osiswechoni.

¹¹Kirote ighisyewut pö Asa löwïr kïngata cho pö tagh ntökwit cho pö löt ompö Kitapu Lökoyo pöytoghi Yuda nko Israel.

¹²Ompö könyi 39 nyo pö pöytoghin Asa, kïnam sömewo wölo mayarnye Tororöt kungarak nyinte ompö kichïrtanyi, wölo kiyar chepsakïtis.

¹³Kirapas Asa ompö könyi 41 nyo pö paytaghtanyi.

¹⁴Ketïpchï pïrïm nyo kikïpal nyinte ompö kanasyanta Daudi, wölo kinyïghitate tïkwïn cho ngutoy cho onyïn cho kigh pich cho chïreröch ompö ngala sakït akenagh ma nyo wow nyo ompö konyïtanyi.