Read pokoot 2 OTÖPTINO OSIS 22 Bible Online

2 OTÖPTINO OSIS 22 - pokoot bible

2 OTÖPTINO OSIS 22

¹Kwigh pipö Yerusalem Aasia wero Yeoram nyo mïnïng kïlïkwï pöytoghin kuker kwanta ompöwölo kipar pich cho kilïtï kanasyan nko Marapun werkökwa cho echön löwïr, kïlenyona kïlïkwï Aasia wero Yeoram pöytoghinto Yuda.

²Kitor kïpayta Aasia wero Yeoram kïtïng könyis 42, kïpayta köny akonga ompö Yerusalem. Kikuro kame Atalia nyo kile kuköto Omri.

³Kirïp nyinte tïkwïl ngala ka Aap, ompöwölo ki chepö Aap kame kirur nyinte kwigh ngokï.

⁴Kigh nyinte ngokï ompö tawu ECHOTYON le wölo kigh ka Aap, ompöwölo chane cho kile kirurichi otini kima kwanta tökïtenö kunyara.

⁵Kïrïp kirurutkökwa tökïwö nko pöytoghin Yeoram wero Aap pöytoghinto Israel kïwö kïporyö nko Asael pöytoghinto Sirya ompö wölnö le Ramot Kiliad, akekotönö Yoram wöloni.

⁶Kuyoda kegh kïwö kutang kanasyanta Yesrel, kïsarar moyokachi cho kikïtora wölnö le Rama otini kimi kïporsot nko Asael pöytoghinto Sirya. Kïwö Aasia wero Yeoram pöytoghinto Yuda kïrutö kïwö kuros Yoram wero Aap ompö wölnö le Yesrel nyo kikasate.

⁷Kigh ECHOTYON Aasia kïwö kïrutochï Yoram atökenyara wölini. Ompöwölo otini kimi wölini kïnomnyotö nko Yoram kïpa kïpar kegh nko Yeu wero Nimsyi nyo kikikïl ECHOTYON kuwany ka Aap lömïs.

⁸Otini kimi Yeu kurwokyini ka Aap kuryam nko yetïntino Yuda kïmi nko monïngo wor ompö Aasia cho kipöghisyechini Aasia, kïpar chane.

⁹Kïyar wölo mi Aasia tökenyorï mi kïghïpöy ompö Samaria, kerewï ntökwitï wölo mi Yeu, kïpar nyinte ketïp ompöwölo kikïlö, “Kuro Yeosyapat kukö, nyo kisoghöy ECHOTYON ompö mïkulöwunyi kïmïkul.” Kïlenyona kimöngötïnye yete chi ompö akonga ompö ka Aasia nyo kimuköy kïlïkwï pöytoghin.

¹⁰Nyini kinkïtï Atalia yoto Aasia lö, kima werïnyi, kïnget panini lawel akïwö kïpar monïng löwïr cho pö pöytoghinto kö pö Yuda.

¹¹Wölo kïnget Yeosyepa chepö pöytoghin Yeoram kumït Yoas wero Aasia ompö kwenu monïngo pöytoghin cho kimi kepöröy. Kïwö kïwïny nyinte nko chepto monïng ompö kö nyo kïrusot. Yeosyepa, kï chepö pöytoghin Yeoram akï koko tïsin Yeoyada. Kiwïng Yoas, tömapar Atalia ompöwölo ki chepto ompö Aasia.

¹²Kïtöpö Yeosyepa nko chane könyis mut nko akonga kïwïngchini Kö pö Tororöt ato kimi Atalia kïpöytoy.