Read pokoot 2 OTÖPTINO OSIS 18 Bible Online

2 OTÖPTINO OSIS 18 - pokoot bible

2 OTÖPTINO OSIS 18

¹Otini kimakosit Yeosyapat pöytoghinto Yuda, akwororit akïsich konyït nyo wow, kïtat kwip kegh monechi nko monïngo Aap.

²Nyini kiwer könyiswö cho te, kïwö Yeosyapat Samaria kïrutoghchï pöytoghin Aap. Kïyeng Aap kechir nko eghin cho chang kïyenchï Yeosyapat nko pich cho kimito tïkwïl, Atolapay kïkïnkïn nyinte kïpa kupokyï Ramot Kiliad.

³Kïlenchï Aap pöytoghinto Israel Yeosyapat pöytoghinto Yuda, “Ayo, iwetenyi nko ani iporyegho kanasyanta Ramot Kiliad?” Kuyokyï Yeosyapat lö, “Oghan kïgh nyo ighenyi, akepetecha nko lïkenyan tïkwïl poryot nko nyï.”

⁴Atolapay kulet tagh Yeosyapat kïmwochï pöytoghinto Israel lö, “Wölo nyagha tepa ECHOTYON.”

⁵Kïlenyona kïkur pöytoghinto Israel werkoy cho le mïrön, cho le 400 akïtep lö, “Owan oporyeghö kanasyanta Ramot Kiliad nya anta ewo?” Kuyokyï werkoyichay lö, “Wïyö poryeghenö koninyi Tororöt owesyö nyo irïnteghonyi chane.”

⁶Wölo kïlö Yeosyapat, “Möminye sö werkoyonto ECHOTYON anka yeteyi nyo kimukecha ketepone ngölyon?”

⁷Kuyokyï pöytoghinto Israel Yeosyapat lö, “Mito akong nyo kïkuro Mikaya wero Imla. Kimukecha ketepe nyinte ngölyonto ECHOTYON. Wölo oreyan nyinte ompöwölo möminye kïgh nyo karam nyo ngoröy ompö okuntönyan ngorchinanïn nyinte ngal cho ghach chik.” Kuyokyï Yeosyapat lö, “Ewo, pöytoghin memwoghöy le nyona.”

⁸Kïlenyona kïkur pöytoghinto Israel yetïn akonga akïmwochï lö, “Wïye mïtuna Mikaya wero Imla lawel.”

⁹Kimi pöytoghichoni kwodeny kïtïpisot ngöcherwekwa cho pö paytagh, ompö sanypa kuka kanasyanta Samaria ato kïtïgho pagh, kiloköy chane sïrokökwa cho pö paytagh, kïmi werkoyichay kïngorsyegho tawungwa.

¹⁰Kwigh Sedekia wero Kenana kuyo karïn akïlö kölö ECHOTYON, “Iporyeghonenyi pipö Sirya ompö kuyechï tökïtenö rïntenanyi.”

¹¹Kïngor werkoyichay walak lenyini kïmwoghöy lö, “Wïyö poryeghenö Ramot Kiliad töni ECHOTYON kanasyantanoni moriku.”

¹²Kimi atoni chichay kikïyonta kïwö kïkurï Mikaya kïmwochini nyinte lö, “Ingor lö, nyoru pöytoghintö rïntagh, ompöwölo kikïngor werkoyi walak lenyoni.”

¹³Wölo kuyokyï Mikaya lö, “Kïle otini söpöy ECHOTYON, omwoghan lenyini kamwa Tororötïnyan.”

¹⁴Otini kitïta Mikaya wölo mi pöytoghinto, kïtep pöytoghintö Mikaya lö, “Mikaya, mïchini kepecha keporyenö nko kanasyanta Ramot Kiliad anta ewo?” Kuyokyï Mikaya lö, “Ape oporyeghenö ompöwölo töni ECHOTYON kanasyantanoni moriku!”

¹⁵Wölo kïlenchï pöytoghintö nyinte, “Kyomwowunyi kïnyïl cho chang lö, ato ingölonöy nko ani ompö kaynata ECHOTYON, kïmïchini mwaghanyi ngala man?”

¹⁶Kuyokyï Mikaya lö, “Kyasïwan pipö Israel löwïr kitoytoyö ompö kutïngkot le kechir cho mötïnye mösöwon. Kïmwa ECHOTYON lö, ‘Mötïngcha pïchï kintöghoghin, nya kïmïlisyö kestonikwa ompö kalya.’ ”

¹⁷Kïlenchï pöytoghinto Israel Yeosyapat, “Olentan komwowunyi nya lö, möngorönye chichï kïgh nyo karam kutöngwanïn kïpoto ghöyityö pat.”

¹⁸Atolapay kïlö Mikaya, “Tere nyu ngölyonto ECHOTYON! Kyasïwan ECHOTYON kïtöpo ngacharunyi pö paytagh nko malaykenichi löwïr cho kighyongo ewu tagh nko ewunyi nyo pö löt.

¹⁹Atolapay kïtep ECHOTYON lö, ‘Ngo nyo lïsöy Aap pöytoghinto Israel kïwö kïporyeghö Ramot Kiliad atökepörchï wölini?’ Kïmwa malaykayan ngölyon, kïmwa anka nyo sis,

²⁰ntökïtenö kungwïn mïkulögh akong kughyongö tawu ECHOTYON akïlö, ‘Ani nyo olïsöy nyinte!’ Kïtepa ECHOTYON lö, ‘Ilïsenyi lö ne?’

²¹Kuyokyï lö, ‘Owetan oghöy werkoy pö Aap löwïr kïmwa putintön.’ Atolapay kïlenchï ECHOTYON, ‘Wïyö lïsa nyinte. Imukunenyi.’ ”

²²Kïlenyona kuwanta Mikaya kïlö, “Kikutö ECHOTYON werkoyiku löwïr mïkulögh nyo pö lïsa. Ompöwölo kakukwïtunyi ECHOTYON kel nyo gha.”

²³Atolapay kïwö werkoyontö Sedekia wero Kenana kïrich Mikaya akurapach lalapka akïlenchï, “Oyï ato köpïstanïn Mïkulöwu ECHOTYON akungwïn kïngölonunyi?”

²⁴Kuyokyï Mikaya lö, “Inkïtunenyi ato itï asis nyo imukyinenyi wete wïnyone kegh kot nyo pö ori.”

²⁵Kïlö pöytoghintö Israel, “Anama Mikaya ayoda kïwö wölo mi Amon, wowïn pö kanasyan nko wölo mi Yoas wero pöytoghin.

²⁶Atolapay olenchï, ‘Kölö pöytoghintö okörchinö chichï chela, apagha omisyö nyo le kite nko pögh tïkwïte tökïtenö amïlan ompö kalya.’ ”

²⁷Kïlenchï Mikaya, “Ato töp temïlenyi ompö kalya kïmelö kingölonwanïn ECHOTYON.” Atolapay kïlö, “Akwa löwïr, atera ngalechan!”

²⁸Kïlenyona kïnget Aap pöytoghinto Israel nko Yeosyapat pöytoghinto Yuda kïpa kïpöryö nko kanasyanta Ramot Kiliad.

²⁹Kïlenchï pöytoghinto Israel Aap, Yeosyapat pöytoghinto Yuda, “Owöghökan kegh oloköy sïro cho melö pö paytagh alïtön poryot, wölo lakanyi nyo le nyi sïroköku pö paytagh.” Kïwaghach kegh Aap pöytoghinto Israel kulak sïro walak atömökïsöwï Atolapay kïwö kïlït poryot.

³⁰Kikimwochï ato le tagh pöytoghinto Sirya pikachi cho pö lïk cho kighyongchini nkarinechi lö, “Moporyeghö chi anka tïkwïl nyo wow anta nyo mïnïng, oporyeghö pöytoghinto Israel kïpoto.”

³¹Nyini kïsïwa pïchay kötöy angoletin Yeosyapat, kïlelta pöytoghinto Israel kïpa. Kïlenyona, kutang wölo mi nyinte atökïporyeghö. Wölo kuta Yeosyapat akïghet ECHOTYON nyinte akulyoktö poryonay.

³²Nyini kisöwï pïchay kötöy angoletin lö, melö pöytoghinto Israel kuchal akïmïlisyö.

³³Atolapay kïnget chi pö lïk nyo pö Sirya akong kïwutïtö kotöt nyo kisamta, kïwö kotonay kïwut pöytoghin Aap ato kituyechï nöputöyiko sïrenyi nyay pö karïn. Kïlenchï mötworintenyi nyo kikötöy angole, “Waghaka nkaritö kïwö poryot löt kikekotönanïn!”

³⁴Kingwanit poryot asisoni nyoman, akwatoni kokay kimi pöytoghinto Israel kïtighö kegh nkarinyi kïpörtoy onkuntö wölo kiporyegho pipö lïko Sirya tökwimön. Kïma nyu nyinte otini kiröytoy asis.