Read pokoot 2 OTÖPTINO OSIS 20 Bible Online

2 OTÖPTINO OSIS 20 - pokoot bible

2 OTÖPTINO OSIS 20

¹Nyini kimuchö ngalechoni, kïset lïko pipö Moap nko Amon nko pipö Meun cho te, kïpa kïporyeghö Yeosyapat.

²Kwipchï pich walak Yeosyapat kut lö, “Pïnï yi lïk nyo wow nyo owuno Edom, nanampa Paryan antakwagh akikwitï ye Asaso Tamar.” Kïkuro kayne anka nyo pö Asason Tamar, Enkedi.

³Kuwöghisyö Yeosyapat, akïtep ECHOTYON kingörokut, akïmwatïta kïkïrur pich löwïr ompö koro Yuda kïmïkul.

⁴Kïghamïtï kegh pipö Yuda löwïr kïsom kingörokut ECHOTYON. Kïchïkïluna kegh kanastina Yuda löwïr kïpka Yerusalem kïsom ECHOTYON kingörokut.

⁵Kughyongö Yeosyapat kwenu söpïch pö pipö Yuda nko cho pö Yerusalem ompö tawu kasaru Kö pö Tororöt* nyo kitö kewoköy.

⁶Akïmwa lö, “ECHOTYON Tororöt pö papotïnecha, mechinyinye so Tororöt nyo imitö yïm, aichï pöytoghinto pöytoghï cho mi ngwïny kïmïkul? Itïngetenyi owesyö aimukenyi amöminye chi nyo mukinyi.

⁷Ayo möminye so Tororöt nyo kiyon pich cho kipö koronï otini kilïtu pipö Israel koronetenyi,” aitönönyi pipö ara kö pö kongengu Apraam kïlïkwï nyingwa kokay.

⁸Akikïmöngisyö akïtekunyi kö nyo kïsoghoninyi, kunkït lö,

⁹ato nyorï chane kömpölelyö anka tïkwïl nyo lenye: pörsyö, anta sömewut cho ghach anta kömöy, kïpkonöy chane kughyongö köyete kïsoghoninyi nko tawungu ompöwölo mi kaynengu köyete, akwipunyi lokeko nyörïlwokökwa, ateterchinö lokekwa aisörï chane.

¹⁰Kanget ye nyu pipö Amon nko Moap nko cho pö kutïng pö Seir chanya kimepïsinyinye pipö Israel kïlït korengwa, atanya kiwuwuno Misri wölo kïmolisyö kuwerata kareran, amaparnye chane.

¹¹Achï ye ketökisyö, kipka kutulenecha koronï kikonechanyi kïlïkwï nyincha.

¹²“Ichinyi Tororötïncha ghetecha ompöwölo mökimukechanye kegh kïgh anka tïkwïl ompö lïk nyo wow nyo tenö nyï pkonöy kïporyeghonecha, amökinkïtöchanye kïgh nyo kighöy, wölo kïsömökecha nyi.”

¹³Kughyongo pipö Yuda löwïr tawu ECHOTYON nko monekwa cho mïnkech nko korukwa nko monekwa cho echön.

¹⁴Kungwïnchï Mïkulöwu ECHOTYON chi ompö tuyononi nyo kikuro Yaasiel wero Sakaria wero Penaya wero Yeiel wero Mataniya nyo le chi pö Lawi nyo pö ara werpö Asap.

¹⁵Kïlö chichay le Yasyel, “Atera pipö Yuda kïmïkul nko möngi Yerusalem nko nyi pöytoghin Yeosyapat, kamwa ECHOTYON lö, ‘Monyökoritu amotyö ompö lïkonï wow le nyï ompöwölo pö Tororöt porye melö nyinkwa.

¹⁶Oröytenö asïyech ape oporyeghenö otinö pkonöy, kïpusu ompö adoket pö lalwa tömko Sis. Onyorchinekwa chane wölo kangata mpöghogh wölnö kaparta korïron pö Yeruel okumpö kong asis.

¹⁷“ ‘Akwa pipö Yuda nko Yerusalem melö mi machata oporyenökwa ompö poryonï, oghyongenö pat adekelyengwo lasay, atasïwena wölo rïntewokwa ECHOTYON kïlïkwï.’ Mowöghisyö amomïghyö, anapa kegh oporyö nko chane asïyech ompöwölo mi ECHOTYON nko akwa.”

¹⁸Atolapay kïkïtïng pöytoghintö Yeosyapat akungïrukö tökïswany tokochunyi ngwïny, kwigh lenyini tïkwïl pipö Yuda kïmïkul nko möngi Yerusalem ompö tawu ECHOTYON, kïsagh ECHOTYON.

¹⁹Kughyö pipö Lawi cho pö ara Koat nko cho pö ara Kora akïsal ECHOTYON Tororöt pö Israel kïtumchï kurur.

²⁰Kïnget atole asïyech tökwoghö akïpa kutang koro nyo le sïrken nyo mi Tekoa. Akwotini kimi kïpetöy, kughyö Yeosyapat akïlö, “Atere ngalechï, pïchï pö Yuda nko cho omöngöy Yerusalem, aghana lasiny ECHOTYON Tororötïngwo atachïchïma, aghan werkoykachi atökïkonok rïntagh.”

²¹Nyini kiwany kïngalan nko pich, kïkïl pöytoghintö tumï cho tumchini ECHOTYON, akïsölöy nyinte ompö köromnyo tïlilyö otinö mi kuntöghoghchini lïk, akïtumöy kïlentöy. “Asala ECHOTYON, ompöwölo pö kokay chomnyenyi.”

²²Nyini kitor kïtum akïsölisyö, kwigh ECHOTYON lïkö pipö Amon nko Moap nko cho pö kuntïng pö Seir cho kipkonöy kupokyini koro Yuda kïwöngisyö akerich chane lö, tïlkwïch.

²³Kïnget pipö lïko Amon nko Moap kïpar pipö kutïng pö Seir kuwonyö. Otini kiwany kïpar mïrön pö lïk Seir kïlïtyï kïpar kegh chane opïn tökïtenö kuwany chi tïkwïl kongenyi.

²⁴Nyini kitïta lïko pipö Yuda wölo kïtopöntegho ompö kor nyo le sïrkwen, kïlö kïtopön wölay mi lïkonay wow pö pung, kïsïwa chane kirïkïsus ompö ngwïny kimeghö amöminye ompö akong nyo kisöpöy.

²⁵Kïwö Yeosyapat nko lïkenyi kïngötörisyö, kïnyorï kyak cho chang nko tïku walak nko sïro nko karïn walak cho pïchighöch cho kipït, kurit chane ompö osis sömök tïkuchoni, ompöwölo kichang tya.

²⁶Kïpa kutuyechï kegh mpöghoghyo Peraka asisto angwan, akuyokyï ECHOTYON sörö ompö wölini ompö tïkwïn löwïr cho kighchï chane. Nka nyoni kïkuro mpöghoghyononi Peraka[1] nko nyete le ye.

²⁷Kïlenyona kuntöghoghchï Yeosyapat pipö lïkenyi nyo pö pipö Yuda nko Yerusalem kïmïlisyö Yerusalem ompö ngörekyö ompöwölo kirïnta ECHOTYON pungkökwa.

²⁸Nyini kitïta Yerusalem, kïpa lenyini kïlïtöy Kö pö Tororöt kïpïtotoy pïkantis, akïkutotoy pkurerun nko kontin.

²⁹Kïnam tapan pöytoghi koros löwïr otini kilïm lö, kirïnta ECHOTYON pung pö pipö Israel.

³⁰Kïlenyona nyu kïpöghisyö Yeosyapat nyo karam, kitö ECHOTYON kalya ompö wop tïkwïl.

³¹Kitor Yeosyapat wero Asa kïpayta Yuda ato kitïng könyis 35. Kipayta ompö Yerusalem könyis 25. Kikuro kame Asupa chepö Syili.

³²Kigh nyinte nyo karam ompö tawu ECHOTYON le kwanta Asa.

³³Wölo menyarnye wölo kïsogho körkeyïntin. Kitomönye kïwöghökisyö pich kïsagh Tororöto papotïnekwa ompö mïkuliskökwa.

³⁴Kirote ighisyewut walak cho kigh pöytoghintö Yeosyapat kïngeta söröm nko söröm nyo pö paytaghtanyi kitapu Yeu wero Anani, cho kikikir kitapu pöytoghi Israel.

³⁵Nyini kiwanta kegh ngalechoni, kïwö Yeosyapat pöytoghinto Yuda kïghömö nko Aasia pöytoghinto Israel nyo kigh ngal cho ghach.

³⁶Kinyoryö kegh kïtek melin cho petöy kugheghöy Tarsis, kikigha meline choni wölnö le Esyonkeper.

³⁷Wölo kïngor Elieser, wero Dodapau nyo pö kanasyanta Maresya paraku Yeosyapat lö, “Nyoröy ECHOTYON melinechoni löwïr kaghakwa, ompöwölo kenamanyi kongot nko Aasia.” Ato mi löt kunyorisyö melinechay amakumïcha kïpa Tarsis.