Read pokoot 2 OTÖPTINO OSIS 19 Bible Online

2 OTÖPTINO OSIS 19 - pokoot bible

2 OTÖPTINO OSIS 19

¹Kïnyapana Yeosyapat pöytoghinto Yuda nyo karam katanyi nyo pö paytagh nyo mi kanasyanta Yerusalem.

²Kïwö werkoyonta nyo kïkuro Yeu wero Anani wölo mi pöytoghintö Yeosyapat akïlenchï, “Ayo, mïchininyi so ngaraka mwokïyis ainama kongot pich cho töghöy ECHOTYON? Inyorunenyi nyu lïkïp nyo ngwïno wölo mi ECHOTYON ompö kïyoni keghanyi.

³Wölo kïrkegh kïlenye nyoni, mi köromnyö nyo itïngetenyi, ompöwölo kinateghenyi körkeyïntïno Asyera* tororötay le korka, aimukyinyi nyoman ompö mïkulöwungu iyar Tororöt.”

⁴Kïrkegh kimpuröy Yeosyapat Yerusalem kiwetöy kïrutoghchï pich kïngeta Persyepa ntökwit kamaspa Epraim, kigh lenyoni atö kumïtï pich kuyokyï kegh ECHOTYON Tororöto papotïnekwa.

⁵Kikïl kirwokot akutö kanastina Yuda löwïr cho kikïtek nïyet kuwit

⁶akïlenchï kirwokotichay, “Atatap lasiny ngal otini omitekwa orwoköy ompöwölo kirwok nyo orwokekwa kïmelö pö ptangengmöt wölo pö ECHOTYON, akïmi nyinte nko akwa otini omutekwa ngal ompö kirwok.

⁷Nya kïtöpö kiwaghata ECHOTYON nko akwa, aros wölo opöghisyeghtoy ompöwölo möchömönye ECHOTYON Tororöt putintön anta chamata pich walak ketagh walak anta amata asoya.”

⁸Kikïl Yeosyapat ngat pipö Lawi nko tïsï nko pich cho kighyongchini ortïna pipö Israel atökïmutöy kirwok ompö ngal cho gheghöy okumpö ECHOTYON nko cho pö syölut. Atolapay kïmïlisyö kïpa Yerusalem.

⁹Kïmwochï chane lö, “Opöghisyenö ompö kiwaghata ECHOTYON nko kighanat nko ompö mïkulöwu löwïr.

¹⁰Ato chumwokwa ngala syölut cho kïsötoy kokwö cho pkono werkökwa cho möngöy kanastinekwa, syölut pö tïwö anta cho nomnyoto kegh nko kirurut, ongölonchï chane wölo ngölontoy ompö kokwö atömölelchi ECHOTYON. Atomaghakwanye lenyoni, onyorunekwa sito ECHOTYON nko werkökwo. Wölo ato opöghisyekwa kuten, kï möwirokwanye choghïn nyo gha.

¹¹“Ghyongchini Amaria Tïsin nyo Wow* ngal löwïr cho pö ECHOTYON, kïlïkwï Sepadia wero Ismael kighyongtoghinto kö pö Yuda nyo ghyongchini ngal löwïr cho pö pöytoghin, kïlïkwï pipö Lawi yetïntin ompö akwa. Alïkwï nyökon akaman ngalechï, nya kïtöpö ECHOTYON nko chane cho ighöy nyo karam.”