Read pokoot 2 OTÖPTINO OSIS 24 Bible Online

2 OTÖPTINO OSIS 24 - pokoot bible

2 OTÖPTINO OSIS 24

¹Kitor Yoas kïlïkwï pöytoghinto Yuda ato kitïng könyis mut nko odeny kïpayta könyis tömönut angwan ompö Yerusalem. Kikuro kame Sipiya nyo pö kanasyanta Persyepa.

²Kigh Yoas nyo karam ompö tawu ECHOTYON otinö kitö kïsöpöy tïsin Yeoyada.

³Kïkensyechï tïsin Yeoyada Yoas kor odeny kïyichï koruchoni monïng cho le wor nko tipïn.

⁴Ato mi löt, kunonchï Yoas kwigh Kö pö Tororöt wölo kinyara.

⁵Kïkur tïsï nko pipö Lawi akïlenchï, “Ape akwaghena pipö Israel löwïr ropïyen ompö kanastina Yuda atökegha koto tororötïngwa ompö könyi anka tïkwïl, agh lenyoni lawel.” Wölo meghnye pipö Lawi lawel.

⁶Kïlenyona kïkur pöytoghintö kintöghoghinte Yeoyada akïlenchï nyinte, “Ompö ne tötomönye mwochinönyi pipö Lawi kïchengunö pipö Yuda nko Yerusalem ropïyenichay kimwa mötworinto ECHOTYON Musa, kïmwochï pich kïkonï atö kïpöyit Ema nyo mi ECHOTYON.”*

⁷Ompöwölo kiwir werpö Atalia, kokonay le ptakalyan Kö pö Tororöt* akïlït ori akïchengwï kari Kö pö Tororöt cho tïlilöch löwïr ompö saghata Paaltin.*

⁸Kïlenyona kïmwochï pöytoghintö pipö Lawi kwigh santukï nyo kïpösyini ropïyen akutö sanypa kukat nyo lïtöy kïwetöy Kö pö Tororöt.

⁹Kemwatïta kïghömï Yuda nko Yerusalem, kïpösï pich löwïr ECHOTYON ropïyenichay kimwochï mötworinto ECHOTYON Musa pipö Israel atanya kimito kor nyo le sïrkwen.

¹⁰Kwipï yetïntinö löwïr nko pich löwïr ropïyenikwa ompö ngörekyö akïpösyï santukunay tökïtenö kïnyïghï.

¹¹Kipöy nyu pipö Lawi santukunoni chik, kwipchini yetïntin, nyini kisïwa chane lö, nyïghitote pasanchay pö ropïyen ori kungwïn kikirinto pöytoghin nko pröyönto Tïsin nyo Wow* kïchenga santukunoni Atolapay kuyoda kwip otini kömi. Kwigh lenyoni ompö osis löwïr, kughïm ropïyen cho chang.

¹²Kutötö pöytoghintö nko Yeoyada ropïyenichay kutö pich cho kighyongchini tekï cho kighöy Kö pö Tororöt, kukir nyu pich cho nkït kïlököy köghin cho kïteksyeghö nko cho nkït kïköreröy ket cho kïteksyeghö kwigh Kö pö Tororöt, kukir tïkwïl kitongi karïn nko cho pö taghoy atökwigh Kö pö Tororöt.

¹³Kipöghisyö tekichay nyoman, kwigh lasiny Kö pö Tororöt kughyö kwaghïghit le wölo kitöptoy otini le tagh.

¹⁴Nyini kiwany kwigh Kö pö Tororöt kwipï ropïyeni cho kidong kwipchï pöytoghin nko Yeoyada, Atolapay kegha tïpö Kö pö Tororöt ropïyenichoni, tïkuchoni kï karïn cho kikïpöghisyegho kegho ngala Kö pö Tororöt ketötegho konut cho pö kwïle cho kïpelöy nko otupöy cho pö tïkwïn cho ngutoy cho onyïn, akïlö kari walak cho kikigha Silpa nko Koltin. Kilet pich tagh kutötö konut cho kïpelöy ompö Kö pö Tororöt ompö osiswo Yeoyada löwïr.

¹⁵Kïtöpö Yeoyada nyo kogh tökurel könyis 130 kïrapas.

¹⁶Ketïpchï nyinte kanasyanta Daudi wölo kimi pïrïmpoti pöytoghï ompöwölo kigh nyinte nyo karam ompö Israel nko ompö ECHOTYON nko konyi.

¹⁷Nyini kirapas Yeoyada kïpa kintöghoghi Yuda wölo mi pöytoghintö kïpa kïwaghach kinonutkachi, kïchama cham nyinte tökïtenö kïcham ngalekwa.

¹⁸Kïpïstö pich kïsagha Kö pö ECHOTYON Tororöto papotïnekwa, akutor kïsagh körkeyïntin nko Asyera* tororöt nyo le korka. Kïnarek ECHOTYON ompö Yuda nko Yerusalem ompö ngoki choni kigh.

¹⁹Kïyonta ECHOTYON werkoy kïpa kuteghchï chane atökuyoda kegh wölo mi ECHOTYON, wölo machamnye kïrïp ngale werkoychoni.

²⁰Atolapay kungwïnchï Mïkulöwu ECHOTYON Sakaria wero tïsin Yeoyada kïpus nyinte ato le tïkumwok akïlenchï chane, “Mwoghöy ECHOTYON lö, ‘Ompö ne tapenyakwa kirurutköchan? Kïlenyona ye nyu mosïkönonekwanye, ompöwölo kyopïstekwa ECHOTYON, kikïpïstokwa nyinte tïkwïl.’ ”

²¹Kïtat pïchay kewir Sakaria ompö kuti pöytoghin, akewira nyinte köghïn kïma ompö kiroryo Kö pö Tororöt.

²²Kiwutyeghö pöytoghintö Yoas köromnyö nyo kighchï Yeoyada papoto Sakaria kïpar werïnyi. Otini kimi kurïlotoy kïlö, “Nya kïsïwa ECHOTYON kïyete kaghakwa akutak.”

²³Nyini kiwonyö könyi kïset lïko koro Sirya kïpa kïporyeghö pipö Yerusalem nko cho pö Yuda. Kïpar yetïntine löwïr akïngatar tïkwïn cho chang ato löwïr kwipchï pöytoghinto Damaska.

²⁴Kingörï pipö lïkononi pö sirya wölo kwigh ECHOTYON lïkononi kïrïnta lïko pipö Yuda nyo wow, ompöwölo kikipïstö chane ECHOTYON Tororöto papotïnekwa. Kïlenyona kïnyorï pöytoghintö Yoas sito ECHOTYON kuwerï lïko Sirya.

²⁵Kuyoda kegh lïkonay pö Sirya, kïpïstö Yoas kotyon. Kïyar or mötworichi nyo pöro nyinte, ompöwölo kimïlata nyinte kisön pö wero tïsin Yeoyada kepörchï pöröyunyi. Ketïpchï Yoas kanasyanta Daudi wölo mötïpchïnye chi pïrïmpoti pöytoghï.

²⁶Pïchoni kipar Yoas kï ki ompö, Sapad wero korka nyo kikïkuro Syimeat nyo ngwïno Amon nko Yeosapad wero korka nyo kïkuro Syimrit nyo ngwïno Moap.

²⁷Kikikirchï ngala werpö Yoas nko cho pö werkoynön parakunyi nko ighata Kö pö Tororöt kitapï nyo kikikirchï ngala pöytoghï. Kïpayta Amasya werïnyi kuker nyinte.