Read pokoot 2 OTÖPTINO OSIS 2 Bible Online

2 OTÖPTINO OSIS 2 - pokoot bible

2 OTÖPTINO OSIS 2

¹Kimut akonga Solomon kïtek kö nyo kïsogho Tororöt ompö Yerusalem akïtekyï kegh kö nyo pö paytagh.

²Kitö Solomon mïrön cho le 70,000 kïlïkwï cho kösönisïyi nko pich 80,000 cho chötöy köghin ompö kutïng, kïlö 3,600 cho kighyongchini pïchoni.

³Kutötö Solomon kut, kutö Uram pöytoghinto Tiro lö, “Le wölo kigh chi nyi paponyan Daudi, ipchï nyinte tarakit kïteka konyi nyo möngöy, ighwante lenyoni tïkwïl.

⁴Ompöwölo karich otekyan kö nyo kïsölo kaynata ECHOTYON Tororötïnyan, akï wölo kïpelchinegho nyinte amörostin cho ngutoy cho onyïn akïlïkwï nyu ato kitötegho amörostin ompö osis löwïr, nyo pö makatyanta kiporunöt nko amörostin cho kïpelöy tökwoghö nko mönon nko cho pö asispa Sapato* nko Ichon pö Relïn pö Arawa nko ichontino ECHOTYON Tororötïncha le otini kikïmwochï Israel kwigh lenyoni kokay.

⁵Köyoni otekan kïwow, ompöwölo wow Tororötïncha kïtïl tororötin walak löwïr.

⁶Akï ngo nyo muköy kïtekyï nyinte kö, ompöwölo mömïchininye nyinte ompö nyini le mïröt anta yïm nyo pö yïmwöy. Ochan nyu ngo totekyï nyinte kö, kïpoto otekyan wölo kïpelchinegho nyinte amöros pat?

⁷Kïlenyona nyu yokwante chi nyo le tïngan nyo nkït kïpöghisyegho koltin nko silpa nko kari akwanga nko karïn, akunkït wölo kïkörtoy sïro cho le anankis cho orusöch nyo pïrir nko cho pïröch cho tuwöch cho nyörilöch nko pich cho chïreröch akïtïngan ompö kichatat nko nyo pö koghïn, kipöghisyö akïtöpö nko pich cho ngöghomöch cho mi nko ani ompö Yuda nko Yerusalem, cho kikïl paponyan Daudi.

⁸Yokwante tïkwïl tarakit nko saypras nko tilok nko keti alkum cho pö Lepanon, ompöwölo onkïtön lö, nkït mötworiku kurultoy keti Lepanon, tösöy kegh mötworichan nko mötworiku.

⁹Atökwighwanïn ket cho chang, ompöwölo kö nyo otekan kï wow akïpöyitu töngönchin.

¹⁰Okonunan ompö mötworiku: nkanun tantin 2,000 nko matay tantin 2,000 nko dipay* liten 400,000 nko mwaghpa orolwö liten 400,000.”

¹¹Kuyokyï Uram pöytoghinto Tiro Solomon palalyan, nyo kikir lö, “Ompöwölo chömöy Tororöt pikachi nka nyoni ketöninyi lïkunanyi pöytoghintengwa.”

¹²Kïmwa Uram ngat lö, “Soyönote ECHOTYON Tororöt pö Israel, nyo kigh yïm nko ngwïny, nyo kitö pöytoghin Daudi worö nyo chïrer, kikitö ngöghomnyö nko pköchin nyo tekyïni Tororöt kö akï tek nyenyi nyo pöytegho.

¹³Koyokwan ye nyu chi nyo le tïngan, nyo kikitö chïreryö, nyoni kï Uram paponyan.

¹⁴Wero korka nyo pö tipi ompö Dan akï paponyi kï chi nyo kipö Tiro. Kikinet nyinte kïpöghisyeghö koltin nko Silpa, akwangen nko karïn, köghïn nko ket, anankis cho orusöch nko nyo pïrir, cho tïwöch nyo nyaril nko nyo pö katani nyo karam nko nyo pïrir, nkït kuchat kichatat anka tïkwïl akwighöy kïgh anka tïkwïl nyo kenan nyinte lö, oghöy atö ketö nyinte kïpöghisyeghö nko piköku cho ngöghomöch cho pö echotyontenyan Daudi papongu.

¹⁵Kïlenyona nya kuyokyï echotyontenyan mötworichi nkanun nko matay nko mwaghpa orolwö nko dipay le otini kikïmwa.

¹⁶Kirulecha ket anka tïkwïl nyo imökenyi ompö Lepanon akeratacha kepunyi kuwerï nanam ntökwitï Yopa, ateritö nyinte kïpa Yerusalem.”

¹⁷Atolapay kuyit Solomon pïnot löwïr cho kimi koro Israel, le wölo kiyitïtöy chane paponyi Daudi, kenyorï pich 153,600.

¹⁸Kutö Solomon pich cho le 70,000 kuritisyö, kutö pich 80,000 kïlïkwï cho chötöy köghïn ompö kutïngkot nko cho kighyongchini pich kwigh ighisyö cho le 3,600.