Read pokoot 2 OTÖPTINO OSIS 17 Bible Online

2 OTÖPTINO OSIS 17 - pokoot bible

2 OTÖPTINO OSIS 17

¹Kiker Yeosyapat ngacharuto kwanta, kwigh kegh nyinte kïporyö nko Israel.

²Kitö pipö lïk kanastin löwïr cho kikiwach cho pö Yuda nko kanastina Epraim cho kikikïcheng papoto Asa.

³Kimi ECHOTYON nko Yeosyapat ompöwölo kirïp otöp nyo kipö tagh nyo pö paponyi, masaghnye Paal.*

⁴Wölo kiyar Tororöt pö paponyi akïrïp kirurutkachi, amarïpnye otöptino pipö Israel.

⁵Kïlenyona kwigh ECHOTYON paytaghtanyi kïchïchïm tya kwipchï pipö Yuda löwïr Yeosyapat ropöw kïsïkönon akïnyorï konyït nyo wow.

⁶Ki nyakan mïkulöwunyi ompö ortïna ECHOTYON kulet tagh kunyar wölay syolote nko Asyera* ompö Yuda.

⁷Ompö könyi sömök nyo pö paytaghtanyi kiyoktö Penail nko Opadia nko Sakaria nko Netanel nko Mikaya cho kile kintöghoghï kunetisyö ompö kanastina Yuda.

⁸Kimi pipö Lawi nko chane choni kï ompö: Syemaya nko Netania nko Sepadia nko Asael nko Syemiramot nko Yeonatan nko Adonicha nko Topiya nko Topadoniya. Kimi tïkwïl Elisyama nko Yeoram cho kile tïsi pipö Lawi.

⁹Kunetisyö ompö Yuda akitïng kitapu Kirurut* pö ECHOTYON, kipestegha kanastina Yuda löwïr kunetotoy pich.

¹⁰Kichumchï otyogh pö ECHOTYON pöytoghï löwïr cho pö koros cho kimang kuwit Yuda akimökïpacha kïpar kegh nko Yeosyapat.

¹¹Kwipchï pipö Pilisti walak Yeosyapat ropöw, akwipchï silpa kïlïkwï surï kwipï pipö Arepya mökol 7,700 nko kwöghe 7,700.

¹²Kïyetï Yeosyapat akwawesit nyoman, kïtek wölo kikïmöröro pung nko kanastin cho kïrorchini tïkwïn ompö Yuda.

¹³Akitïng kaplawachtin cho echön ompö kanastina Yuda akitïng mïrön pö lïk cho le nyökon cho kimi Yerusalem.

¹⁴Kiyitötengwa kïrïp kegh nko koriko papotïnekwa kï chï: ara Yuda kï Adna: pich 300,000 mïrön cho le nyökon cho köromöch nyo rïpöy nyinte kï Yeoanan: pich 280,000 nyo rïpöy nyinte kï Amasya wero Sikri (nyo kikonï kegh kwigh ighisyo ECHOTYON ompö chomnyenyi): pich 200,000 ara Penchamen kï Elyada (chi pö lïk nyo körom akï nyakan): pich 200,000 cho pö kïwantis nko longoy nyo rïpöy nyinte kï Yeosapad: pich 180,000 cho kinap karikwa pö lïk akimi kïpsach kïporyö.

¹⁹Kipöghisyechini pïchoni pöytoghin akimi walaka cho kitö pöytoghintö kanastin cho wokote ompö Yuda kïmïkul.