Read pokoot 2 OTÖPTINO OSIS 21 Bible Online

2 OTÖPTINO OSIS 21 - pokoot bible

2 OTÖPTINO OSIS 21

¹Ato mi löt kïrapas Yeosyapat ketïpchï wölo kikïtïpchï Papotïnechi wölo kikïtïpchini pöytoghï ompö kanasyanta Daudi kuker werïnyi Yeoram kïlïkwï pöytoghin.

²Kitïng Yeoram werkökwa, werpö Yeosyapat, pöytoghinto Yuda akï choni kï Asaria nko Yeyel nko Sakaria nko Asaria nko Mikael nko Syepatia.

³Kiropchï papongwa tïkwïn cho echön cho pö Silpa nko koltin akïlö tïku walak cho pïchighöch akutö ngat kanasyanta Yuda nyo tïng nayat cho oghïgh. Wölo ompöwölo Yeoram nyo kile poretyenyi, kutö Yeosyapat paytaghtanyi kïpayta kuker nyinte.

⁴Nyini kitöpö Yeoram ngacharu paytagh akïchïchïm paytaghtanyi, kïpar werkökwa löwïr akïpar tïkwïl kintöghoghi walaka cho echön ompö Israel.

⁵Kitor Yeoram paytagh ato kitïng könyis 32. Kipayta ompö Yerusalem könyis mut nko sömök.

⁶Kirïp otöptino pöytoghin Aap cho ghach nko cho pö pöytoghi Israel walak le wölo kighöy pipö kö pö Aap ompöwölo kip chepö Aap kïlïkwï korkenyi. Kigh nyinte ngokï ompö tawu ECHOTYON.

⁷Wölo machamnye ECHOTYON kuwany pipö ara Daudi, ompöwölo kikikwan muma* nko Daudi, akikikuyomis Daudi lö, letöy tagh yiyenyi kïpöytoy kokay.

⁸Kitagh pipö Edom paytaghpa Yuda ompö osiswo Yeoram akïkïlchï kegh pöytoghintengwa.

⁹Kïlenyona, kïnget Yeoram oghö kïmi nko yetïntinechi pö lïk nko nkarinechi löwïr, akïwö kiporyeghö pipö Edom cho kökikurik nyinte nko yetïntinechi pö lïk nko nkarinechi.

¹⁰Kïlenyona kitagh pipö Edom paytaghpa Yuda nko nyete le ye. Osiswechoni ato kïpesyö tïkwïl pipö kanasyanta Lipna ompöwölo kikipïstö Yeoram ECHOTYON, Tororöto papotïnechi.

¹¹Amönyoninye onkït, kitek ompö kutïng pö Yuda wölo kïsogho körkeyïntin akuntöghoghchï pipö Yerusalem kupotö kighanata, akuryal pipö Yuda kupotyö.

¹²Kurelchï palalyanta pöytoghin Yeoram nyo kingwïno wölo mi werkoyonta Eliya nyo kikikir lö, “Kölö ECHOTYON, Tororöt pö paponkwa Daudi, merïpanyinye pöghisyewut pö papongu pöytoghin Yeosyapat anta cho pö Asa pöytoghinto Yuda.

¹³Wölo kirïpanyi otöptino pöytoghi pipö Israel aighanyi pipö Yuda nko Yerusalem kïlïkwï penyï ompö tawu Tororöt le wölo kida Aap nko pöytoghï cho kirïpöy nyinte pipö Israel. Anyï ye keparanyi werkökwa, cho opo kaw akonga, cho kikaramach kïtïlinyi.

¹⁴Kïlenyona, yonchini ECHOTYON piköku nyaril, maneku nko koruku, akunyar tïkuku löwïr.

¹⁵Nöminyi nyo le nyi sömewö nyo gha kwan, nyo mösöpönye tökïtenö kïpka kwanköku sany.”

¹⁶Kiwïkwï ECHOTYON pipö Pilisti nko pipö Arapia cho kimöngöy ato le kïtö pipö Etopya kïpa kïporyö nko Yeoram.

¹⁷Kïpa nyu kïset kïpar koro Yuda akïngatar tïkwïn löwïr cho kimi kö pö pöytoghin akuretö monechi löwïr nko koruchi, kudong Aasia werïnyi nyo mïnïng.

¹⁸Ato mi lötuto ngalechoni löwïr, kïwira ECHOTYON pöytoghin sömew nyo kinam kwan nyo kimötïngnye sakïtyan.

¹⁹Kinam sömewö, akïlïkwï sömewenyi nyo töso asis anka tïkwïl. Kïma sörömuto könyito odeny ompö ngwonïn nyo wow menoghchïnye pikachi nyinte ma otini kima le papotïnechi.

²⁰Kitor Yeoram kïpayta kïtïng könyis 32. Kïpayta könyis mut nko sömök ompö Yerusalem. Puryö chi nyo kilok otini kima. Kikïtïpchï kanasyanta Daudi wölo melö wop nyo kïtïpchini pöytoghï.