Read pokoot 2 OTÖPTINO OSIS 25 Bible Online

2 OTÖPTINO OSIS 25 - pokoot bible

2 OTÖPTINO OSIS 25

¹Kilïkwï Amasya pöytoghin ato kitïng könyis 25, kïpayta könyis 29 ompö Yerusalem. Kikïkuro kame Yeoadan nyo kipö kanasyanta Yerusalem.

²Kigh Amasya nyo karam ompö tawu ECHOTYON wölo meghanye mïkulöwunyi kïmïkul.

³Panini lawel kichïchïm kegh Amasya lasin kïpayta kïpar pröyöntin cho kipar paponyi.

⁴Wölo medanye kïgh monekwa, kirïp ngal cho kikikirchï kitapu Musa cho mwoghöy ECHOTYON lö, “Möpöronye chi yiyï ngaleko monekwa amöpöronye chi monïng ngaleko yiyikwa wölo kïpöro chi anka tïkwïl ngokichi onkït.”

⁵Kutuyö Amasya mïrön pö Yuda akïchaghachagh kïchangït kïrïp kegh nko ortïnekwa akutö yetïntin cho ghyongchini pich cho peghotegho 1,000 nko cho ghyongchini pich cho peghotegho 100 ompö pipö Yuda nko Penchamen. Otini kiyit pich cho kitïng könyis 20 kutoch kïlïkwï pich 300,000 cho kikïkïl cho kimuköy poryot, akinkït kïpöghisyegho ngot nko longa.

⁶Kukir ngat pipö lïk cho pkono Israel cho le 100,000 cho nkït poryot akï nyökon, kutötö ropïyeni silpa cho kitenö nïkisyengwa kilen 3,400.

⁷Wölo kïwö chi pö Tororöt wölo mi nyinte akïlenchï, “Kolano pöytoghin, mekany kïpa lïko Israel nko nyi poryot ompöwölo möminye ECHOTYON nko pipö Israel nko pïchï löwïr pö Epraim.

⁸Imukenyi nonchinö kegh lö ngörokinyi chane awesituna ompö poryot, wölo ighöy Tororöt pungköku kïrïntinyi, ompöwölo Tororöt nyo tïng owesyö kutö chi rïntagh anta pïsï pungkachi kïrïnta nyinte.”

⁹Kïtep Amasya chichay pö Tororöt lö, “Petöy lö ne ropïyenichay kotötan otö lïko pipö Israel?” Kïwöghökï chi pö Tororöt lö, “Tïng ECHOTYON or nyo koneninyi cho chang tya kïtïl choni.”

¹⁰Kïlenyona, kïyonta Amasya pïchay pö lïk kikikir kïmïlisyö kestonikwa. Kïmïlisyö pïchay kaw ompö nörekyö kinörekyï pipö Yuda.

¹¹Kïnam sirmoy Amasya, kunget lïkenyi, akuset kutang mpöghoghyo paryan. Kïporyö ompö atoni kïpar pipö lïko Edom cho le 10,000.

¹²Atolapay kïnam lïko Yuda walak cho le 10,000 akuretö kïpus ghat parak, akïyumteghö ghatyanay parak kïtörentoy kïlïkwï mïrngany.

¹³Kïnget pïchay pö lïkonay kiyoda Amasya kïmïlisyö kestonikwa lö, tömaset nko nyinte kïpa kupokyï kanastina Yuda kïngata Samaria tökurel Pet Oron kïpar pich 3,000 akïngatar tïkwïn cho chang.

¹⁴Nyini kiwany Amasya kïpar pipö lïko Edom löwïr, kïrot katanyi akïnamata tororötino pipö koro Edom kïwö kïparta akwigh kïlïkwï tororötinechi cho soghöy akïpelchï amörostin.

¹⁵Kïnarek ECHOTYON kïnörekyï Amasya, atolapay kïyonta werkoyon kïwö wölo mi nyinte. Kïlenchï werkoyontonay nyinte, “Ompö ne tetwaytena kegh tororötino pich walak cho memïcha ompö tökïsörï pikachi kegh kïsörunö moriku.”

¹⁶Wölo nyini kitomönye kuwany werkoyontonay kïngalan, kusiryan Amasya ngalechay akïlenchï, “Oyï otï kikighinyi lïkuna kirurinto pöytoghin nya? Sisa! Pö ne ketïghïn?” Kïsï werkoyontonay, akïlö, “Onkïtön lö, kimach Tororöt kunyarinyi ompöwölo keghanyi le nyï aitaghanyi ngalechan.”

¹⁷Kïngalan Amasya pöytoghinto Yuda nko piko kokwenyi, Atolapay kïyonta kut wölo mi pöytoghintö Yeoas wero Yeoaas wero Yeu pöytoghinto Israel kïmwochï kïghamït pikachi pö lïk akïpka poryot.

¹⁸Wölo kuyokyï Yeoas pöytoghinto Israel Amasya pöytoghinto Yuda lö, “Kiyonta kut astanka ket pö kato nyo kimi wuw pö Lepanon kïwö wölo mi törokwö nyo kimi Lepanon kïlenchï yilchinö cheptöngu werïnyan, wölo kuwer tyompö wuw pö Lepanon atoni akïtïkatïk ketay pö kato.

¹⁹Nkerïpönyi ikwol kegh nya Amasya ilö, kapar Edom aimen tya! Wölo ye mpurö katangu, pö ne yörchinö kegh nyarïl nyo wonginyi nko pipö Yuda?”

²⁰Wölo machamnye Amasya kïrïp ngalechoni ompöwölo kigh Tororöt lenyoni atökepïsï Amasya mori pung, ompöwölo kitwayta kegh tororötino pipö Edom.

²¹Kuset pöytoghinto Israel Yeoas lïk kïwö kïporyö nko pöytoghinto Yuda Amasya. Kuryama Pet Syemes nyo mi koro Yuda, kïporyeghö atoni.

²²Kïrïnta pipö Israel cho pö Yuda, kïryagh pipö lïko Yuda kïpa kestonikwa.

²³Kïnam Yeoas pöytoghinto Israel Amasya wero Yoas wero Aasia pöytoghinto Yuda kïnama Pet Syemes, akwip kïwö Yerusalem. Kurultö nayatu kanasyantanoni kïngeta Kuka Epraim tökurel Kuka Luch ki lekït lowïnto kirulötononi miten 200.

²⁴Kïcheng koltin nko silpa löwïr nko karïn löwïr cho kimi Kö pö Tororöt* cho kiripöy Oped Edom akïcheng tïkwïn cho kirorote ompö kö pö soch nko pich cho kirötote Atolapay kuyoda kegh kutang Samaria.

²⁵Otini kirapas Yoas wero Yeoas pöytoghinto Israel, kuropï Amasya wero Yoas pöytoghinto Yuda kïtöpö könyis taman nko mut.

²⁶Ighisyewut pö Amasya löwïr cho kigh kutorö cho tagh ntökïchini pö löt, kïmekirotcha ompö kitapuna ngala pöghisyewut pö pöytoghi Yuda nko cho pö Israel?

²⁷Kïngeta otini kipïstö Amasya ECHOTYON, kïyar pich or nyo tïgho nyinte ompö Yerusalem, kuperta kïwö Lakis. Wölo keyonta mïrön kïpa Lakis kïrïp nyinte akïtïghchï wölini.

²⁸Kekösönunö portanyi angoletin kutöngwï Yerusalem, aketïpchï wölo kikïtïpchï papotïnechi ompö kanasyanta Daudi.